Read Casuarina Coast Asmat IBRANI 13 Bible Online

IBRANI 13 - Casuarina Coast Asmat bible

IBRANI 13

¹Emesare, tare Kristus ajamkaimakam owe. Erarawa tarmamon ajamfaimamaaray.

²Bimak binip bajanimem bas. Tanom kaaowe tatame atoomjiiay. Wan owe, emes aemes ere, are malaikat owe atoomjiies. Me, era atoomjiies owe, malaikat owe apok emes jiraoemesen. Are asamot owe jiraoemesen.

³Tanom era buji tame bomon aemapmas owe bimak binip bajanimem bas— tare era owe buji tame bomon takan aemapmakam emes tamena. Oweam wan owe ajurusumemas. Tare era ajirisapmas owe bimak binip bajanimem bas— tare era owe takan ajirisapmakam emes tamena.

⁴Owe takes, ooreysai, akot pak baportas. Owe tani tamane bajamdamat bas. Allah era asan pota pak baem oweam, era tani tamane bajamdamat oweam, atakam asakamtiitem.

⁵Uang bimak binip batetaram daytu bas. Era aemomemmakam pak, jak akot aememay. Allah atakam akore, “Dere wora bamompim apoknak aemtemin. Denom beken wora bajiapom apoknak aemtemin.” Emes atakam aesimen.

⁶Erarawa dare jak fiak aememamo. Danom: “Tuhan ere, pi dera bajat Ipit. Erarawa dere asamot owe aemtanis pak, ombare apok aememmin.” Emes atakam aesimteteramo.

⁷Me tara aemomataarin owe bimak binip ajanimomay. Era owe, ere Allah atakam akoromaarin. Era owe jatiaptam aememaaris pakam, dambir ates pakam, bimak binip bajanimomay. Tanom era owe Yesus Kristus eemnak ambesemkoromes pakam atakeemay.

⁸Emesare, Yesus Kristus, waaam, toam, asep baream, awar aememaarem.

⁹Tanom wan owe atat kupis atakam aememtamemas atakam, bajamkai bas. Tare era bokot anakotpu beken bajietiios-ombar. Emesare, Allah asan akot bambi atetamum. Erarawa owe jak fiak aememmas. Era pak ere akot. Me, owe banda pak tai ji aetas, era pak era owe jak fiak baemapom pak apok. Era pakam era owe asan akot baemapom pak apok.

¹⁰Emesare, dare Allah pak jis bajaatam joo aemapommarom emes tamen are. Are aemansa tapirmi pitini Yahudi owe samayen tame bomon afaafetamemas owe, era pak banda baemenda asan apok.

¹¹Me Allah Tame pak baem ipit daytu, binatang esee, era Allah turunak Kamar atoomjiia ajieme. Ere dosa bimak binip bajanimemtam pak. Me, owe era binatang bino, era tame epem jis ajaaa ajiemas.

¹²Erarawa Yesusam, era kota tame epem era jimsap tiri tasan, dambir ateme. Are era asan aesee ajirimdaeme. Era esee, owe turunak baemapom esee.

¹³Emesare, danom Armat Ipitpu, era tame apem aesosamo. Dare adamke pak pajamtaeramo.

¹⁴Ara aemansa tapirmi, dare jiine baemeemapaar asan apok. Dare ere, era ajinaoto kota andimarpormarom.

¹⁵Erarawa, danom tere Allah aeomaaramo. Yesusam dare era pak baem, bimak binip atetammaro. Danom era pak aemtam, dare pak Allah ataetiitammarom emes tamen are. Dare, Allah akot, emes atakam akoretam, dare pak, Armat Ipit atetammarom emes tamen are.

¹⁶Emesare, tare akot baemam, tarmamon asan akot bajamemamam, bimak binip bajanimem bas. Era pak aemtam, danom pak Allah ataetiitammarom emes tamen are. Anom Allah akot apormar pak jipu.

¹⁷Me tara aemomatman owe atakam, ji aeay. Era owe bawotapem bas. Are banamek tara ataiomaareman. Allaham, era owe aememas pak, akot apaye, pota apaye, emes aoorporem. Tanom era owe aatakam ji aetakam, are apak aeme jak akot aptam aememtemas. Tare aatakam ji bae apok aemtakam, are apak baem jak pota aptam aememtemas. Era pak tare asan akot baemapom pak apok.

¹⁸Me dajak bomonam, era aemom pak, atet apok atakam akoromtetermaro. Dare emes damsamnak. Danom era aemtam pak takes, akot pak baem, emes jak aseserommarom. Erarawa, tanom atakam Allah dara ajanimtamaroay.

¹⁹Emesare, dere atakam fiak tara ajanimmin. Tare atakam Allah ajanimtamani. Dere taasan fef bojinao, emes atakam Allah ajanimtamani.

²⁰Allah ere, owe ji baem batetam Ipit. Are, Yesus daTuhan ajaoromwasumtume. Yesusam, aesee ajirimdaeme. Erarawa Are jiine ataaji, ataaji anakot aporomtame. Allahrawa, Armat Ipit, Domba Banamek Batai Ipit Daytu, ataemome.

²¹Emesare, Allah, era akot pak takes tara batetamtan. Era pak tare Armat Ipit akot apormar jipu baem pak. Armat Ipit era akot apormar pak jipu, tajak bomon baemtetertan. Armat Ipit, Yesus Kristus, era pak, tajak bomon baem, ataemome. Oweam emes atakam bakoreaartas. “Emesare, Yesus Kristus akotnak.” Emes atakam tere baeomaartas. Are atakam, ere atakamnak.

²²Dejoo owe akotnak! Tare ara aeapomtammin surat, ataane baowe atakam. Ara suratam jirao apok. Erarawa dere atakam fiak tara ajanimmin. Are surat atakam, jane jak jirao aptam ajiay.

²³Baporay! Era buji tame armat owe, Timotius asurumtames. Armat ipit, ara asan fef ajinaoto, danom taasan takan ajinaotemamum.

²⁴Selamat atakam, tara aemomatman owe takesam, Allah aowe takesam, aesimtamay. Me Italia Yesus bajamkai oweam, selamat atakam tara akoromman.

²⁵Allah, asan akot, tare takes baemkoromtan.