Read Casuarina Coast Asmat IBRANI 4 Bible Online

IBRANI 4 - Casuarina Coast Asmat bible

IBRANI 4

¹Emesare, Allah, owe, akais banda ataaji aeen. Era ataaji aee atakam, danom dapak. Erarawa danom turunak aememamo. Me tare wan owe, kais banda apok-ombar.

²Owe Allah Akot Atakam era owe akoretamesen. Oweam Allah Akot Atakam akoretameroes. Era owe ere, era atakam bamesem apoken. Are era atakam jane bambi ajiesen.

³Dare ere, eemnak ambesemkorommarom. Emesare dare, Allah kais andemarom. Ere Allah atakam jipu taka are: “Denom jak ambap apumemo, wanam ataaji fiaknak aeeo. ‘Era owe kais takan Dera baemejamda asan apok.’ Emes atakam aesimo.” Allah emes atakam aesimen. Bonaknak ere, Armat Ipit ara tapirmi akenemtiikorome, Are pak bakenem akarimtiien. Me, Armat Ipit era atakam akoren.

⁴Alkitab, wan atakam, ere Allah kais ande bare atakam are: “Allah, pak takes bare poman ban taka akenemapomkorome, wanam bare taka kais anden.” Alkitab emes atakam aeapoma.

⁵Alkitabam: “Era owe era tapirmi ajiitas, wanam kais takan Dera baemejamda asan apok.” Emes atakam aeapoma.

⁶Wan owe ere, kais Allah takan ajamdemas. Bonaknak ere, owe, Allah Akot Atakam akoretamesen. Era atakam jane ajies owe ere, era atakam aooesen. Erarawa are kais Allah takan bajamda apoken.

⁷Allahrawa, owe, era asan, wan bare bajii, atakam asakamtiien. Emesare, “waa bare” aren. Asep tahun ere, Armat Ipitam, bimak binip Daut atetamen. Daut arawa, era atakam, surat aeapomen. Ere japen akoremarom Alkitab atakam are: “Tare waa Allah atakam jane ajitakam, jane sake bas.” Alkitab emes atakam aeapoma.

⁸Yosua era owe kais Allah takan bajamda atetame ere, Allah, owe, wan kais banda bare, emes atakam bakore apok.

⁹Emesare, Allah aowe, kais andemas. Ere Allah kais ande emes tamen are.

¹⁰Emesare, Allah era pak takes akenemapomkorome, are kais anden. Kais Allah takan ajamdetas oweam, era aemmas pak takes, akarimtiitemas. Are kais andetemas.

¹¹Emesare, dare kais Allah takan bajamda, jati aemo. Bonaknak owe, Allah atakam aooesen. Dare ere, era owe tamen baem bas. Dare kais banda apok-ombar.

¹²Emesare, Allah atakam, jatiaptam pak emes tamen are. Anom fiak. Jirao warim banimnuk aptam, ere fero apok. Allah atakam ere, feronak. Era atakam, owe ajak bomonnak pakam, era bomonnak bimak binip pakam, wan bomonnak pakam, baso aporomtameme. Era atakam, owe ajak baseseromem pakam, abimak binip pakam, akot apaye, pota apaye, emes aporomtameme.

¹³Owe, pak baemetukumtii asan apok. Me Allah akenemapome pak takes, ere baso. Armat Ipit era pak takes aporkoromum. Danom era aemmarom pak takes atakam baso Armat Ipit akoromtemarom.

¹⁴Emesare, daAllah Tame Pak Baem Ipit daytinak aemomemmarom. Ere Allah Andep Yesus are. Armat Ipit, Allah bipu baemap, Surga oup atemete. Emesare, dare Armat Ipit bamesem bamompim apok aemamo.

¹⁵Emesare, dare owe kumiti. Me daAllah Tame Pak Baem Ipit Daytu emes amsam. Me Armat Ipit aemporkorome— era aemporeroes pak takes emes tamen are. Yesus ere, dosa baem apoknak aeme.

¹⁶Emesare, dare jak sake aememamo. Dare Allah aemapmar asanpu ambaremamo. Era asan pota aemaptam bare, Armat Ipit soro ajiomemtemaro. Anom asan akot bambi atetamtemaro.