Read Casuarina Coast Asmat IBRANI 5 Bible Online

IBRANI 5 - Casuarina Coast Asmat bible

IBRANI 5

¹Me Allah Tame pak baem owe daytu takes, ere asamot owe. Allah era oweo aememayes aereremartaateterem. Era oweam pak Allah aemtamemas. Era bambi owe asan akot baem pak. Me, Allah Tame pak baem owe daytuam, pak Allah atetamemas. Anom pak Allah ataetiitamemas. Era dosa bimak binip bajanimemtam pak are.

²Me Allah Tame pak baem owe daytuam, kumiti asamot owe. Erarawa are janda oweam, era ajanemas oweam, seekotnak ajieemas.

³Are kumiti asamot owe. Erarawa Allah ataetiitamemas pak, bambi owe dosa bimak binip bajanimemtam pak taka apok. Anom adosa bimak binip bajanimemtam pak.

⁴Oweam, Allah Tame pak baem owe daytu, amba baemeemem asan apok. Me, Allah era owe era pak baem ajatem. Era Harun ajate tamen are.

⁵Emesamare, Kristus, Allah Tame Pak Baem Ipit Daytinak, amba baemem apok. Are duturu ipitkor amba baemem apok. Me, Allah, atakam, Armat Ipit akorome: “Wore deTii. Dere waa Wuritipit aememmin.”

⁶Wanam, “Wore Allah Tame Pak Baem Ipit daytu aememaartemarem— Melkisedek aememaarir tamen are.” Allah emes atakam aesimen.

⁷Yesus ara aemansa tapirmi aememe ere, Are atakam Allah fiak ajanimen. Atakam ajanime ere, anom bate manames aptam atakam afakeen. Emesare, Allah Armat Ipit bajortaer fiak pak aemomen. Ere Armat Ipit dambir bajortaer pak. Anom Yesus turunak Ipit aporen. Erarawa Are era ajanime atakam jane ajie jipu aemen.

⁸Yesus ere Allah Andep. Me, ajiriseme ere, Are Allah atakam ji bae aememen.

⁹Are Allah atakam ji aeekoromen. Era atakam ji aeekoromerawa, Are aatakam ji bae owe takes ara Bajortaer Ipit aememen. Era bajortaer pakam bakari apok pak.

¹⁰Allaham, Yesus, Allah Tame Pak Baem Ipit Daytinak ataemomen. Melkisedek tamen aren.

¹¹Danom wan emes tamen atakam tanane aemomom. Me, tare jane sake owe aememekem. Erarawa dare era atakam tara baemekoretamkorom asan apok.

¹²Tare era atakam jane tarai ajiekem. Tare ere, era atakam ji aeekem ere, tare era atakam baememtam owe eteememekem. Me, tare Allah tenekope atakamam baememkorom apok. Owerawa, era tane atakam tara boememtamtan. Emesare, tare amosnak baemenda asan apok. Tare ao taka andemakam emes tamen are.

¹³Era ao taka andemas owe, era akot pakam, era pota pakam, ere amsam apok. Are tapinto jii.

¹⁴Era amosnak andemas owe ere, owe daytu. Anom akot pak baem aememas. Erarawa are era akot pakam, era pota pakam, awar apok aporemas.