Read Casuarina Coast Asmat IBRANI 6 Bible Online

IBRANI 6 - Casuarina Coast Asmat bible

IBRANI 6

¹Erarawa, dare Kristus tenekope atakam boememtamaar bas. Danom era bomon atakamam baememtamamo. Emesare, dare era atakam fwe tare emeememtamom. Erarawa dare era atakam tara boememtam bas. Wan oweam, “Allah, era akot pak baem owe ajortaertem.” Emes atakam aesimemas. Tare ere, dosa bamakem atakam tamsam. Tanom Allah bamesem atakam tamsam.

²Tanom era bwi bakupimtaer atakamam, ban, owe damo ten bataetii atakamam, tamsam. Tanom era dambir owe ajaowasittas atakam tamsam. Allah, owe adosa, atakam basakamtii, wanam era owe bajirisemaar atakam, tamsam.

³Emesare, dare era bomon atakamam baememtamamo. Allah akot aporto, dare emes taka aemtemarom.

⁴Owe Yesus ambompimes apaye, wan owe era owe adosa beak sos baemesotam asan apok. Era owe ere, Allah Akot Atakam, atakamnak apores. Are Allah atetamemar pak atoomes. Anom Allah Jip aemomes. Anom Allah atakam, akot apores. Anom era aamsekunaoto bare fiak pak apores. Anom waa, Allah Andep salib wus oup amba aotatopommas emes tamen are. Anom Armat Ipit, owe takes bipu, bifane afeomemas.

⁷Emesare, te tapirmi andaepitimtiim. Are wan tapirmi, akot asandamiosem. Era tapirmiam pak akene akot ajitimapomum. Era pak akene arawa, era tapirmi bandandaesum ipit aapak. Allaham, era tapirmi, asan akot aemum.

⁸Me, era tapirmi, takapin takaam, fa aptam pa akene takaam, ajitimapomto, ere pota tapirmi aemamestem. Allaham, era tapirmi, asan pota aemum. Oweam, era tapirmi pak akene, jisimak ambomtiikoromemas.

⁹Dejoo owe akotnak! Dare ara atakam akoremarom are. Me, dabimak binip ere, tare emes bamompim apok owe aemapmakam. Tararawa, asan akot owe. Tanom akot pak tamsam. Era pak ajoremakam pak are.

¹⁰Emesare, tare Allah karai aetamaarukum. Tanom, Yesus bajamkai owe, asan akot aemaarukum. Tanom waa, era owe, pi ajatmakam. Era pak Allah afaimemakam baporomtam pak. Emesare, Allah turunak. Erarawa Are aemmakam pak bimak binip bajanimem apok aemtem.

¹¹Emesare, tare owe daytinak afaimmakam. Tanom, asepnak bare ajiire, emes aememaaray. Emes aemtakam, Allah, tajak aseserommakam pak, aemkoromteman. Danom tare emes baem, jak aseserommarom.

¹²Danom tare bamesem, pota ajimarom. Emesare, wan owe jiirey Allah taka aeemas. Are jak jirao aememas. Erarawa era owe Allah ataaji aee pak atoomemas. Danom, tare, era owe tamen baem, jak aseserommarom.

¹³Emesare, Allah ataaji Abraham aeen. Allaham, Ju Armat Ipit, ere De taka are. Wan owe takes ere, juas apoknak, emes aporen. Erarawa Are atakam akoren. “Dere ataaji aeemin pak jipu aemtemin. Pote apoknak. Dere aomaia.” Emes atakam aesimen.

¹⁴Armat Ipit emes ataajiam aeen: “Dere asan akot wora aemtemin. Denom wururupis tananenak atetamtemin.” Emes atakam aesimen.

¹⁵Me Abrahamam jak jirao aememen. Erarawa are Allah ataaji aee pak, atoomen.

¹⁶Asamot owe, are juas apok owe, emes apormas. Erarawa are ataaji fiaknak aeetas, are era juas aptam owe juas ajietaeremas. “Dere era ataaji aeemin pak jipu aemtemin. Pote apoknak. Emes ipit banamek taiapa.” Emes atakam aesimemas. Erarawa wan owe, era ataaji aeetas pak, atakam baemejamkoram asan apok.

¹⁷Allah era bimak binip akukuretiie pak bajanimem, wanam ai bimak binip bakukuretii ere, apoknaken. Are era ataaji aee pak atoomemtas owe, era pak baporkorom, jak aseseromen. Emesare, “Dere era ataaji aeemin pak jipu aemtemin. Pote apoknak. Dere aomaia.” Emes atakam aesimen.

¹⁸Emesare, Allah, pak amnuk aemen. Me wan pak, Are ataaji aee aren. Me wan pak arawa, Are emes atakamnak akoren. “Dere era ataaji aeemin pak jipu aemtemin. Pote apoknak. Dere aomaia.” Emes atakam aesimen. Are era pak amnuk baemejanimtii asan apok. Are era pak amnuk, pote atakam baemekore asan apok. Emesare, dare jak fiaknak aememmarom. Ere ombare ja Armat Ipitpu akukosom owe are. Dare Armat Ipit dara bajortaer ambaromom. Emesare, dare era jiirey aeemarom atakam, ban fiak baosomomaar, emes jak fiak aememmarom. Allah, era jiirey aeemarom atakam dara batetam, emes ataaji aeeero apormarom are.

¹⁹Era jiirey baee pak, ere dapak. Ere dare jak fiaknak baemapom pak. Anom atakamnak. Dare, Allah Surga oup Tame, Allah Turunak kamar aemapemar Ipit, jiirey aeeapom. Era Ipit, ere Allah.

²⁰Yesus era kamar bonak emejiie. Are asan akot dara baem ajiie. Armat Ipitam, Melkisedek emes tamen aememem. Are Allah Tame Pak Baem Ipit Daytinak, aememaartem.