Read Casuarina Coast Asmat YAKOBUS 1 Bible Online

YAKOBUS 1 - Casuarina Coast Asmat bible

YAKOBUS 1

¹Dere Yakobus. Dere Allaham, Tuhan Yesus Kristusam, akarai baetam ipit. Dere tare apatosekem saman poman bai jamnuk, selamat atakam akorommin.

²Dejoo owe akotnak! Tare ajirisemtakam pak kupis damon ere, jak akot aememay.

³Me tare Allah eemnak bamesemkorom apaye baempor pak, jak jirao tara aemapomteman.

⁴Tare ere, jak jirao aememkoromaaray. Erarawa tare sira awotemkoromtakam emes tamena. Tanom turunak owe aememtemakam. Tanom bambi baemem apok aememtemakam.

⁵Emesare, owe abimak binip baso apoknak aportas, are atakam Allah bajanimtas. Allahrawa, bimak binip baso atetamtem. Emesare, Armat Ipit, asan akot, owe takes atetamaareme. Are bi wuturu batem apok aememe.

⁶Tare ere, atakam ajanimtakam, Allah eemnak ambesemkoromay. Bimak binip arke bas. Era bimak binip arke ipit, itimbup wo emes tamen are. Bui era wo ajitimesemum. Are era wo bwi oup awaramtemettemum.

⁷Era ipitam, “Tuhan, era atakam ajanimtey pak aemtamteman,” emes bimak binip apok are.

⁸Era ipit, ere, bimak binip arke. Anom era aemto pak takes, atakam baemesakamtii asan apok.

⁹Emesare, wan dajoo owe pak apok owe. Era owe ere, are Allah owe emes asan akot aememto, jak akot baememtas.

¹⁰Pak daytu owe, takapin tae tamen apakapiostemas. Me wan dajoo oweam pak daytu. Era owe takapin tae tamen aemapmas, jak akot baememtas.

¹¹Emesare, jee oup atemetapeme. Are ambap ataendaemum. Ararawa, takapin asamtiim. Era takapin taeam akookondaeem. Era pak daytu oweam era pak aememas pak damon, emes tamen apakapiostemas.

¹²Owe era baempor pak jak fiak aememtas ere, asan akot aememtemas. Allah era owe eemnak Ara bamesemkorom aporto, Are jiinenak pak era owe atetamtem. Are era jiinenak pak, ere Ara afaimemas owe batetam, ataaji aee.

¹³Owe era baempor pak atatapimtaatas, wanam pota pak baem bimak binip atetaramtas, are, “Allah pota pak baem dera atatapimtaaman,” emes atakam bakore bas. Owe, Allah pota pak baem, baemetatapimtaa asan apok. Allaham owe pota pak baem, baemetatapimtaa asan apok.

¹⁴Owe ere, pota pak baem jak amba asenomemtas, ere ajak basenomem pak, era owe ara pota pak baem, emes atatapimtaaeme. Me ajak basenomem pak, era owe, jak aseseremtaaem. Are era owe akikimtaaemar emes tamen are.

¹⁵Era owe era pota pak jak basenomem daytinak aemtas, are dosa aememas. Are dosa aemkoromtas, ere dambir atememas.

¹⁶Dejoo owe akotnak! Owe potet tara batutum bas.

¹⁷Allah era wonamo oup sare pak akenemapomen. Era ataetmarom akot pak takesam, era ataetmarom anakot pak takesam, ere Armat Ipit aotetammaro. Armat Ipit juiin afaafemar, akot ajim. Are beak sos dara baemesotam asan apok. Are dare jiiti bomon baemetaemom asan apok.

¹⁸Are dare bonak asan baemap, wanam wan akenemapome pak asep asan emes baemap, akot ajien. Erarawa dare aatakamnak atakam jane ajiom, Armat Ipit dare arereis ataemomero.

¹⁹Dejoo owe akotnak! Emesare, owe takes jane fef bajitas. Me, are atakam bokore fef bas. Are jak ambap fef bas.

²⁰Owe jak ambap aememtas, are Allah akot aporemar pak jipu baem apok aememas.

²¹Erarawa tare era asan pota pak takesam, era jokoman pak tananenakam, ajiiosomkoromay. Tanom Allah tajak bomon ataapome atakam, ji aekoromay. Era atakam tara bajortaer atakam erare.

²²Emesare, ara atakam ji aeay. Jane bambi bajie bas. Tare potet tamba batutumem-ombar.

²³Wan owe ara atakam jane ajimas. Me, are era atakam ji bae apok. Era owe, ara sirmin jip aporememas owe emes tamen are.

²⁴Are era sirmin ajip aporememas. Ararawa, aoesosemas. Are ajip aporememas, wanam bimak binip ajanimememas.

²⁵Era basakamtam atakam anakot ere, owe asurumtamemar emes tamen are. Wan owe ara basakamtam atakam aoorporkoromemas. Emesare, are era basakamtam atakam aoorporemas. Are era jane ajies pak bimak binip bajanimem apok aememas. Are era basakamtam atakam ji aeemas. Era owe, ere, asan akot aemapmas.

²⁶Owe bimak binip atetaramtetertas, “Dere Allah bajamkai fiaknak,” emes atakam aesimtetertas, are, era koman turu apok aemtas, are potet amba atutumememas. Are Allah bajamkai pakam, ere bambi paknak.

²⁷Owe, pak, era asan pota aemememas barme jiiam, tano tapesam, afaafetamtas, wanam are era aemansa tapirmi pota pak bajamkai apok aemtas, ere Allah era owe ara bajamkai anakotnak aporeme.