Read Casuarina Coast Asmat YAKOBUS 2 Bible Online

YAKOBUS 2 - Casuarina Coast Asmat bible

YAKOBUS 2

¹Dejoo owe akotnak! Tare Yesus Kristus, Akotipitnak Tuhan eemnak ambesemkorommakam. Erarawa tare wan owe asan akot baem, wanam wan owe asan pota baem, emes bas.

²Owe jamnuk tasamayen tame ajiiemtemamis apeno. Me wan ipit emes cincin abanefe aemomemtem. Me apakaianam, ere akotnak ajiimomemtem. Me wan ipit ere, apakaian fakanak.

³Tare era pakaian akotnak aptam ipit asitimemakam apeno. Tare atakamam, “Wore era akotnak asan aemapey,” emes atakam aesimemakam apeno. Tararawa, atakam era pakaian faka aptam ipit, “Wore ara asan aememey,” emes atakam aesimemakam apaye, “Wore debaipu andaeapey,” emes atakam aesimemakam apaye,

⁴ere tare wan ipit tamen ambarefirimemomemakam. Tare, owe akot apaye, pota apaye, emes atakam basakamtii owe aemememakam. Me, tare bimak binip pota owe.

⁵Dejoo owe akotnak! Tanom ara atakam jane pajiay. Allah era pak apok owe eemnak Ara bamesemkorom aereremartaaem. Are era owe, aobaomep owe baemem aereremartaae. Are Armat Ipit afaimemas owe, aowe baemem, ataaji aee.

⁶Tare ere, era pak apok owe bifane afeomemakam. Me, era bai aepirememan owe tanam? Me jaos pak atakam basakamtii owe bipu atatapimtaaeman owe tanam? Emesare, ere era pak daytu owe are.

⁷Yesus Kristus tara aemomemman. Era pak daytu owe ere, Armat Ipit juas akot tame atakam akoremas.

⁸Me, era daytu basakamtam atakamam, “Wore wodamo afaimmarem. Wonom era wan asamot owe emes afaimmarem tamen afaimomey.” Alkitab emes atakam aeapoma. Tare era basakamtam atakam ji aetakam, ere akot pak aemmakam.

⁹Tare ere, wan owe afaimtakam, wanam wan owe bifane afeomemtakam, ere dosa aemmakam. Allaham, “Emesare, tare deBasakamtam Atakam baoo owe aememmakam,” emes atakam aesimteman.

¹⁰Owe era basakamtam atakam tanane ji aees apaye, me basakamtam atakam takakope aooes apaye, are ara basakamtam atakam takes baoonak aemes.

¹¹Allaham, “Tani tamane bajamdamat bas.” Emes atakam aesimen. Me Armat Ipitam, “Owe tatiitakam.” Emes atakam aesimen. Tare tani tamane bajamdamat apok aemmakam apaye, me, tare owe atatiimakam apaye, ere tare basakamtam atakam baoo owe erare.

¹²Me Allah Basakamtam Atakam, tara asurumtamman emes tamen are. Armat Ipitam, era aemmakam pak era atakam jipu apaye, era basakamtam atakam jipu apok apaye, emes atakam asakamtiitem. Emesare, ara akoremakam atakamam, era aemmakam pakam, turuar.

¹³Era jaos pak atakam basakamtii ipit, owe soro bajiomem apok owe, soro bajiomem apok aemum. Dare ere, owe soro ajiomemtam, dare era jaos pak basakamtii atakam, ombare apok aememtemarom.

¹⁴Dejoo owe akotnak! Owe atakam akoretetertas, “Dere Yesus eemnak ambesemkorommin,” emes atakam aesimtetertas, me, era owe akot pak jipu baem apok aemtas, era owe Yesus eemnak bamesemkorom owe apok. Allaham emes bamesem atakam owe, bajortaer apok aemtem.

¹⁵Me wan Yesus bajamkai owe pakaian apok aememmas apaye, amosto aememmas apaye,

¹⁶wanam owe atakam akoretas, “Asan akot aesosay. Damo jufuam baemap bas. Jakam atukuapay,” emes atakam aesimtas, me, are era owe pak batetam apok aemtas, aatakam bambinak atakam.

¹⁷Owe atakam akoretetertas, “Dere Yesus eemnak ambesemkorommin,” emes atakam aesimtetertas, wanam are akot pak jipu baem apok aemtas, era owe Yesus bamesem apok.

¹⁸Wan owe ere, emes atakam akoremas apeno: “Wan owe Yesus ambesemmas. Wan owe ere, akot pak jipu aemmas.” Emes atakam aesimemas apeno. Me, wore Yesus bamesem, wanam akot pak baem apok, emes baporomtaman. Erarawa wore emes baemeem asan apok. Dere ere, era akot aemmin pak, dere Yesus eemnak bamesemkorom ipit, emes wora aporomtamtemin.

¹⁹Wore, “Allah takanak,” emes atakam eemnak ambesemkorommarem. Emes akotnak. Me, era bii takesam emes atakam eemnak ambesemkorommas. Ararawa, ombare damo ditamen andimas.

²⁰Emesare, wore bimak binip apok. Oweam, “Dere Yesus ambesemmin,” emes atakam aesimtas, wanam are akot pak baem apok aemtas, era bamesem ere bambinak erare. Wore emes atakam jane bajiekorom akot ape?

²¹Me darerokor Abraham aeme pak, bimak binip atetaramay. Armat ipit, andep Ishak, era joo oup, Allah Jis bajaatam, aememen. Allah era aeme pak apore, wanam, “Abraham, turunak Ipit,” emes atakam asakamtiien.

²²Me Abraham ere, Allah bamesem taka apok. Anom Allah atakam ji aeen. Era aeme pak, are Allah eemnak ambesemkorome aporomtamen. Wonom emes apormarem apeno.

²³Emesare, Alkitabam, “Abraham, Allah eemnak ambesemkoromen. Erarawa Allah, armat ipit turunak ipit, emes atakam asakamtiien.” Emes atakam aeapoma. Me Abraham aeme pak, Alkitab atakam jipu. Allaham, “Abraham, ere dejoo ipit,” emes atakam aesimen.

²⁴Owe Allah eemnak bamesemkorom taka, wanam akot pak jipu baem apok aemtas, Allah era owe, turunak owe, emes atakam basakamtii apok aemtem. Me, owe Allah eemnak ambesemkoromtas, wanam akot pak aemtas, Allah era owe, turunak owe, emes atakam asakamtiitem. Tanom emes apormakam.

²⁵Me Rahab aeme pakam bimak binip atetaramay. Bonak ere, are jasipar taot aemapen. Me, are akot pak jipu aeme, wanam Allah, are turunak taot, emes atakam asakamtiien. Era taot, Israel owe kota Yeriko owe tanane apaye, janderes apaye, fiak apaye, kumiti apaye bapor owe, atame atoomjiien. Ararawa, era owe wan bokotpu aesomasen. (Era jokoman owe, era owe batatii-ombar.)

²⁶Era anakot ipit ajisto, era asamot ipit ere dambir are. Oweam Allah ambesemtas, wanam akot pak jipu baem apok aemtas, ere era owe Allah eemnak bamesemkorom apok. Me era bamesem atakam dambir emes tamen are.