Read Casuarina Coast Asmat YAKOBUS 5 Bible Online

YAKOBUS 5 - Casuarina Coast Asmat bible

YAKOBUS 5

¹Baporay! Tare wan owe, ere pak daytinak aemompakam. Me, asep bare tare asan potanak aemaptemakam. Erarawa jak pota aemapay. Bateam ambatay.

²Me tapak, ere ofa ememanse. Era woset tapakaian jafa emefifimes.

³Me ta emas uangam, ta perak uangam, asa daytu emejoapes. Era asa, tare era uang, sai akot basaietam apok aporomtamtem. Era asa, jisimak tamen, tadamo dasa ambomtiikoromtem emes tamen are. Emesare, dare era asepnak bare aemapmarom are. Tare ere, pak daytinak sesey aeaarukum.

⁴Tanom takebun karai baetam owe gaji batetam apok aemaarukum. Era owerawa, atakam afaketaamas. Era fiaknak Tuhanam, aatakam jane emejie.

⁵Tare ara aemansa tapirmi akot pak aemomaarukum. Tanom tajak basenomem pak, paknam daytu aemaarukum. Tare owe eto bino ajiemaarukum. Allah ere, tare atatiiteman.

⁶Tanom pota pak baem apok owe atakam akorekem, “Era owe, owe jaos,” emes atakam aesimekem. Tanom era owe atatiiekem. Era owe ere, biti tara bajie apok.

⁷Dejoo owe akotnak! Me Tuhan aondaeto bare ajiire, jak jirao aememay. Tanom era pak akene ajapomemas owe, bimak binip atetaramay. Are era akot eek bakomtaer bare, banamek jak jirao apememas. Are era ta bwi, banamek jak jirao, apememas. Are era te bwi bakari, banamek jak jirao, apememas.

⁸Me Tuhan aondaeto bare, ere setep. Erarawa tanom banamek jak jirao apemay. Jak fiakam aememay.

⁹Dejoo owe akotnak! Tanom tarmamon jirpu bajampuupumamem bas. Tuhan tare pota pak aemmakam, emes atakam basakamtii-ombar. Emesare, Pota Pak Atakam Basakamtii Ipit setep.

¹⁰Tare Allah atakam bakoretam owe aemes pak jipu aemay. Are Tuhan atakam akoretamesen. Are jak jirao aptam ajirisemesen.

¹¹Baporay! Wan owe ajirisemes, are emes ajakajiremes. Danom era owe, “asan akot owe,” emes atakam aesimemarom. Tanom atakam jane emejiekem, Ayub era ajiriseme pak damon, emes ajakajiremen. Asep arawa, Tuhan, asan akot, armat ipit aemomen. Emesare, Tuhan, seekot baoorpor Ipit. Are owe bafaim Ipit.

¹²Dejoo owe akotnak! Ataaji fiaknak aetakam, tanom, “Dere era ataaji aemin pak jipu aememin. Pote apoknak. Allah banamek taiema,” emes bajie bas. Tanom, “Dere era ataaji aemin pak jipu aememin. Pote apoknak. Era Surga oup tapirmi asinta,” emes bajie bas. Wanam, “Dere era ataaji aemin pak jipu aememin. Pote apoknak. Ara tapirmi asinta,” emes bajie bas. Me, ataaji aetakam, tare, “Ijee,” emes taka ajiay. Wanam, “Apok,” emes taka ajiay. Allah, “Tare dosa atakam akoremakam,” emes atakam basakamtii-ombar.

¹³Me tare wan owe asan pota aemapmakam apaye, era owe atakam Allah bajanimtas. Me tare wan owe jak akot aemapmakam apaye, era owe Allah tere baeom so baetas.

¹⁴Me tare wan owe damo aemamesmakam apaye, era owe Yesus basitim bajarisiap armat baemem owe bajatetas. Ararawa era damo pota owe atakam Allah bajanimtamtas. Are Tuhan juas bajietaertas, wanam minyak era owe damo bajaramapomtas.

¹⁵Era atakam bajanim owe Tuhan eemnak ambesemkoromtas, era eemnak bamesemkorom bajanim atakam, era damo pota owe ajaoromtem. Emesare, Tuhan era owe ajaoromtaertem. Era oweam dosa aemes apaye, Tuhan era dosa bimak binip ajanimemtamtem.

¹⁶Emesare, tadosa atakam tamba afafasimay. Tanom atakam Allah tarmamon ajamjanimay. Ere tare damo baoromtam are. Turu owe atakam Allah ajanimtas, Allah daytinak pak aemtamtem.

¹⁷Emesare, Elia, asamot ipit, dare awar. Are Allah te bataendaem bas, emes atakam ajanimen. Emesare, tahun bamintep, wanam pir poman ban taka bokaim, te bandae apoknak aemen.

¹⁸Ararawa, atakam Allah aojanimen. Era terawa, andaen. Tapirmirawa pak akene aojitesen wanam eek pii ambweteteresen.

¹⁹Dejoo owe akotnak! Me tare wan owe era atakamnak bajamkai ambompimtas, wanam Allah bomesem apok aemtas,

²⁰me, owe, era dosa owe, ara atakamnakpu bimin awaimapomtamtas, are akot pak era owe aemmas. Are era owe danais baemap-ombar pak aemmas. Are Allah era owe dosa tanane bimak binip bajanimemtam, emes aemmas. Tanom emes atakam binip ajanimomay.