Read Casuarina Coast Asmat 1 PETRUS 1 Bible Online

1 PETRUS 1 - Casuarina Coast Asmat bible

1 PETRUS 1

¹Dere Petrus. Dere Yesus Kristus atakam bakoretam bamirimemom ipit. Tararawa, Allah aereremartaaen owe tarare. Tanom kaaowe tapirmi tanane apawuosekem. Tare wan, Pontus tapirmi aemapmakam. Wan ere, Galatia tapirmiam, Kapadokia tapirmiam, Asia tapirmiam, Bitinia tapirmiam, aemapmakam. Era tapirmi ere, tatapirminak apok.

²Daritipit Allah amsam takes. Ararawa Allah Jip, tare turunak owe baemapom, emes aereremartaaen. Armat Ipit, tare Yesus Kristus atakam ji baee owe baemem, emes aereremartaaen. Are Yesus Kristus aesee tadosa baeoosom aereremartaaen. Emesare, Allah, asan akotnak tara baemtan. Are ji baem jak tara batetamtan.

³Yesus Kristus daTuhan. Allaham Aritipit. Danom terima kasih atakam Allah akoromamo. Emesare, Armat Ipit soro daytu ajiomero. Ararawa ai jiine dara atetamteterero. Ere Yesus Kristus ajaoromwasumtume are. Dare Allah aemtamero pak apormarom. Erarawa dare Armat Ipit jiireynak aeemarom.

⁴Erarawa dare Allah atetamtaro pak batoomem, jak aseseromemarom. Armat Ipit era atetamtaro pak Surga oup sesey aetammaro. Era asan ere, era pak ofa baem apok aemtem. Anom pano apok aemtem. Anom paytu baemem apok aemtem.

⁵Era pak takes, ere tapak. Ere anom Armat Ipit jiirey taka aeemakam are. Allah fiaknak. Erarawa Are banamek tara ataiomeman. Are tajiinenak era asan tabantem ataapome. Era asepnak barerawa, Are tara aporomtamteman.

⁶Emesare, tare jak akot aememay. Waa ere, tare era bajiris pak kupis, karokope emes ajirisemmakam apeno.

⁷Era ajirisemmakam pak, tare Allah eemnak bamesemkorom apaye, emes baempor are. Era pak emas emes tamen are. Era emas jiine pak apok. Owe, era emas, jisimak ataapomemas. Ere era emas bomon pano pak bajaaosom are. Me, tare Allah eemnak ambesemkorommakam ere, akotnak. Emas ere, pota tamen. Allah tare eemnak Ara bamesemkorom apaye aemporman. Yesus Kristus baso ajisemtorawa, Allah tare eemnak Ara bamesemkorom aporto, Are tara atemtemteman. Are tere tara aeomteman. Are tara asitimteman.

⁸Tare Yesus Kristus bi bapor apok aemaarukum. Me, tare Armat Ipit afaimmakam. Tanom waa Armat Ipit bi bapor apok. Me, tare Armat Ipit eemnak ambesemkorommakam. Tare Armat Ipit eemnak ambesemkorommakam, ere tara bajortaer are. Erarawa tare jak akotnak aememmakam. Tanom tajak akotnak pak, atakam basonak baemekorekorom asan apok.

¹⁰Bonaknak ere, Allah atakam bakoretam owe, Allah asamot owe bajortaer atakam, aoorporkoromesen. Are era atakam ajateporkoromesen. Are Allah, tara aemtan asan akot, atakam akoretamesen.

¹¹Kristus Jipam ara owe jak bomon aemapen. Are, Kristus ajirisemto pakam, era asan akotnak aoememto pakam, emes atakam ara owe akoromen. Emesare, era owe, Allah, era asamot owe asan akot aemto pak bare, ajateporesen. Are Allah era pak baem wama tamenem, emes ajateporesen.

¹²Allaham atakam ara atakam bakoretam owe akoromen. “Ara akoremakam atakam, taatakam apok. Tare era atakam era asep owe atakam akoretammakam.” Emes atakam aesimen. Allaham aJip Surga oup aetaendaeme. Me Allah Jip arawa, afiak pak Yesus Kristus Akot Atakam bakoretam owe atetame. Era owerawa, era atakam tara akoretamen. Emesare, malaikat owe takesam era atakam jane bajiekorom, emes jak aseseromemas.

¹³Emesare, tanom bimak binip fiaka. Tanom bimak binip basoa. Me Yesus Kristus baso ajisemto, Allah asan akot tara aemteman. Emesare, era asan akot pak bataet jiireynak aeekoromay.

¹⁴Bonaknak ere, tare janda aememaarukum. Tanom pota pak baem jak asenomaarukum. Waa ere, tare Allah arereis. Emesare, tare era pak jipu boem bas. Tanom aatakam ji aeekoromay.

¹⁵Me tara ajaten Ipit, ere turunak Ipit. Emesare, tanom turunak owe aememkoromay.

¹⁶Alkitabam. “Dere turunak. Emesare, tanom turunak owe aememay.” Allah emes atakam aesima.

¹⁷Tare atakam Allah ajanimmakam, tare, “Dot!” Emes atakam aesimemakam. Armat Ipit ere, owe takes era aemteteremas pak, dosa apaye, dosa apok apaye, emes atakam asakamtiim. Era asakamtiimar atakam, ere jaos apok. Emesare, tare ara aemansa tarpimi aemapmakam bare takes, Armat Ipit asitimaaray.

¹⁸Tare tarfais bambi pak tai ataatekem. Allah ere, tare era pak baem asurumtamen. Armat Ipit tara asurumtamen ere, Are perak apaye, emas apaye, emes pak batetam apok. Era pak, ere jiine pak apok.

¹⁹Me, Armat Ipit ere, Kristus akotnak esee tare era pak basurumtam, atetame. Kristus ere, pano apokam, pota pak aptam apokam, emes domba jii tamen aememe.

²⁰Bonaknak, Allah ara tapirmi bakenemapom apok aeme, Armat Ipit, Kristus era pak baem aeremtaeren. Waa ju aemapmarom, era asepnak bare asisimara. Allaham ara asepnak bare, Kristus, asan akot tara baem, baso ajatememome.

²¹Kristus Tanom aeme pak apormakam. Tararawa Allah eemnak ambesemkorommakam. Armat Ipit Kristus ajaoromwasumtume. Are Kristus atemteme. Emesare tare Allah eemnak ambesemkorommakam. Tanom Allah jiirey aeemakam.

²²Emesare, tare era atakamnak ji aeekem. Tararawa ai ajaoremekem. Tanom bafaimnak ajamfaimammakam. Emesare, tanom tajak bomon, bafaimnak ajamfaimamkoromay.

²³Tare bare jamnuk ajisamsekem. Taritipitam, dambir batem ipit apok. Armat Ipit ere, jiine Ipit. Me Allah atakamam jiine atakam. Era atakam emes baemamsaar. Erarawa, Allah atakam akore, wanam tare bare jamnuk ajisamsekem.

²⁴Alkitabam: “Asamot owe takes, ere takapin emes tamen are. Asamot owe aakot pakam takapin taae emes tamen are. Ara takapin sa asapem. Ataeam akondaeem.

²⁵Me, Tuhan Atakam ere, emes baemansaar.” Emes atakam aeapoma. Era atakam, ere Allah Akot Atakam. Oweam era atakam tara akoretamen.