Read Casuarina Coast Asmat 1 PETRUS 2 Bible Online

1 PETRUS 2 - Casuarina Coast Asmat bible

1 PETRUS 2

¹Emesare, tare era asan pota pak takes ajiiosomkoromay: ere pote atakam takesam, era pir aemakam pak takesam, era itim akeommakam pak takesam, era tame atakam akoremakam kupis takesam, ajiiosomkoromay.

²Japen ajisipetiimas jii, aooto aemansemas. Tanom era jii tamen aememay. Tare Tuhan atetammar atet apoknak aoo, ere Allah atakam aooto tamen aememay. Erarawa tare era bajorem pak sira awotemkoromtemakam.

³Ere era Alkitab atakam jipu: “Tare Tuhan asan akot Ipit aporekem,” emes atakam aeapoma.

⁴Emesare, tanom Armat Ipitpu ambaromay. Armat Ipit, jiine aptam eka emes tamen are. Owe Armat Ipit akoromosomes. Me, Allah, Armat Ipit aeremtaere. Are Armat Ipit akotnak apore.

⁵Tanom jiine eka tamena. Erarawa Tuhanpu ambaromay. Allah Jip, tare tame eka tamen bataato. Ararawa, Allah tame tamen baeapomto. Era tame bomon, tare, Allah Tame pak baem turunak owe, emes karai aeemakam. Tararawa, turunak pak Allah ataetiitammakam emes tamen are. Tanom Allah akot apormar pak Armat Ipit atetammakam. Me Allah Jip, era pak, Allah batetam, emes bimak binip tara atetamteman.

⁶Emesare, Alkitabam: “Dere akotnak eka aeremtaero. Dere era eka Sion ataapommin. Era eka, ere tame eka anakotnak. Ara eka eemnak ambesemkoromtas owe, damke bakem apok aemtemas.” Emes atakam aeapoma.

⁷Ara eka eemnak ambesemkorommakam owe, eka akotnak apormakam. Ara eka eemnak bamesemkorom apok owe ere, Alkitab atakam jipu arare: “Tame baeapom owe, ara eka taka pota apores, wanam ara eka aeremtiies. Ara eka ere, tame eka anakotnak aemanse.” Emes atakam aeapoma.

⁸Alkitabam: “Owe baimbi ara eka awotepimtemas. Are ekakor, owe andaebumtiitem.” Emes atakam aeapoma. Era owe Allah atakam ji bae apok aemes. Erarawa are baimbi awotepimemes. Allaham ara owe emes baem ataemome.

⁹Me, tararawa, Allah aeremtaere saman. Tare raja Ipit aowe, aTame pak baem owe. Tare Allah karai baetam saman. Tare Allah aowe. Allah, tare era aemmar akotnak pak, emes atakam bakoretam, aereremartaaen. Anom tare era jiiti pak beken bajios, wanam asarenak bajii, ajaten.

¹⁰Bonaknak ere, tare Allah aowe apok aemapaarukum. Waa ere, tare aowe. Bonaknak ere, Allah soro tara bajiomem, emes atakam bapor apok aemaarukum. Waa ere, Allah soro tara ajiomman.

¹¹Dejoo owe akotnak! Ara aemansa tapirmi ere, tare kaaowe aememmakam. Tare ara aemansa tapirmi emes baemapaar apok. Derarawa ataane fiak tara aoweommin. Tare asamot jak basenomem pak beak sos asotamay. Me asamot jak basenomem pak, Yesus Kristus bajamkai jak, batir ajamtamamemas.

¹²Tare era Tuhan amsam apok owe bipu aemmakam pak, akot pak jipu aemay. Erarawa, era owe, tare owe jaos atakam akoretas, are era akot aememakam pak aportemas. Asep bare Allah aondaeto, era owe tere Allah aeomtemas.

¹³Tanom ara pemerintah owe takes atakam ji aeay. Tuhan emes akot ajim. Tare rajaam atakam ji aeay. Are daytinak pemerintah ipit.

¹⁴Tanom gubernur oweam atakam ji aeay. Era raja, ara gubernur owe, ara pota pak baem owe bajurusum ataemum. Anom ara gubernur owe, akot pak baem owe baemetemtem, ataemum.

¹⁵Tare akot pak aemtakam, tanom era janda owe akoretas atakam, atakam apok aemapomtemakam. Emesare, Allah emes akot ajim.

¹⁶Tare Musa Basakamtam Atakam damon boemap apok. Me, “Dare Musa Basakamtam Atakam damon boemap apok. Erarawa dare pota pak baem akot,” emes pir bae atakam bas. Tare ere, Allah bambi karai baetam owe aememay.

¹⁷Tanom owe takes atakam akot akoromay. Me Yesus bajamkai owe afaimamay. Allah ombare ambaray. Ara raja, akot atakam akoreay.

¹⁸Ara aemapakam karai baetam owee! Takarai armat owe, atakam ji aeay. Akot atakam era owe akoromay. Me wan karai armat owe akotnak. Are owe afaimemas owe arare. Tare ere, atakam ji bae, ara owe taka bas. Era jaos karai armat oweam atakam ji aeay.

¹⁹Wan owe, era pota pak baem apok owe ajurusummas apeno. Me, era ajirisemtakam owe, “Era ajirisemmin pak, Allah akot apormar pak jipu arare,” emes bimak binip atetaramtetertakam, wanam jak fiak aememtetertakam, ere Allah asan akot tara aemteman.

²⁰Tare pota pak aemtakam, wanam owe wusup tara atetan, tararawa, era wusup jak fiak aememtakam, ere, owe tara baemetemtem apok aemteman. Me, tare akot pak aemtakam, wanam owe tara ajurusumtan, tararawa jak fiak aememtakam, ere, Allah asan akot tara aemteman.

²¹Allah tare emes baem ajaten. Emesare, Kristus, asan akot tara batetam, emes ajiriseme. Era pak, tare Armat Ipit aeme pak jipu batawejom are. Tararawa era aeme pak jipu atawejomay.

²²Armat Ipit dosa baem apok. Are pote atakam apoknak.

²³Owe tame atakam Armat Ipit akoromes. Armat Ipit ere, tame atakam ara owe bokorom apok aeme. Are ajiriseme ere, Are jokoman atakam apok. Armat Ipit ere, jiirey era dosa atakam basakamtii Turunak Ipit taka aee.

²⁴Kristus, dadosa, adamo bomon, ara salib wus oup atoomtemete. Era aeme pak, ere dare dosa afiak pak basurumtam are. Era pak dare dosa dambir atemom emes tamen are. Era aeme pakam, dare Allah akot apormar pak jipu baem are. Owe, Armat Ipit damo daso tanane atames. Era daso tanane ere, tara bajaoromtaer are.

²⁵Tare, bokot janda domba tamen aememaarukum. Me, tare tabanamek bataiomem ipitpu aofasimemomen. Armat Ipitam tadamo anakot bajuum Ipit arare.