Read Casuarina Coast Asmat 1 PETRUS 5 Bible Online

1 PETRUS 5 - Casuarina Coast Asmat bible

1 PETRUS 5

¹Me wan aemapakam owe, Yesus basitim bajarisiap armat baemem owe aemapakam. Denom era ipit ara aemapey. Dere Kristus ajiriseme pak aporo. Allah, Kristus aakotipitnak aememe pak asamot owe aporomtamto, denom aakotipitnak pak ajamtaettemin. Emesare, dere ataane fiak tara aowemin.

²Me taasan aemapmas Allah bajamkai owe, banamek ataiomay. Tare era owe banamek bataiomem, jak akot aememay. Era pak baem, jak pota bas. Emes baem, Allah akot apormar pak jipu arare. Era owe banamek ataimakam, pak bataet jak basenomem bas. Me, era owe bajanitomat, jak aseseremay.

³Allah, era owe banamek bataitam, tara atetamen. Tararawa, era owe atakam basakamtam daytu bas. Tare ere, era owe, tare Kristus bajamkainak aporomtamay.

⁴Era Banamek Batai Anakot Ipit andaeto, ere Are akotipitnak pak tara atetamteman. Era akotipitnak pak emes aememaartem.

⁵Ara aemapakam ai owe, duturu owe atakam ji aeay. Tarmamon, “Dere akot. Me wan owe pota,” emes bajamjiamat bas. Emesare, Alkitabam, “Allah era amba aemetemtememas owe bifane afeomum. Me, Armat Ipit asan akot era amba baemetemtem apok owe, aemum.” Alkitab emes atakam aeapoma.

⁶Allah fiak ipit. Tanom Armat Ipit ban ten are. Erarawa tanom tamba baemetemtem apok owe aememaaray. Armat Ipit arawa, asan akot aporto, Are tare oup atemetetaemomteman.

⁷Allah tara ajuumman. Erarawa tajak pota aemapmakam pak takes, Armat Ipit aotasimtiitamay.

⁸Tanom turuar! Banamek fiakar! Bii Kapar Ipit tajokoman ipit. Are aosaijarem. Are singa afafasiejaremar tamen aemum. Anom asamot owe danais baemtii andimarjaremar tamen are.

⁹Tare ere, Kristus eemnak ambesemkoromay. Tanom Bii Kapar Ipit awasiomitay. Era samaniin samaniin tare Kristus takan ambesemmas owe, era ajirisemmakam pak tamen, ajirisememas. Tare emes tamsam.

¹⁰Allah dare daytinak afaimmaro. Me aakotipitnak pakam jiine pak. Are tare Yesus Kristus ajamkaiekem apore. Erarawa Allah, tare era akotipitnak pak baemomem ajaten. Emesare, tare jirao apok emes, ajirisemtakam, Armat Ipit tare owe akot aojaoromtaateman. Are tare Ara bajamkaiaar, emes bimak binip tara atetamteman. Anom jak fiak tara atetamteman. Are tare Kristus jiirey baeekorom bimak binip atetamteman.

¹¹Emesare, Armat Ipit pak takes aoemomemkoromaartem. Ara atakam, ere atakamnak

¹²Silwanusam ara surat kope takan aeapomamum. Armat Ipitam dajoo ipit turunak apormin. Emesare, ara surat aeapommin ere, dere ataane tara aoweemmin. Denom atakam tara akorommin, “Ara aemansa atakam, Allah atetammar asan akot atakamnak.” Emes atakam aesimmin. Erarawa ara atakam ban fiak aosomomay.

¹³Me kota Babilon aemapmas Kristus basitim bajarisiap owe, selamat atakam akoromman. Allaham era owe aereremartaae. Detii Markusam selamat atakam akoromman.

¹⁴Bimnuk tarmamon aemamtaertakam, batir ajamjipiramay. Allaham ji baem jak tare Kristus ajamkaimakam owe batetamtan.