Read Casuarina Coast Asmat 2 PETRUS 1 Bible Online

2 PETRUS 1 - Casuarina Coast Asmat bible

2 PETRUS 1

¹Dere Simon Petrus. Dere Yesus Kristus bambi karai baetam ipit. Denom Yesus Kristus atakam bakoretam bamirimemom ipit. Taraye deraye Yesus Kristus eemnak ambesemkorommarom. Me Yesus Kristus dara Bajortaer Ipit. Anom Allah. Are turunak Ipit. Erarawa Are Ara bamesem jak dara atetamero.

²Tare Allaham, Yesus daTuhanam, tamsamnak aememaartakam, Allah, asan akotnak tara aemtamaarteman. Are ji baem jak tara atetamaarteman.

³Allah dare aakotipitnak aememe pakam, aturunak aememe pakam, emes batoomem ajateteterero. Dare Armat Ipit damsamnak aememaartam, danom owe turunak aememaartemarom. Armat Ipit, ere fiak. Are dare owe turunak baemem, emes fiak pak takes atetamteterero.

⁴Emesare, Are era daytinak ataaji aeetamero pakam, era akotnak ataaji aeetamero pakam, atetamteterero. Dare era pak atoomemtetertam, danom Allah aememe jak tamen atoomemtetertemarom. Armat Ipitam dare ara aemansa tapirmi jak basenomem pota pak jipu baem, asurumtartetertemarom.

⁵Emesare, tare Kristus eemnak ambesemkorommakam. Me, tare era taka bas. Tanom wan pak baem, jak baseseromemam daytua. Tanom owe akot aememporay. Tare ere, tamsam daytu aememporay.

⁶Tare ere, jak fiak aememporay. Tare ere, jak jirao aememporay. Tare ere, owe turunak aememporay.

⁷Tare ere, tajoo owe afaimamporay. Tare ere, owe takesam afaimamporay.

⁸Emesare, tare era pak takes aemtakam, wanam era pak betema betema ajitakam, tanom Yesus Kristus daTuhan tamsamnak aememtemakam. Tanom Armat Ipit karai akotnak aetamtemakam.

⁹Me, era pak baem apok owe ere, banamek jiisi owe tamen are. Are banamek kapie owe tamen are. Allah era owe aemes dosa emekokomosome. Era owe ere, emes bimak binip ajanimemes.

¹⁰Dejoo owe akot! Allah tara ajateteteren. Are tara aereremartaateteren. Tare ere, aatakam ji aememporkoromay. Emes aemtakam, tare Armat Ipit bajamkai bamompim apok aemtemakam.

¹¹Erarawa, Allah, Yesus Kristus daTuhan, Aobaomep Tapirmi akotnak tara atoomjiiteman. Era tapirmi, ere jiinenak Yesus Aobaomep Tapirmi. Me Yesus Kristusam dara Bajortaer Ipit.

¹²Tare era pak tamsam. Tanom ara jane ajimakam atakamnak, bajamkai fiak aemakam. Me, dere era pak bimak binip tara bajanimomemtamaar aemtemin. Era atakam anakot atakam apormin.

¹³Era dambir atemtey ajiire, dere era pak bimak binip tara bajanimomemtamaar akot apormin.

¹⁴Era dambir atemtey bare, ere setepkope apormin. Ere Yesus Kristus daTuhan dera aesimtamen atakam jipu arare.

¹⁵Dere dambir atemtey ere, tare ara atakam bimak binip bajanimomaar akot. Emesare, dere ara atakam surat baeapom, jati daytinak aemin.

¹⁶Emesare, Yesus Kristus daTuhan, fiak pak aptam andae. Dare era pak atakam tara akoromom, dare pote bambi baporomtaer atakam apok. Dare ere, Armat Ipit aakotipitnak aememe pak aptam, dare aporom.

¹⁷Aritipit Allaham, Armat Ipit daytinak asitime. Are Armat Ipit aakotipitnak pak atetamen. Are atakam Allah Akotipitnak Aememe Asan aetaendaeme, “Are deTiikor arare. Dere Armat Ipit afaimmin. Denom Armat Ipit, akot ajimin,” emes atakam aesime.

¹⁸Allah era atakam ataendaeme ere, dare Yesus Kristus era akotnak fami oup takan aememom. Dare era atakam jane ajiom.

¹⁹Emesare, dare Allah atakam bakoretam owe aatakam eemnak aporkorommarom. Tanom era atakam jane bajie akota. Ara atakam, pelita, jiiti asan sare asaramtiiemar tamen are. Era sare, jo apuamsar tamen are. Ara atakam sare aemapoma— era jo baet sarenak, tajak bomon asaramtiitan bare ajiire.

²⁰Bonak ere, tanom ara atakam bimak binip tamsamnak aememay: Allah atakam bakoretam owe aeapomes atakam, Alkitab bomon asinta. Me, owe era atakam, basonak bataetiitam apa bimak binip jipu baemetoomem asan apok.

²¹Allah atakam bakoretam owe apa bimak binip jipu batoomem wanam atakam bakoretam apoknak aemes. Me, Allah Jip era owe aemomen. Erarawa are Allah atakam akoretamesen.