Read Casuarina Coast Asmat 2 PETRUS 3 Bible Online

2 PETRUS 3 - Casuarina Coast Asmat bible

2 PETRUS 3

¹Dejoo owe akot! Ara aemansa surat, tare aometemot aeapomtamo surat arare. Era surat amnuk takes aeapomo ere, dere akot bimak binip taobaporejanimomem aemporo.

²Tare Allah atakam bakoretam turunak owe, tarainak akoretames atakam, bimak binip ajanimomay. Me Yesus Kristus daTuhan, ere dara Bajortaer Ipit. Armat Ipit, owe aatakam bakoretam ambirimemome. Ara owe taowe. Ara owe, Armat Ipit basakamtam atakam, atakam aokoretames. Tanom era basakamtam atakam bimak binip ajanimomay.

³Era bonak akoremin atakam ere, era asepnak bare, asan pota jak basenomem pak jipu baemaar owe ajinaotemas. Tare emes tamsam. Era owe, ere wote tara awotomteman.

⁴Are, “Yesus bofasie ataaji aee. Era Ipit ere ete? Darisare, ere dambir etetemes. Wanam, Allah ara tapirmi akenemapome bare ajiiream, waa aemansaram, pak takes, era akenemapome pak jipu taka asinta.” Emes atakam aesimteman.

⁵Era owe ere, ara atakam janda baemem akot eraren: Tarainak Allah atakam akoren. Atakam akorerawa, ara wonamo oupam, ara tapirmiam akenemmamsen. Tapirmirawa bwi aejatiamsen. Era tapirmiam bwi waut ataresen. Asep arawa, bwi daytuam era tapirmi akupimomsen. Era tapirmi owe, ara bwi dambir atesen.

⁷Allaham atakam akoren. Ararawa, waa apormarom wonamoam, tapirmiam, danais baemtii apok aemum. Are era pak Armat Ipit era asan pota owe dosa atakam asakamtiikoromto bare ajiire, danais baemtii apok aemum. Era barerawa, Are ara wonamoam, ara tapirmiam, jisimak bamomtiikorom sesey aeapomum. Allaham era jaos owe atakam asakamtiitem wanam danais aemtiitem.

⁸Dejoo owe akot! Ara atakam taka bimak binip bajanimem bas: Tuhan, bare taka, tahun 1.000 awar aporem. Anom tahun 1.000, bare taka awar aporem.

⁹Tuhan era ataaji aee pak baem, airum apok aemum. Wan owe abimak binip ere, Are airumen. Armat Ipit ere, jak jirao tara aememan. Are owe danais baemames potan. Are owe takes dosa bamakemkorom akoten.

¹⁰Me, Tuhan Bare, wosom ipit tamen ajinaoamestem. Era bare ere, oup wonamo ajaniostem. Anom wur tamen ajiostem. Baetam, baisam, jiisimak amboskoromtemas. Allah era pak ambomosomkoromtem. Ara tapirmiam, ara tapirmi pak takesam, ajaniostemas.

¹¹Allah, era pak takes ambomosomkoromtem. Dare emes apormarom. Emesare, tare wama owe ememtakam? Tare turunak owe aememay. Tanom tadamo anakot aptam, Allah atetamay—

¹²tare Allah Bare aemamesto banamek apemmakam. Tanom era bare fef baemames aemtampormakam. Era bare, era wonamo oup, jisimak ambomtiikoromtem. Era baetam, era baisam, ambapnak awotepemtem. Erarawa are bwi taka ajaorestem.

¹³Me, Allah ere, ai wonamoam, ai tapirmiam, bakenemtii ataaji aee. Turunak oweam era asan aemapaartemas. Dare era pak banamek apemmarom.

¹⁴Dejoo owe akot! Tare era bare baemames banamek apemmakam ere, pota apoknak owe aememporkoromay. Turunak owe aememporkoromay. Tanom Allah ajamfaimamporkoromay.

¹⁵Me daTuhan jak jirao aememe. Era pak, owe bajorem asan akot pak. Tare emes bimak binip ajanimomay. Allah, dajoo ipit akot juas Paulus, bimak binip baso atetame. Me Paulus arawa, emes atakamam surat tara aeapomtamen.

¹⁶Armat ipitam emes atakam taka asurat takes aeapome. Me wan aeapome atakam, ere bomonnak are. Era janda oweam, era bajamkai fiak apok oweam, atakam jane bambi ajimas. Wanam apa atakam aokoremas. Erarawa era owe asan potanak amba ajirisemmas.

¹⁷Dejoo owe akot! Tare ara akoremin atakam tamsam. Erarawa, tanom turunaka! Tare ara basakamtam atakam ji bae apok owe apote aememas pak bajamkai-ombar. Tanom Yesus Kristus bajamkai fiak, bamompim-ombar.

¹⁸Yesus Kristus daTuhan, Are dara Bajortaer Ipit. Tanom era atetammar asan akot baemomem, betema betema ajiaaray. Tanom Armat Ipit aememar pak baporkorom, betema betema ajiaaray. Emesare, waa, owe Armat Ipit tere baeomkoromtas. Anom Armat Ipit tere baeomkoromaartas.