Read Casuarina Coast Asmat 1 YOHANES 3 Bible Online

1 YOHANES 3 - Casuarina Coast Asmat bible

1 YOHANES 3

¹Baporay! Allah daytinak afaimero. Erarawa Armat Ipit atakam akoromero. “Tare deJii.” Emes atakam aesimero. Emesare, dare arereis darare. Ara aemansa tapirmi owe ere, Allah amsam apok. Erarawa, era owe danom amsam apok.

²Dejoo owe akot! Dare waa Allah arereis. Era asep bare aememtam pak ere, dare baporkorom apok. Kristus ajisemto, dare Armat Ipit binak, aportemarom. Emesare, danom Armat Ipit tamen aememtemarom. Dare emes damsam.

³Emes atakam jiirey aeemas owe takes, turunak owe aememportetertemas— Kristus turunak aememmar tamen are.

⁴Dosa, ere Allah basakamtam atakam baoo pak. Erarawa dosa aememas owe, Allah basakamtam atakam aooemas.

⁵Kristus ere, dadosa bakokomosomtam ajateeme. Are dosa apok Ipit. Tare emes tamsam.

⁶Kristus takan aemapaaremas owe, dosa baemaar apok. Me, dosa aemaaremas owe, Armat Ipit bimnuk baemamtaer apoknak aemes. Are Armat Ipit amsam apok.

⁷Tiparais! Owe potet tara batutum bas. Turu pak aemaaremas owe, owe turunak aemememas. Are Kristus turunak tamen aemememas.

⁸Bii Kapar Ipit, dosa, bonaknak aeemaarir. Erarawa ara dosa aemaaremas owe, Bii Kapar Ipit aowe. Allah Andep ere, Bii Kapar Ipit aememar pak bandanaesumosomkorom ajateeme.

⁹Allah, abimak binip, arereis takes atetameme. Erarawa era owe, dosa baemeemaar asan apok. Allah era owe Aritipit. Erarawa era owe dosa baemeemaar asan apok.

¹⁰Era turu pak baemaar apok owe takes, ere Allah arereis apok. Me ajoo owe bafaim apok oweam, Allah arereis apok. Erarawa Allah arereis apa pak apormarom. Bii Kapar Ipit arereisam apa pak apormarom.

¹¹Tanom ara atakam bonaknak jane emejiaarukum. “Danom ajamfaimamaaramo.” Emes atakam jane ajiaarukum.

¹²Danom Kain aeme pak tamen bas. Are era Asan Pota Ipit aipit aememe wanam are areot amba atatiien. Me Kain ere, areot apa tatiie? Kain era aemaarir pak, ere asan pota. Me areot aemaarir pak ere, turu. Erarawa Kain areot atatiien.

¹³Dejoo owe akotnak! Emesare, ara aemansa tapirmi owe, bifane tara afeomemtan, tanom jinim bae bas.

¹⁴Dare dajoo owe afaimmarom. Erarawa dare era dambir pak beken ajiosom, wanam era jiinenak pak ajiiom, emes apormarom. Me owe bafaim apok owe ere, dambir owe tamen aemapaaremas.

¹⁵Ajoo owe bifane afeomememas owe, ere owe bata owe. Era owe bata oweam, jiinenak baememaar apok. Tare emes tamsam.

¹⁶Kristus afaimero. Erarawa Are dambir atemtamero. Dare emes apormarom, wanam bafaim paknak apormarom. Emesare, danom emes dambir owe batemtam amaye.

¹⁷Pak daytu owe, ajoo owe asan pota baemap aportas apaye, wanam are era owe seekot baoorpor apok aemtas apaye, are Allah bafaim apok.

¹⁸Tiparais! Dare owe bafaim, bwea atakam taka bas. It pitin atakam taka bas. Dare ere, pak baem amaye. Dare owe bafaimnak baem amaye.

¹⁹Dare emes aemtam apaye, dare era atakamnak ajamkaimarom apormarom. Danom Allah bipu aememtam, dare jak fiak aememtemarom.

²⁰Dare dajak bomon, dosa aportam apaye, Allaham pak takes aporkoromum, emes apormarom. Are amsam takes. Dare ere, bapor apokkope aemmarom.

²¹Dejoo owe akot! Dare dajak bomon, dosa apok aportam apaye, wanam Allah bipu aememtam, ere danom jak fiak aememtemarom.

²²Dare abasakamtam atakam ji aeetam apaye, wanam aakot pak jipu aemtam apaye, Allah era atakam ajanimtam pak takes atetamtemaro.

²³Allah atakam asakamtammaro ere, “Tare deTii eemnak ambesemkoromaaray. Tarmamon ajamfaimamaaray.” Allah emes atakam asakamtammaro.

²⁴Me Allah atakam ji aeemas owe, Armat Ipit takan aemapaaremas. Armat Ipitam era owe takan aemapaareme. Are aJip atetamteterero. Erarawa dare Allah takan aememaaremarom apormarom.