Read Casuarina Coast Asmat 1 YOHANES 5 Bible Online

1 YOHANES 5 - Casuarina Coast Asmat bible

1 YOHANES 5

¹“Yesus ere, Kristus arare,” emes atakam eemnak ambesemkoromemas owe, ere, Allah arereis arare. Aritipit afaimemas owe, arereis takesam afaimemas.

²Dare Allah afaimemarom apaye, wanam abasakamtam atakam ji aeemarom apaye, ere dare arereisam afaimemarom apormarom.

³Allah basakamtam atakam ji aemarom apaye, dare Allah afaimemarom. Allah arereisam ara aemansa tapirmi pak akumimosomaaremas. Me Allah atakam ji bae, ere wuturu pak apok. Dare, “Yesus ere, Kristus arare,” emes atakam eemnak ambesemkorommarom. Erarawa dare ara aemansa tapirmi pak akumimosommarom.

⁵Ara aemansa tapirmi pak akumimosomemas owe, ete oweem? “Yesus, Allah Andep,” emes atakam eemnak ambesemkorommas owe taka, ara aemansa tapirmi pak akumimosomemas owe erare.

⁶Emesare, Yesus Kristus andae. Andaerawa, wan ipit, Armat Ipit bwi akupimtaere. Yesus Kristusam dambir ateme. Aeseeam ajirindae. Erarawa Armat Ipit andae ere, Are bwi bakupimtaer taka apok. Aeseeam ajirindae. Emesare, Allah Jip, atakamnak Jip. Erarawa Are emes atakam ateman atame.

⁷Owe apaye, pak apaye, bamintep, Yesus Kristus aeme pak, anakot aporomtammas.

⁸Me wan taka, ere Allah Jip. Me wan takarawa, ere bwi. Me wan takarawa, ere esee. Era bamintep takes, Yesus Kristus Allah Andep, emes ateman atamtammas.

⁹Dare asamot owe ateman ajamtamamemas atakam eemnak ambesemkoromemarom. Me wan asamot ateman ere, atakamnak apok. Me, Allah ateman atammar atakam, atakamnak. Emesare, Armat Ipit Andep aeme pak, ateman atame.

¹⁰Dare wan owe, Allah Andep eemnak ambesemkorommarom. Me Allah ateman atame atakamam dajak bomon aapeta. Me Allah ateman atame atakam bamesem apok owe ere, “Allah pote ipit arare,” emes atakam aesimemas. Allah Andep aeme pak ateman atame. Era owe ere, era ateman bamesem apok aemmas.

¹¹Allaham emes ateman atakam atamero. “De jiinenak tare emetetamo. Me deTii ajamkaimas owe jiine aememaartemas.

¹²Me deTii aptam owe, ere jiinenak aptam. Me deTii aptam apok owe ere, jiinenak aptam apok.” Emes atakam aesimero.

¹³Emesare. Tare Allah Andep eemnak ambesemkorommakam owe, jiine aememaartemakam. Dere, tare emes baporkorom akot. Erarawa dere ara surat tara aeapomtammin.

¹⁴Dare, Allah dara baemtam pak atakam Armat Ipit ajanimtam, ere ajak aseseromemar pak jipu ajanimtam apaye, Are era ajanimtam atakam takes jane ajitem. Dare Armat Ipit ajanimtam atakam takes jane bajie aportam apaye, Are era ajanimtam atakam aemtamtaro apormarom. Emesare, dare Armat Ipit bipu aememtam, jak fiak aememtemarom.

¹⁶Owe, wan dosa aemtas, are dambir baem apok aemtemas. Owe, ajoo owe era dambir baem apok pak dosa baem aportas, are atakam Allah bajanimtas. Allahrawa, jiine pak era dosa owe atetamtem. Me, owe wan dosa aemtas, are dambir aemtemas. Dere ere, owe, emes dosa baem owe, atakam Allah bajanimtam, ere emes atakam apok.

¹⁷Era jaos pak takes, ere dosa. Emesare, owe wan dosa aemtas, are dambir baem apok aemtemas.

¹⁸Emesare, Allah arereis, dosa baemaar apok apormarom. Allah arereis ere, era owe tiri asiomem. Erarawa era Asan Pota Ipit, era owe baemejurusum asan apok.

¹⁹Dare Allah arereis. Danom emes apormarom. Me, era Asan Pota Ipit, ara aemansa tapirmi pak takes aemomem. Danom emes apormarom.

²⁰Emesare, Allah Andep emedae apormarom. Are bimak binip baso emetetamero. Erarawa dare Allahnak damsam. Danom Allahnak takan aemapaaremarom. Emesare, dare Andep Yesus Kristus, takan aemapaaremarom. Armat Ipit Allah anakot. Are jiinenak atetamemar Ipit arare.

²¹Tiparais! Tare juein owe takes bamesem bas. Eto takesam basitim bas.