Read Casuarina Coast Asmat YUDAS 1 Bible Online

YUDAS 1 - Casuarina Coast Asmat bible

YUDAS 1

¹Dere Yudas. Dere Yesus Kristus bambi karai baetam ipit. Denom Yakobus areot. Tare ere, Allah aowe. Armat Ipitam tare aowe baemem ataemomen. Armat Ipitam tara afaimaareman. Yesus Kristusam banamek tara ataiomaareman. Emesare, dere ara surat tara aeapomtammin.

²Allah soro daytu tara bajiomemtan. Are ji baem jak tara batetamtan. Are daytu tara bafaimtan.

³Dejoo owe akotnak! Allah, deraye taraye ajortaerero. Derarawa, era ajortaerero pak, emes atakam surat tara baeapomtam, jak aseseromemkoromo. Dere ere, tare era pote atakam baememtam owe fiak bawotapem, emes ataane baweom surat tara baeapomtam, ateetamen pak apok apormin. Danom Allah atakam eemnak ambesemkorommarom. Armat Ipitam era atakam turunak owe ataetiitame. Oweam era atakam baemejanimtii asan apok.

⁴Emesare, wan pote atakam baememtam owe, tare takan ajarisiapmas. Me, are apota pak, atakam tara bakoretam apok. Era owe, ere jaos. Are, Emesare, Allah owe bafaim Ipit. Erarawa dare asan pota pak aemtam, Are dara bajurusum apok aemtemaro. Wanam, “Yesus Kristusam, Allah apok.” Emes atakam aesimemas. Me, Yesus Kristus taka, dara aemomemmaro. DaTuhan ere, A taka ere. Emesare, bonaknak ere, Allah atakam bakoretam owe, aeapomesen. “Allah era owe ajurusumtem.” Emes atakam aesimesen.

⁵Tanom ara atakam takes tamsam. Dere ere, emes bimak binip tara bajanimomemtam, akot ajimin: Tuhan, Israel owe, Mesir tapirmi beken bajios, asan akot aemen. Are era owe ajortaeren. Me, wan Israel owe Allah bamesem apok. Erarawa asep bare, Armat Ipit era owe atajimirtiien.

⁶Bonaknakam, Allah, malaikat takes, aapak ji aeremtiitamen. Asep arawa, malaikat tanane, era pak baem potan. Are Surga oup baemap asan beken ajiosesen. Emesare, Allah, era malaikat owe, jiine rantai banam ajikitiien. Are era malaikat owe, jiiti asan akimommar. Era bare daytu aemamesto, Are era malaikat owe adosa atakam asakamtiitem.

⁷Me Sodom owe anama Gomora owe, dasman kota oweam, era malaikat owe aemes pak taka, aemesen. Are pote pak daytu aemesen. Are tani tamane ajamdamatesen. Emesare, Allah, era owe, jiine jisimak asan bomon ajurusumaareme. Emesare, Allah, dosa owe ajurusume apormarom.

⁸Era pote atakam baememtam oweam emes taka aememas. Are ise atamwitemas. Ise atamwitemas arawa, asan pota pak aememas. Are Allah atakam jane bajie apok tamen aemapemas. Are tame atakam era Surga oup akotipitnak malaikat owe atomemas.

⁹Me malaikat kapar ipit juas Mikael ere, era malaikat aemes dosa, atakam pota bokorom apoken. Are Bii Kapar Ipit atakam ajamkorames, are Musa adambir ipit atakam ajamkoramesen. Mikael ere, Bii Kapar Ipit dosa, atakam basakamtii apoken. Are Bii Kapar Ipit tame bata apoken. Are ere, “Emesare, Tuhan bajatemotaertan.” Emes atakam aesimen.

¹⁰Me era pote atakam baememtam owe ere, tame era amsam apok pak atomemas. Binatang, ere bimak binip apok. Are pak bambi aememas. Era oweam, binatang bimak binip apok pak tamen, bambi aememas. Emesare, Allah era owe era pak ajurusumtem.

¹¹Era oweam ajirisemtemas. Are Kain aeme pak tamen aemes. Bonaknakam, Bileam pak bataet jak asenomemen. Erarawa are pote atakam aememtamen. Me japen oweam emes tamen fefkope emes. Are Korah tamen, atakam aooes. Erarawa are armat ipit tamen danais aemamestemas.

¹²Emesare, tare owe bajamfaimam pakambwi pak andetakam, era pote atakam baememtam oweam tare takan andeemas. Era owerawa, asan pota pak aememas. Me, are damke apok. Amos andetasam, are paknam daytu. Erarawa era owe, pano tamen damke pak aeemas. Are jaka te apok, emes bambi pak tamen. Emesare, bui era jaka awumosomum. Era oweam wus eek bwi, eek apok wus emes bambi tamen are. Owe emes wus, bimi aptam asusumtaaemas. Era wus arawa, sanak asakoromum.

¹³Era owe, damkenak pak aememas. Erarawa are itimbup wo daytinak tamen are. Me era wo besep fasar fikin ambaimtiim. Era owe era akondaeemar baet tamen are. Are Allah ajasosoapome jiitinak asan aemapaartemas.

¹⁴Emesare, Henok, Adam wurpis. Bonaknak ere, Henok era owe aemtas pak, atakam atakam akoretamen: “Baporay! Tuhanam, aturunak malaikat owe tananenakam, takan andaetemas.

¹⁵Armat Ipit, owe takes aoorportem. Are era dosa owe jaos, era aemaaris jaos pak takes, dosa atakam asakamtiitem. Era oweam potanak atakam Tuhan akoromes. Tuhan era atakamam, dosa atakam asakamtiitem.” Emes atakam aesimen.

¹⁶Era pote atakam baememtam owe, itim atakam akoreaaremas. Are asan pota aemaptas, are owe jaos atakam akoreemas. Are apota jak asenomememas pak jipu aememas. Are amba aemetemtememas. Are, owe, bwea atakam taka ambesememas. Era bwea atakam, owe, aapak ara batetam are.

¹⁷Dejoo owe akotnak! Tare, daYesus Kristus atakam bakoretam ambirimemome owe, era bonaknak akoretames atakam, bimak binip ajanimomay.

¹⁸“Me asepnak bare aemamesto, wote tara asawuomtan owe aememtemas. Era owe apota jak asenomemtas pak jipu aemtemas.” Emes atakam aeapomes.

¹⁹Erarawa era owe, owe apatakumosomemas. Are ara aemansa tapirmi pak jipu taka aememas. Are Allah Jip aptam apok.

²⁰Dejoo owe akotnak! Tare ere, Allah atetamero atakam eemnak bamesemkorom akakaimaaray. Allah Jipam bimak binip tara atetamman. Tare era bimak binip jipu, atakam Allah ajanimay.

²¹Allah tare bafaimnak afaimman. Emesare, tanom turunak owe aememaaray. Tanom Yesus Kristus daTuhan soro tara bajiomem bare baemames, banamek apemay. Emesare, Are era bare jiinenak tara atetamteman.

²²Tanom bimak binip arke owe, soro ajiomay.

²³Tare era owe ajortaeray— owe, wan owe jisimak bomon fef bataer emes tamena. Tanom wan owe, soro ajiomay. Me, tare era dosa ombare aememay. Era owe ara aemaaris potanak pak bifane afeomay— owe sakare pakaian bifane afeomemas emes tamena.

²⁴Allah, ere akotnak. Are fiaknak. Erarawa Are tare Ara bajamkai fiak baemapom, emes fiak pak aemomem. Tare bojondae-ombar. Are tare atet apoknak owe abipu bataemom, emes fiak pak aemomem. Tararawa, jak akotnak aememtemakam.

²⁵Emesare, Allah takakor. Armat Ipit, Yesus Kristus daTuhan aeme pak apore. Erarawa Are dara ajortaerero. Owe Armat Ipit aakotipitnak pak baportas. Are Armat Ipit daytinak baportas. Are Armat Ipit owe takes atakam fiak basakamtamaar, emes baportas. Are Armat Ipit takes emes aemommar pak, emes baportas. Bonaknak ere, Armat Ipit emes aememaarir. Waaam Are emes aememem. Asep baream Are emes aememaartem. Ara atakam, ere atakamnak.