Read Casuarina Coast Asmat BAPOROMTAM ATAKAM 1 Bible Online

BAPOROMTAM ATAKAM 1 - Casuarina Coast Asmat bible

BAPOROMTAM ATAKAM 1

¹Ara surat atakam, Yesus Kristus aporomtame atakam. Emesare, Allah, abambi karai baemtam owe, fef ajinaoto pak, atakam jane bajie akoten. Erarawa Armat Ipit ara atakam Yesus Kristus aokorome. Yesus Kristus arawa, amalaikat, Yohanespu ataendaeme. Me malaikatam, Yesus Kristus aporomtame pak, atakam Yohanes aokorome.

²Me Yohanesam, era apore pak takes, atakam akore. Ara atakam Allah akore atakam are. Ara atakamam, Yesus Kristus ateman atame atakam are.

³Ara atakam, era asep bare aemamesto atakam are. Me era aemamesto bare, ere setep. Erarawa, owe ara atakam baca aetas, asan akot aemaptemas. Oweam ara buku atakam jane ajitas, wanam ara atakam ji aetas, asan akot aemaptemas.

⁴Emesare, dere Yohanes. Dere ara atakam, tare Asia tapirmi Yesus basitim ajarisiapmakam saman poman ban jamnuk owe, akorommin: Waa Allah aemeta. Bonaknakam ere, Armat Ipit aememaarir. Asep baream, Armat Ipit aememaartem. Jip poman ban jamnukam Armat Ipit raja fe baemap asanpu aememmas. Emesare, Yesus Kristus era ateman batam turunak Ipit. Armat Ipit bonaknak ajaorwasite Ipit are. Are ara aemansa tapirmi raja owe aobaomep Ipit. Emesare, Allaham, Allah Jipam, Yesus Kristusam, asan akot tara baemtan. Are ji baem jak tara batetamtan Emesare, Yesus Kristus dara afaimmaro. Are dambir atemtamero. Erarawa Are dadosa asurumtamero.

⁶Are dara aomomemkoromero, wanam Are dare Aritipit aTame pak baem owe saman ataemero. Me Aritipitam, ere Allah. Emesare, era owe, Armat Ipit akarai pak afaafetamaaremas. Yesus Kristus, Ju Armat Ipit emes bajiaartas. Are pak takes aobaomepaarto. Ara atakam, ere atakamnak.

⁷Tanom atakam jane pajiay. Armat Ipit wonamo oup wonamo bomon andaetem. Owe takesam Armat Ipit bi aportemas. Me Armat Ipit ambites oweam, Armat Ipit bi aportemas. Ara aemansa tapirmi samaniin samaniin takesam, Armat Ipit ombare ambartemas. Erarawa are bate ambattemas. Emesare, emes taka baemtas. Ara atakam, ere atakamnak.

⁸Emesare, Fiaknak Tuhan Allaham, “Dere bonaknak Ipit Derare. Denom asepnak aememtey Ipit derare. Dere waa aememey. Bonaknakam, Dere aememaaru. Asep baream aememaartemin.” Emes atakam aesimum.

⁹Dere Yohanes. Denom tajoo ipit. Deraye taraye, Yesus takan ajamkaimarom. Erarawa owe dara ajurusumemaroas. Denom, Yesus, aowe baomep, takan aemaptemarom. Armat Ipitam, jak jirao, deraye taraye atetammaro. Emesare, dere Allah atakam akoretamo. Denom Yesus ateman atame atakam aokoretamo. Erarawa, owe ban akimomenis. Are era woo juas Patmos atomasenis. Derarawa, era asan aemapaaru.

¹⁰Emesare, Hari Tuhan aemapo ere, Allah Jip, debimak binip aemomemkoromen. Denom debeakpu, atakam daytu jane ajio. Era atakam, ere fwi tamen.

¹¹Era atakamam, “Era apormarem pak, buku bomon aeapomey. Era bukurawa, Yesus basitim ajarisiapmas owe asan poman ban jamnuk, ataejirimtamey. Era asan, ere Efesus are. Simirna are. Pargamus are. Tiatira are. Sardis are. Filadelfia are. Laodikia are. Emesa.” Emes atakam jane ajio.

¹²Derarawa, era atakam dera akoromen ipit bi bapor, asep banep ajieporo. Asep banep ajiepororawa, dere emas pelita bataapom asan poman ban jamnuk aporo.

¹³Dere, era pelita bataapom asan waut, jipit taka aememe aporo. Era Ipit asamot ipit bi awar. Armat Ipit, baju jirao ajiimome. Era baju Armat Ipit bai ajiire. Armat Ipitam, emas kain, ere jamam ajikapome.

¹⁴Me akuus finiam, domba fini fasar tamen are. Era finiam salju fasarnak tamen are. Me abanamekam jisimak jee tamen ambiimiaye.

¹⁵Me abaiam, owe jisimak bomon ataapomes tembaga tamen. Me ara atakamam, bwi ajirirepue tamen.

¹⁶Armat Ipitam, baet poman ban jamnuk, abo ban atoome. Me aokoneam fero warim bande jamnuk. Me abiam, sarenak, jee tamen, aturumapome.

¹⁷Dere Armat Ipit bi aporo ere, abaipu bi fop andaejiapo. Era pak dambir aemo tamen. Armat Ipit arawa, abo ban dedamo ten ataetiien. Wanam, atakam akoromen. “Ombare bas! Dere bonaknak aememo Ipit Derare. Denom asepnak aememtey Ipit Derare.

¹⁸Denom era jatiaptam Ipit Derare. Dere dambir aemo. Me, baporey! Dere jiine aememaartemin. Denom owe batatii fiak pak aemommin. Denom dambir owe baemap asan, Armat Ipit Derare.

¹⁹Erarawa, era apormarem pak, surat aeapomey. Me waa aemmar pakam, asep bare aamsekunaoto pakam, surat aeapomey.

²⁰Emesare, wore debo ban atoommin baet poman ban jamnuk apormarem. Dere era baitam, emas pelita bataapom asan poman ban jamnukam, bomonnak atakam wora aesimtammin. Era baet poman ban jamnuk, Dera basitim ajarisiapmas owe asan poman ban jamnuk amalaikat awar. Era pelita bataapom asan poman ban jamnukrawa, Dera basitim ajarisiapmas owe asan poman ban jamnuk awar.”