Read Casuarina Coast Asmat BAPOROMTAM ATAKAM 10 Bible Online

BAPOROMTAM ATAKAM 10 - Casuarina Coast Asmat bible

BAPOROMTAM ATAKAM 10

¹Emesare, dere wan fiaknak malaikat taka, era Surga oup aendae aporo. Are wonamo fasar, pakaian tamen, ajiimome. Bakaoam akuus afojimtopome. Abiam jee apone tamen aturumdae. Akamtanam jisimak jee tamen.

²Are aban, ajaokoamse surat kope atoome. Era suratam emepapaimome. Armat Ipit era bo bai era itimbup andaesoeme, wanam era tamo bai ara tapirmi andaesoeme.

³Are atakam daytinak afaketaere— era singa afaketaeremas atakam tamen are. Atakam afaketaererawa, era wur poman ban jamnukam takan ajumes. Era ajumes pak atakamam are.

⁴Me wur poman ban jamnuk atakam akores arawa, dere era atakam surat baeapom aememo. Dere ere, Surga oup atakam jane ajio. “Era wur poman ban jamnuk akoremas atakam, atukumompey. Era atakam, surat baeapom bas.” Emes atakam aesime.

⁵Emesare, era itimbupam, tapirmiam, andaesoeme aporo malaikat, abo ban oup ajiraomtemeteme.

⁶Me malaikat, Allah era jiine baememaar Ipit ere, emes apore. Are Allah, wonamo oupam, ara tapirmiam, itimbup bwiam, era pak takesam, emes akenemapome Ipit apore. Erarawa are, Allah juas ajie, wanam ataaji fiaknak aee. “Allah, era aemto pak bokamisim apok.

⁷Me, era malaikat ketujuh afwi ajamto, Allah era bomonnak atakam asakamtiie pak aemkoromtem. Bonak ere, Are asakamtiie atakam, abambi karai baetam owe akorome. Era owe, Allah atakam bakoretam owe are.” Era malaikat emes atakam aesime.

⁸Emesare, bonak jane ajio Surga oup atakam, jane aojio. “Wonom era malaikatpu aesosey— era itimbup bwi tenam, tapirmiam, asondaemmar malaikata. Worarawa, era ban atoommar ajaokoamse surat kope ataerey. Era suratam emewawaramome.” Emes atakam aesime.

⁹Emesare, dere malaikatpu ambaremo, wanam, atakam akoromo. “Ara ajaokoamse surat kope dera tetaman.” Emes atakam aesimo. Armat Ipit ere, atakam dera akoromen. “Ara surat bataerey, wanam bandey. Ara surat arawa, wojak bomon asesa aemtem. Me, wookone bomon, ara surat embore bwi femase tamen aemtem.” Emes atakam aesime.

¹⁰Derarawa, malaikat era ban atoome surat ataero. Denom era surat ando. Era surat deokone bomon embore bwi femase tamen aeme. Me, ando ere, era surat dejak bomon asesa aeme.

¹¹Armat ipit arawa, “Allah, owe samane tanane, atakam akorem. Are tapirmi tanane oweam, taka taka atakam owe tananeam, raja owe tananeam, atakam akoremara. Emesare, wore era akoremar atakam kaaowe akoretamey.” Emes atakam aesime.