Read Casuarina Coast Asmat BAPOROMTAM ATAKAM 12 Bible Online

BAPOROMTAM ATAKAM 12 - Casuarina Coast Asmat bible

BAPOROMTAM ATAKAM 12

¹Emesare, owe, jinim bae pak daytu era wonamo oup apores. Era jinim bae pak, taot taka. Era taot apakaian, era jopaka tamen are. Are pir oup aememe. Are kuus bajamapom akot pak ajiimome. Era kuus bajamapom akot pak, ere baet 12 aptam.

²Era taotam jak asiape. Are ja ambitimape. Erarawa damo asesa ju ajasire.

³Emesare, owe, wan jinim bae pak, wonamo oup apores. Era jinim bae pak, esakam jatiaptam pak paajis ii tamen are. Are kuus poman ban jamnuk aptam. Are kuus pae ban amnuk aptam. Era kuus taka takaam kuus bajamapom akot pak ajiimomepteteres.

⁴Are aepemak apatapipime. Erarawa are wonamo oup baet sepertiga, era tapirmi akokomdaeme. Era paajis ii tamen pak era jii bapeap aemape taot bipu aememe. Are era ajisipetiito jii bafemetan aememe.

⁵Emesare, era taot jii jipit ajisipetiie. Era jii daytu aememto, are besi waku pak tamen atoomemtem, wanam era tapirmiin tapirmiin owe takes atakam asakamtamtem. Me, malaikat taka, era jii ametetopomtaere, wanam Allahpu atoomtemete. Are era jii, Allah owe baomep fe baemap asanpu atoomtemete.

⁶Emesare, era taot, ombare tame apok asan aesose— ere Allah era taot bonak akenemapomtame asan are. Era asan Allah banamek era taot batai ise 1.260 asan are.

⁷Emesare, era Surga oup, jii ajamomes. Mikaelam, amalaikat owe tananeam, era paajis ii tamen pak jii ajamomes. Era paajis ii tamen pakam, amalaikat owe tananeam, biti Mikael ajies.

⁸Me, Mikael era paajis ii tamen pak akumimosome. Era paajis ii tamen pak akumosome. Era paajis ii tamen pakam, amalaikat oweam, Surga oup boemap asan apok.

⁹Mikaelam, amalaikat owe tananeam, era paajis ii tamen pak, tasan akoromjisimes. Era paajis ii tamen pak ere, tarai amber. Are juas Bii Kapar Ipit. Wan juas ere, Setan. Are era tapirmi owe takes potet atutumemar amber arare. Emesare, araye, amalaikat takesam, era tapirmi ajiendaes.

¹⁰Emesare, dere Surga oup atakam daytu jane ajio. “Jipit taka daAllah bipu aememaarir. Era ipit jokam, eamam, dajoo owe jokoman atakam akoreaarir. Malaikat ere, era ipit ajumdaemmas. Erarawa waa ere, Allah ajii owe akumimosommar. Waaam Armat Ipit afiak pak aporomtammar. Waaam Armat Ipit owe aobaomep bare ajinaom. Waaam Allah Aeremtaere Ipit afiaknak pak takes aomepkoromum.

¹¹Me domba Jii, aesee ajirimdaeme. Oweam, era Domba Jii aeme pak, ateman atames. Erarawa owe, era owe jokoman atakam akoromaarir ipit, akumimosomemas. Era oweam dambir batem ombare apok aemememas.

¹²Surga oup pake! Surga oup owee! Tare jak akot aememay. Bap tapirmie! Emesare, asan potanak aemaptemarem. Itimbup bwie! Wonom asan potanak aemestemarem. Me Bii Kapar Ipit taasan andaem. Are bajateemem apok apormar are. Emesare, are jak ambapnak.” Emes atakam jane ajio.

¹³Emesare, era paajis ii tamen pak, Mikael, are bap tapirmi bajumdaem apore ere, are era jii jipit ajisipetiie taot afaomase.

¹⁴Allahrawa, warao daytu jaro jamnuk, era taot atetame. Ere era taot, tame apok asan bapios pak are. Era asan Allah era taot akenemapomtame asan are. Allah, tahun 3 setengah, amos era taot batetam aememe. Era asan ere, era amber era taot baemejurusum asan apok.

¹⁵Era amberam bwi daytu aokone aokomjisime. Are era bwi era taotpu aokomjisime. Era bwi, ju bwi daytinak tamen are. Era bwi, taot bwea basoromomas are.

¹⁶Me, era tapirmi era taot pi ajate. Era tapirmi okone ajake tamen are. Are era ii okone aokomjisime ju bwi andakorome.

¹⁷Emesare, era ii jak ambap daytinak era taot aemome. Ararawa, era taot awan jii, jii bajamom aesose. Me ajii ere, Allah basakamtam atakam ji aemas owe takes are. Are Yesus ateman atammas owe are.

¹⁸Era iirawa, era jupima aememe.