Read Casuarina Coast Asmat BAPOROMTAM ATAKAM 13 Bible Online

BAPOROMTAM ATAKAM 13 - Casuarina Coast Asmat bible

BAPOROMTAM ATAKAM 13

¹Emesare, dere binatang taka era itimbup bwi ajise aporo. Are kuus pae ban amnuk aptam. Are kuus poman ban jamnuk aptam. Era kuus pae taka taka, kuus bajamapom akotnak pak ajiimomeptetere. Era kuus taka takaam juas wao aptam. Era juas Allah Tame atakam juas.

²Era aporo binatang, ere binatang juas macan tutul tamen are. Me abaiam binatang juas beruang bai tamen are. Me aokone singa okone tamen are. Emesare, era ii, afiak pak era binatang atetame. Are aowe baomep fe baemap asanam, aatakam fiaknak pakam, era binatang atetame.

³Dere, owe, wan kuus emetatiies tamen aporo. Me, dambir daso emekakapianse. Ara aemansa tapirmi owe takesam jinim daytu aees. Anom era binatang ajamkaies.

⁴Era ii, aatakam fiak pak, era binatang atetame. Erarawa era owe ii asitimes. Anom era binatang asitimes. Are, “Owe ara binatang awar apoknak. Oweam ara binatang jii baemejamom asan apok.” Emes atakam aesimes.

⁵Emesare, era ii, atakam, era binatang atetame. Era binatang arawa, amba aemetemteme. Are tame atakam akore. Era iiam, pak baem fiak pak, era binatang atetame. Era binatang, era fiak pak pir 42 aemome.

⁶Era binatangam Allah tame atakam akorome. Are Allah juasam, Allah aemapmar asanam, era Surga oup aemapmas oweam, tame atakam akorome.

⁷Era ii, Allah aowe bajamom fiak pak, era binatang atetame. Are era owe bakumimosom fiak pak era binatang atetame. Are era owe samane takesam, taka taka atakam owe takesam, era tapirmiin tapirmiin owe takesam, era owe baomep fiak pak era binatang atetame.

⁸Ara aemansa tapirmi aemapmas owe takes, era binatang asitimtemas. Era binatang asitimes owe, Domba Jii buku bomon juas apok owe. (Bonaknak ere, owe Domba Jii atatiies.) Era jiinenak aememaartas owe juas ere, era buku bomon aemapes. Bonaknak ere, Allah, era owe juas buku bomon aeapome. Asep arawa, Armat Ipit pakiin pakiin takes akenemapome.

⁹Owe takes ara atakam jane bajitas:

¹⁰“Allah, owe tau bata batetam akot aporto apaye, owe era owe tau ataatemas. Owe, wan owe, jii warim atatiitas apaye, wan owe, era oweam, jii warim atatiitemas. Emesare, Allah aowe emes atakam baportas. Ararawa, jak fiak baememtas. Are Allah eemnak bamesemkoromtas.” Emes atakam jane bajitas.

¹¹Emesare, denom wan binatang era tapirmi ajise aporo. Era binatang kuus pae jamnuk aptam. Era kuus pae, domba jii kuus pae tamen are. Era binatang atakamam, ii atakam tamen are.

¹²Me bonak binatang afiak pak takes, wan binatang atetame. Me wan binatang ere, pak afiak pak jipu, era bonak binatang bipu aeme. Are ara aemansa tapirmi pakam, ara aemansa tapirmi aemapmas owe takesam, era bonak binatang basitim, jinamonak atameme. Emesare, era bonak binatang, akakapianse dambir daso aptam binatang are.

¹³Me wan binatang, jinim bae pak daytinak aeme. Are jisimak Surga oup bandae atakam asakamtame. Era jisimak arawa, Surga oup aendae, wanam era tapirmipu andaeamse. Me asamot oweam era pak apores.

¹⁴Emesare, era binatang potet ara aemansa tapirmi aemapmas owe takes atutume. Bonak ere, bonak binatang, jinim bae pak baem fiak pak era wan binatang atetame. Era binatang arawa, jinim bae pak bonak binatang bipu aeme. Erarawa are potet ara tapirmi aemapmas owe takes atutume. Are atakam ara tapirmi owe asakamtame. “Tare eto akenemay. Era bonak binatang basitim eto are. Era binatang, era jii warim daso aptam binatang are. Era binatang era daso dambir apok.” Emes atakam aesime.

¹⁵Me bonak binatangam, wan fiak pak, wan binatang atetame. Erarawa wan binatang, jeses, era eto atetame. Me eto ere, atakam amsam aememe. Are Ara basitim apok owe takes batatii fiak pak aemome.

¹⁶Emesare, wan binatang, wao, era owe takes abo ban apaye, abipis apaye, emes baeapomteter, jinamonak atameme— era juas apok oweam, era juas aptam oweam, era pak daytu aptam oweam, era pak apok oweam, era apa karai bae oweam, era bambi karai baetam oweam, ere takes.

¹⁷Era binatangam, owe pak bajit, atii ate. Are era binatang wao aptam owe taka pak bajit atii bata apok. Era wao era binatang juas wao apaye, era binatang anomor wao apaye, ere emes wao are.

¹⁸Emes atakam jane bajiekorom owe, bimak binip baso batetaramtas. Era bimak binip aptam owe binatang nomor bajititimartas. Era nomor, asamot owe juas nomor. Era nomor, ere 666.