Read Casuarina Coast Asmat BAPOROMTAM ATAKAM 15 Bible Online

BAPOROMTAM ATAKAM 15 - Casuarina Coast Asmat bible

BAPOROMTAM ATAKAM 15

¹Emesare, dere wan jinim bae pak daytu wonamo oup aporo. Oweam emes jinim bae pak basamo bata apok. Emesare, malaikat poman ban jamnuk aememes. Are era tapirmi, asan potanak pak poman ban jamnuk atoomes. Me asan potanak pak, Allah jokoman aememe pak are. Ere Allah asepnak jokoman aememe pak are. Erarawa era asan potanak pak poman ban jamnuk era asepnak asan potanak pak are.

²Emesare, denom wan pak aporo. Ere daytinak kaca tamen. Anom daytinak fo tamen. Me kacaam jisimak bajartam tamen. Denom era binatang akumimosomes owe aporo. Era owe, era binatang etoam, era binatang juas nomor aptam ipitam, akumimosomes. Era owe era daytinak kaca jupima aememes. Are Allah atetame gitar atoomemteteres.

³Era owe, Allah bambi karai baetam ipit juas Musa soam, Domba Jii soam, aees. Era so ere: “Tuhan Allah! Wore fiaknak! Era aemmarem pak, ere daytinak. Anom akotnak. Wore era samaniin samaniin owe aRaja Ipit. Era aemmarem pak, ere turu pak. Anom pote pak apok.

⁴Tuhan! Wore ombare apok owe ta oweem? Tere Wora baeom apok owe ta oweem? Emesare, Turunak Ipit, ere Wo taka are. Owe takes, era aemmarem pak, turunak apormas. Erarawa era samaniin samaniin owe takes Wora ajinaomemtemanis. Are Wora asitimtemanis.” Emes so aees.

⁵Asep arawa Surga Allah Tame aporo. Ere Allah aememe Pitini Tame are. Era tame jimsap apaieme.

⁶Emesare, era asan pota pak poman ban jamnuk atoomes malaikat owe poman ban jamnuk, Allah Tame aejises. Era ajiimomes pakaianam, kain juas lenan. Era kain atet apok. Anom bambi fasarnak. Me malaikatam emas ajamam, ajiimomemteteres.

⁷Era jatiaptam pak eak taka apok era asan aememes. Me wan jiine pak taka, emas loyang poman ban jamnuk, era malaikat owe poman ban jamnuk atetame. Era loyang, ere jiine baememaar Allah ajokoman pak, iimtipnak.

⁸Me Allah, ere akotnak. Are fiaknak. Erarawa jisamun Allah Tame bomon aemtepe. Era jisamunam, era Tame akapimkorome. Era malaikat owe poman ban jamnuk, era atoomes asan pota pak poman ban jamnuk baemkorom apok aemes ere, oweam era Tame baemejii asan apok.