Read Casuarina Coast Asmat BAPOROMTAM ATAKAM 16 Bible Online

BAPOROMTAM ATAKAM 16 - Casuarina Coast Asmat bible

BAPOROMTAM ATAKAM 16

¹Emesare, atakam daytinak Allah Tame bomon akorejisime. Denom era atakam jane ajio. Era atakam akore ipit, atakam era malaikat owe poman ban jamnuk akorome. “Tanom baesosay. Era atoommakam loyang poman ban jamnuk, Allah jokoman pak aptam. Era jokoman pak tapirmi aokomdaemay.” Emes atakam aesime.

²Emesare, bonak malaikat aesose. Are era atoome mbok pak, ara tapirmi aokomdaeme. Aokomdaeme ere, era binatang juas wao aptam oweam, era binatang eto asitimes oweam, daso daytinak adamo apupuejistetere. Era dasoam asesanaken.

³Emesare, malaikat keduaam, era atoome mbok pak, era itimbup bwipu aokomdaeme. Era bwirawa, esee ajaorese. Era esee, dambir aemes owe esee tamen. Era bwi bomon jatiaptam pak takesam dambir aemkoromes.

⁴Emesare, malaikat ketiga, era atoome mbok pak, era ju bwipuam, era tapirmi amba ajismar bwipuam, aokomdaeme. Era bwi takesam esee ajaorese.

⁵Denom era bwi armat malaikat atakam jane ajio. “Allah! Wore turunak Ipit. Wonom akotnak Ipit. Era atakam asakamtiiem pak, ere turunak pak.

⁶Era owe, woturunak oweam, woatakam bakoretam oweam, atajimirtiies. Erarawa Wonom era owe esee bandam aemmarem. Era aemmarem pak era pota pak aemes jipu.” Era malaikat emes atakam aesime.

⁷Emesare, wan atakamam era pak Allah jis bajaatam joo akorejisime. Denom era atakam jane ajio. “Tuhan Allah! Wore fiaknak. Era owe ajurusummarem pak, ere anakot pak erare. Anom turu pak erare.” Emes atakam aesime.

⁸Emesare, malaikat keempat era atoome mbok pak era jeepu aokomdaeme. Allah ere, asamot owe damo, jisimak bafaamtii fiak pak, era jee atetame.

⁹Erarawa, era jee, asamot owe damo jisimak daytinak afaamtiie. Era oweam, Allah, era asan pota pak atakam asakamtame apores. Me are Allah juas tame atakam akores. Are era aemaaris pota pak bamakem apoknak. Are Armat Ipit basitim apoknak.

¹⁰Emesare, malaikat kelima, era atoome mbok pak, era binatang owe baomep fe baemap asanpu aokomdaeme. Era binatang aomepkorome asan takes arawa, jiiti atamse. Era binatang bajamkai oweam damo asesanak aemapteteres. Erarawa are era koman sisi ambitomepteteres.

¹¹Are damo asesa apores. Are damo daso apores. Erarawa are tame atakam Surga oup Allah akoromes. Era owe ere, era aemaaris pota pak bamakem apoknak.

¹²Emesare, malaikat keenam, era atoome loyang pak, era daytu ju juas Efratpu aokomdaeme. Erarawa era ju bwi sa taka aemtiie. Era jee ajisemarpu tapirmi raja owe ajinaotas, are era ju tamao aokorjirtemas.

¹³Emesare, asan pota bii bamintep, era paajis ii tamen pakam, era binatangam, era pote Allah atakam bakoretam Ipitam, aokone aejises. Denom emes aporo. Era bii, ituu tamen.

¹⁴Me era biiam, jokomannak bii. Are jinim bae pak aemes. Are ara tapirmiin tapirmiin kapar owe takes ambaroma ajaies. Are kapar owe, jii bajamom, asan taka ajanimapoma ajaies. Era jii bajamom bare, era fiaknak Allah abarekor are.

¹⁵Emesare, Yesus Kristusam, “Tanom jane pajiay! Emesare, Dere wosom ipit tamen andaetemin. Me ise baes apok oweam, era pakaian basumtii apok oweam, emes owe asan akot aememtemas. Are damo baso apok aememtemas. Owe, era owe aportas, era owe damke apok aememtemas.” Emes atakam aesime.

¹⁶Emesare, era bii, raja owe, tapirmi juas Harmagedon ajanimapoma ajaies. Era Harmagedon, Ibrani atakam juas.

¹⁷Emesare, malaikat ketujuh, era atoome loyang pak, oup akoromtemeteme. Oup akoromtemeteme ere, atakam daytinak Allah Tame bomon owe baomep fe baemap asan akorejisime. “Emesare! Eteemtiiares!” Emes atakam aesime. Denom emes atakam jane ajio.

¹⁸Emesare, bwerkor asarame. Kuurkoram ajume. Wurkoram ajarare. Ajie daytinakam asime. Allah, asamot owe akenemapome baream, waa ajiiream, emes daytinak ajie tamen apok.

¹⁹Emesare, era daytu kota apaapeamse. Bamintep apamantiie. Era tapirmiin tapirmiin kotaam danais aemamesteteres. Allaham era daytu kota juas Babel bimak binip ajanimome. Ararawa, aanggur bwi era kota owe andame. Era anggur bwi, ere Allah jak ambapnak aememe pak erare.

²⁰Era itimbup wooam takes ajaniosteteres. Era fami takesam ajaniosteteres.

²¹Te jufu es eka aptam, wonamo oup asendae. Era es eka taka taka, ere kilogram 50. Era es ekaam asamot damo ten andaepaapame. Era owe, Allah, era te, jufu es eka aptam ataendaeme apores. Ere asan potanak pak apores ere. Erarawa era owe atakam pota Allah asesakekores.