Read Casuarina Coast Asmat BAPOROMTAM ATAKAM 17 Bible Online

BAPOROMTAM ATAKAM 17 - Casuarina Coast Asmat bible

BAPOROMTAM ATAKAM 17

¹Emesare. Era loyang poman ban jamnuk atoomes malaikat owe poman ban jamnuk, aememes. Me wan takarawa, dera ambaromen. Are atakam akoromen. “De! Dere Allah era jasipar taotkor ajurusumto pak, wora aporomtamtemin. Era taot, ere kota daytu are. Owe, era kota tame tananenak, ju setep aeapomes.

²Era tapirmiin tapirmiin raja owe, era jasipar taot, asan pota pak aemes. Era tapirmiin tapirmiin bambi oweam, era taot, asan pota pak aemes.” Emes atakam aesime.

³Emesare, Allah Jip debimak binip aemomemkoromen. Era malaikat arawa, dere tame apok asan aesomasen. Era asan ere, dere, taot, binatang esakam beak ten aemape aporo. Era binatang pitini, Allah atakam pota juas wao kiikenak. Era binatang, kuus poman ban jamnuk. Paeam ban amnuk.

⁴Era taot, jirmwi pakaianam, esakam pakaianam, ajiimape. Are emasam, akotnak koser ekaam, wan koser eka juas mutiaraam, emes pak tasee ajasiape. Are emas mbok ban atoome. Era mbok, era taot potanak pakam, asan pota pakam, iimtipnak.

⁵Me abipisam, bomonnak wao juas aptam aemape. Era juas ere, “Babel daytu. Are era jasipar tapesam, ara aemansa tapirmi asan pota pakam, arsoot erare.” Emes wao juas aemape.

⁶Era taot, era turu owe aeseeam, Yesus ateman batam owe aeseeam, emende. Are era esee bwi ande, jaytu aeme aporo. Dere banamek era taot aporo, jinim daytinak aeo.

⁷Me malaikat arawa, atakam dera akoromen. “Wore wama tamen jinim eemarem? Dere era taot bomonnak atakamam, era beak ten aemapmar binatang bomonnak atakamam, wora baesimtam aemin. Era binatang era kuus poman ban jamnuk aptamam, pae ban amnuk aptamam, emes binatang are:

⁸Bonaknak ere, era aporarem binatang, jatiaptam aememe. Me, dambir ate. Asep barerawa, are era kakotenak jipa aekunaotem, wanam era danais aemamesto asan aesostem. Bonaknak ere, era binatang jatiaptam aememe. Me, dambir eteeme. Asep barerawa aojisemtem. Era tapirmi owe emes aportas, jinim daytu aetemas. Me, era jinim aetas owe ajuas, jiine aememaartas owe juas aptam buku bomon apok. Allah ara tapirmi bakenemapom apok ere, are owe juas era buku bomon aeapome.

⁹Emesare, bimak binip baso atetaramay. Era kuus poman ban jamnuk, fami poman ban jamnuk awar. Ere era taot aemapmar asan are. Era kuusam, raja owe poman ban jamnuk awar.

¹⁰Me wan raja owe ban taka, ere dambir eteemes. Me wan taka aapeta. Me wan taka ere, bajinao apok. Ajinaoto, are owe baomep, bare karo emes aememtem.

¹¹Era binatang jatiaptam aememe. Me, dambir ate. Emesare, era binatang raja ipit kedelapan. Are raja owe poman ban jamnuk wan raja ipit taka arare. Era raja ipit ere, era adanais aemamesto asan aesostem.

¹²Era aporarem pae bam amnuk, raja owe ban amnuk awar. Era raja owe, owe baomep fiak pak baemomem apok. Me, Bii Kapar Ipit, era fiak pak, era raja oweam, era binatangam, jam takakope atetamtem.

¹³Era raja owe ban amnuk bimak binip awar are. Are afiak pak takes era binatang atetamtemas.

¹⁴Are Domba Jii jii ajamomtemas. Era Domba Jii ere, Tuhan anakot. Are raja Ipit anakot. Emesare, era Domba Jiiam, abajamkai oweam, era raja owe, takan akumimosomtemas. Me abajamkai owe, Armat Ipit ajate owe are. Ere Armat Ipit aereremartaae owe are. Ere Armat Ipit bajamkaiaar owe are. Era malaikat emes atakam aesime.

¹⁵Era malaikat atakam dera aokoromen. Wore, era jasipar taot, era jupu aemapar aporarem. Emesare era ju, owe samane awar. Era ju, bambi owe tananeam, tapirmiin tapirmiin oweam, taka taka atakam oweam, awar.

¹⁶Era aporarem kuus pae ban amnukam, era binatangam era jasipar taot bifane afeomemtemas. Are era taot aapak takesam tasa aetemas. Are era taot damo burifie ataemomtemas. Are era taot damo dasa andetemas. Era taotam jisimak ambomtiitemas.

¹⁷Emesare, Allah, era abimak binip akukuretiie pak baemkorom, bimak binip, raja owe ban amnuk atetamtem. Era raja oweam emes bimak binip awar atetaramtemas. Erarawa era raja owe, abaomep fiak pak takes era binatang atetamtemas. Era binatangam owe baomep fiak pak aemomemtem— Allah akore atakam aemkoromto bare ajiire.

¹⁸Era aporarem taot, era daytu kota awar. Era kota owe baomep oweam, era tapirmiin tapirmiin raja owe aomepmas. Era malaikat emes atakam aesime.”