Read Casuarina Coast Asmat BAPOROMTAM ATAKAM 18 Bible Online

BAPOROMTAM ATAKAM 18 - Casuarina Coast Asmat bible

BAPOROMTAM ATAKAM 18

¹Era malaikat emes atakam aesimerawa, dere wan malaikat taka Surga oup aendae aporo. Era malaikatam, atakam fiaknak malaikat erare. Me aakotipitnak pakam era tapirmi takes asaramtiie.

²Are atakam daytu afaketaere. “Danais aemansa! Era daytu kota juas Babel danais aemansa. Are bii baemap asan aemansem. Are era asan pota bii takes asan aemansem. Anom owe bifane afeomemas pota sakao takes asan aemansem.

³Bonaknak ere, are era samaniin samaniin owe takes, aasan pota pak bajamkai, jinamo tamen atameme. Era tapirmiin tapirmiin raja oweam, Babel, asan pota pak aemes. Emesare, Babelam pak daytinak aemomeme. Era tapirmiin tapirmiin pak bajitit owe ere, era pak ajitita ajaies. Erarawa are pak daytu aemomemes.” Emes atakam aesime.

⁴Emesare, dere Surga oup wan atakam jane ajio. “Aemapakam owee! Dejoo owee! Era kota Babel adosa bomonapas taneapas wonamo oup ajiire atemetapem. Era kota jokoman pak aemaarir. Allaham era pak bimak binip ajanimome. Erarawa tare era kota ajisay. Tare adosa bajamkai-ombar. Tanom era asan potanak aemapto pak, bajamemap-ombar.

⁶Era Babel, pota pak, tara aemen. Tare ere, biti bajie era pak jipu, era Babel aemay. Era koser pota pak aemaarir, biti bajie daytu aemay. Are pota pak mbok bwi kope emes, tara andamaarir. Tararawa pota pak mbok bwi daytu, era Babel andamay.

⁷Are atakam amba akoremar. ‘Dere ratu taot aojapaia. Dere tano taot apoknak. Denom bate apoknak aemtemin.’ Emes atakam aesimum. Emesare, are daytinak amba aemetemtemum. Are pak daytinak ajitaareme. Erarawa tanom era pak jipu Babel jak pota aferemapomay.

⁸Babel, pota pak aemum. Erarawa bare takakope, era asan pota pak takes, Babel aoemtem. Ere atair are. Bate are. Amosto daytinak are. Jisimakam ambomtiitem. Emesare, Tuhan Babel atakam asakamtiitem. Armat Ipit, ere fiaknak.” Emes atakam jane ajio.

⁹Era tapirmiin tapirmiin raja owe, Babel, asan pota pak aemes. Are aapak daytinak takan aemomes. Are Babel jisimak bamomtii jisamun aportas, anom bate ambatetemas. Are semoo aetemas.

¹⁰Are Babel ajirisemto pak aportas, anom ombare daytinak ambartemas. Erarawa are setep apok aememtemas. Are atakam akoretemas. “Babel! Wore kota daytu aemansaaarim. Wonom fiaknak aemansaaarim. Me, wore asan potanak aemamesmarem. Emesare, jam takakope, Allah wora ajurusumman.” Emes atakam aesimtemas.

¹¹Era tapirmiin tapirmiin pak bajitit oweam era kota jier bate ambatetemas. Are jak pota aememtemas. Era pak bajitit owe aapak bojitit owe apok aportas are.

¹²Era pak bajitit owe pak, ere emas are. Perak are. Eka akotnak kutukoseram are. Eka kope juas mutiara are. Kain juas lenan are. Kain jirmwi are. Kain juas sutera are. Kain esakam are. Pinim akot wus kupis are. Gajah okose pak kupis are. Harga daytu wus pak kupis are. Tembaga pak kupis are. Besi pak kupis are. Eka juas pualam pak kupis are.

¹³Femase wus pitini are. Banda pak femase baem pak are. Pinim akot pak are. Minyak wangi are. Pinim akot wus tapi juas kemenyan are. Anggur bwi are. Minyak are. Akot tepung are. Gandum are. Sapi are. Domba are. Kuda are. Kereta are. Bambi karai baetam owe are. Emesare, era asamot owe are. Era pak bajitit owe pak, ere, emes pak are.

¹⁴Era pak bajitit oweam atakam era kota akoromtemas. “Era jak asenomemaarim pak, ere eteesosares. Era wopak daytinakam, ere wopak akotnakam, ere etepakapiosares. Wonom era pak baemeotaer asan apok.” Emes atakam aesimtemas.

¹⁵Bonaknak ere, pak bajitit owe, pak, era kota ajitamaretes. Erarawa are era kota pak daytinak aemomes. Are era kota ajirisemto pak aportas, are ombare daytinak aememtemas. Erarawa are setep apok ambaremtemas. Are bate abatetemas. Jakam pota aememtemas.

¹⁶Atakamam akoretemas. “Era kota daytu, asan potanak aemansem. Bonak ere, era kota owe, lenan kainam, jirmwi kainam, esakam kainam, ajiimomaaris. Are emas pakam, eka akotnak kutukoseram, mutiara ekaam, emes tasee pak ajaseaaris.

¹⁷Me, jam takakope ere, era pak daytu takes apakapiosares.” Emes atakam aesimtemas. Emesare, era kapal tanane kapten owe takesam, era kapal bajamjuu owe takesam, era kapal karai owe takesam, era kapal bajamjuu pairi bae owe takesam, setep apok ambaremtemas.

¹⁸Are era kota jisimak ajaato jisamun aportas, atakam afaketaatemas. “Wan kota ara daytu kota awar apok.” Emes atakam aesimtemas.

¹⁹Era owe ere, semoo aetemas. Bateam ambatetemas. Are jak pota aememtemas. Era owerawa, “Era kota, ere daytu. Me, are asan potanak aemansem. Era itimbup ajira ajiaaris kapal takes, era kota pak atoomjira ajiaaris. Erarawa era kapal armat owe, pak daytinak aemomemmas. Me, jam takakope, era kota pak takes apakapiosares.” Emes atakam aesimtemas.

²⁰Surga oup owee! Jak akotnak aememay. Tare Allah aoweam, Yesus Kristus tare atakam bakoretam ambirimemomen oweam, tare Allah atakam bakoretam oweam, jak akotnak aememay. Emesare, Allah, era kota ajurusumum. Are era kota aemaarin pak biti ajim.

²¹Emesare. Fiaknak malaikat taka, eka ataere. Era eka, ere banda pak bandandaesum eka tamen are. Are era eka itimbup bwi ajurumpuume. Era malaikat ere, “Allah, era kota daytu juas Babel, emes fiaknak bap ajumdaemtem. Wanam era kota bi boopor apok.

²²Owe, gitaram, soam, sulingam, fwiam, woasan jane bojie apoknak aemtemas. Pak bakenemapom tastu oweam, woasan boemap apoknak aemtemas. Oweam banda pak woasan bokenemapom apoknak aemtemas.

²³Oweam, pelita sare, woasan boopor apoknak aemtemas. Owe, ai petae ipit aatakamam, ai oorey taot aatakamam, woasan jane bojie apoknak aemtemas. Me wopak bajitit owe, era tapirmiin tapirmiin andi afufuosaaris. Me wobii aptam oweam, era samaniin samaniin potet atutumaaris.

²⁴Emesare, Allah atakam bakoretam owe aeseeam, era turunak owe aeseeam, owe era tapirmiin tapirmiin atajimirtiies owe aeseeam, era kota ajirindae. Erarawa Allah era kota ajurusumum.” Era malaikat emes atakam aesime.