Read Casuarina Coast Asmat BAPOROMTAM ATAKAM 21 Bible Online

BAPOROMTAM ATAKAM 21 - Casuarina Coast Asmat bible

BAPOROMTAM ATAKAM 21

¹Emesare, dere ai wonamo anama ai tapirmiam, aporo. Me bonak wonamo anama bonak tapirmiam, ere etejanioses. Era itimbup bwiam etejaniose.

²Denom era dosa apok kota, Surga oup aendae aporo. Ere era ai kota Yerusalem are. Era kota, Allah bipu aendae aporo. Allaham era kota akeneme. Erarawa era kota, oorey ajuutto taot emes tamen are. (Era oorey ajuuttas tapes, ooreysai pakaian ajiimomemas, wanam are ambiis, bimnuk baemamtaer, aemomemas.) Emesare, era kotaam emes tamen aeme.

³Emesare, denom atakam daytu era owe baomep fe baemap asan akorejisime, jane ajio. “Me Allah aemapmar asanam, era asamot owe aemapmas asanam, ere takan are. Me Allah era owe takan aemaptem. Me oweam Allah aowe aemaptemas. Allah, era owe takan aemaptem. Are era owe aAllah aemaptem.

⁴Are era owe ambate manames takes akokomosomkoromtem. Oweam dambir boem apok aemtemas. Are jak pota boemap apok aemaptemas. Are bate bombat apok aemaptemas. Are damo asesa boemem apok aemaptemas. Era bonak pak takes, ere apok are.” Emes atakam jane ajio.

⁵Me owe baomep fe asan aemape Ipit atakam akore. “Emesare, Dere era pak takes akenemapommin.” Wanam, “Ara atakam, ere, anakot. Are atakamnak. Erarawa ara atakam, surat aeapomey.” Emes atakam aesime.

⁶Armat Ipit arawa, atakam dera akoromen. “Emesare, eteemtiio. Dere bonaknak aememo Ipit, Derare. Denom asepnak aememtey Ipit, Derare. Dere era bonaknak owe, Derare. Denom era asepnak owe, Derare. Dere, era tapirmi amba atetefejismar bwi, era bwito owe takes bambi atetamtemin. Oweam era bwi andetas are jiine aememaartemas.

⁷Dere era pak, era pota pak akumimosomtas owe, atetamtemin. Denom aAllah aememtemin. Are detiparais aememtemas.

⁸Me, era ombares oweam, era bamesem apok oweam, era jirsat pak aememas oweam, era owe atemas oweam, era asan pota oweam, era ta pak aememas oweam, era eto asitimemas oweam, era pote atakam akoremas owe takesam, ere, era aemaptas asan daytinak jisimak bomon are. Era asan, ere jisimakam, ambapnak jis jeeam, ambiimitemas. Era asan, ere asep dambir boem asan erare.” Emes atakam aesime.

⁹Emesare, era loyang poman ban jamnuk atoomes malaikat owe poman ban jamnuk aememes. Era loyang takes asepnak asan potanak pak aptam. Me wan malaikat taka ere, atakam dera akoromen. “De! Dere Domba Jii ataetto taot wora baporomtam. Ere Domba Jii aremo.” Emes atakam aesime.

¹⁰Emesare, Allah Jip debimak binip aemomemkoromen. Erarawa malaikat, daytinak fami oup atoomtemeten tamen are. Are era dosa apok kota aporomtamen. Ere kota Yerusalem are. Era kota, Allah bipu Surga oup aendae aporo.

¹¹Era kota Allah aakotipitnak pak aptam are. Erarawa era kota asaretepe. Era harga daytu eka juas “baiduri pandan” tamen asaretepe. Oweam emes eka banamek apemjatemtemas.

¹²Me kota afojianse, tiri daytu aemape. Ere tiri oupnak are. Era tiri jimsap, ere 12. Malaikat owe 12am era jimsappu aememes. Era jimsap takes, juas wao aptam. Era juas, Israel owe saman 12 juas are.

¹³Jimsap bamintep jee apejisemarpu poman are. Wan bamintep ere, utara poman are. Wan bamintepam selatan poman are. Wan bamintepam jee apepuemarpu poman are.

¹⁴Era kota tiri, ere eka besi 12 ten aemanse. Era eka taka taka, juas wao aptam. Ere juas, Domba Jii era atakam bakoretam ambirimemome owe 12 juas are.

¹⁵Era atakam dera akoromen malaikat, emas meter bino atoome. Era meter era kotaam, jimsapam, tiriam, tamat batam pak are.

¹⁶Era kota aip takes, ere turunak. Era aip takesam tamat awar. Emesare, malaikat, era atoome meter bino, era kota, tamat atame. Are era kota jirao kilometer 2.415 apore. Era kota paaroam, era kota oupam, emes kilometer awar apore.

¹⁷Anom era tiri oup, tamat atame. Ere meter 60 apore. Era malaikat meter tamat atame pak, ere asamot meter awar.

¹⁸Era tiri, eka juas “Baiduri pandan” are. Era kotarawa, emas. Era emas, wan pak bokaim apok emas. Era emas, kaca tamen are. Oweam era emas banamek apemjatemtemas.

¹⁹Era tiri eka fope, tasee pak aptam. Era tasee pak harga daytu eka kupis are. Me bonak eka fope, baiduri pandan eka are. Era eka fope kedua arawa, nilam eka are. Era eka fope ketiga arawa, yakut eka are. Era eka fope keempat arawa, samrud eka are.

²⁰Era eka fope kelimarawa, baiduri sepah eka are. Era eka fope keenam arawa, delima eka are. Era eka fope ketujuh arawa, ratna cempaka eka are. Era eka fope kedelapan arawa, pirus eka are. Era eka fope kesembilan arawa, topas eka are. Era eka fope kesepuluh arawa, krisopras eka are. Era eka fope kesebelas arawa, lasuardi eka are. Era eka fope keduabelas arawa, kecubung eka are.

²¹Era tiri jimsap 12, mutiara eka 12 are. Era jimsap taka taka, ere mutiara eka takakor. Era kota bokotpu, ere emas pak are. Era emas, wan pak bokaim apok emas. Era emas, kaca tamen are. Owe era emas banamek apemjatemtemas.

²²Dere era kota, Allah Tame apok aporo. Era fiaknak Tuhan Allaham, Domba Jiiam, ere Allah Tame.

²³Allah sare era kota asaramtiim. Era Domba Jiiam, era kota alampu tamen. Era kota jopaka basaramtii kota apok. Era kota piram baesaramtii kota apok.

²⁴Emesare, tapirmiin tapirmiin owe era kota sare bomon ajartemas. Me kapar oweam, aakotnak pak, era kota atoomjiitemas.

²⁵Era kota tiri jimsap takes ju ajiraoaarto, emes taka ambuemteteraartem. Era asanam, ere eam apoknak. Emesare, owe era jimsap bakapimapom apok aemtemas.

²⁶Owe, era tapirmiin tapirmiin owe aakotnak pakam, aapak daytinakam, era kota atoomjiitemas.

²⁷Me, pano pak era kota baemejii asan apok. Era pota pak baem oweam, era pote oweam, era kota baemejii asan apok. Me, Domba Jii abuku bomon juas owe taka, era kota ajiitemas. Era buku bomon juas owe, ere jiinenak aememaartas owe erare.