Read Casuarina Coast Asmat BAPOROMTAM ATAKAM 3 Bible Online

BAPOROMTAM ATAKAM 3 - Casuarina Coast Asmat bible

BAPOROMTAM ATAKAM 3

¹“Emesare, wore ara atakamam surat aeapomey. Wanam ara surat, era Sardis Yesus basitim ajarisiapmas owe amalaikat, ataejirimtamey: Jipit taka Allah Jip poman ban jamnuk aptam. Are era baet poman ban jamnuk atoomemmar. Armat Ipit ara atakam tara akoromman: Era aemaarukum pak demsam. Oweam, ‘Era Sardis owe jatiaptam,’ emes atakam aesimemas. Me tare dambir aemekem owe tamen.

²Allah, era aemaarukum pak takes, aatakam jipunak apok apormar are. Denom emes apormin. Emesare, tare dambir baemken owe tamen. Erarawa, bawasitay! Tare jati pak kope aemapmakam. Era jati pak fiak aememay. Tare era jati pak dambir baem-ombar.

³Emesare, era aemomekem pakam, era jane ajiekem pakam, bimak binip ajanimomay. Era atakamam ji aeay. Me tadosa ambakemay. Tare bawasit apok aemtakam, Dere pak tasa baetaer ipit tamen tara andaeomemtemin. Me tara andaeomemtey jam, ere tamsam apok.

⁴Me, tare wan Sardis owe bamintep, tapakaian, sesak baemapom apok. Erarawa asep bare tare pakaian fasar ajiimomemtemakam. Wanam Dere takan atawejartemarom. Tare emes pak baem, awar owe erare.

⁵Allah era pota pak akumimosomtas owe, emes fasar pakaian ajiimapomtem. Denom era owe juas, era jiinenak juas aptam buku, bakokomosom apok aemtemin. Dere, Deritipit bipuam, amalaikat owe bipuam, atakam akoretemin. ‘Ara owe deowe.’ Emes atakam aesimtemin.

⁶Me Allah Jip ara atakam Yesus basitim ajarisiapmas owe akoromum. Owe takes ara atakam jane bajitas. Era ipit emes atakam aesimum. Emes atakam surat, era Sardis Yesus basitim ajarisiapmas owe amalaikat, ataejirimtamey.”

⁷“Emesare, wore ara atakamam surat aeapomey. Wanam ara surat, Filadelfia Yesus basitim ajarisiapmas owe amalaikat, ataejirimtamey: Jipit taka turunak Ipit. Are atakamnak Ipit. Armat Ipit, Daut aemome kunci, atoommar. Are jimsap apaimto, owe era jimsap baemekapimapom asan apok. Are jimsap akapimapomto, owe era jimsap baemeopaim asan apok. Armat Ipit ara atakam tara akoromman:

⁸Dere era aemaarukum pak demsam. Dere tabipu jimsap apaimtamo. Oweam era jimsap baemekapimapom asan apok. Tanom fiak koser aememmakam. Tanom deatakam ji aeekem. Tanom Dera bapatim apok aemenkum.

⁹Me wan owe, Bii Kapar Ipit basitim ajarisiapmas owe erare. Era oweam, ‘Dare Yahudi owe,’ emes atakam aesimemas. Me, are Yahudi owe apoknak. Are pote owe. Denom era owe tara bajinaomem, wanam tabipu jindi bandaepuap, emes atakam asakamtamtemin. Denom tara afaimo, era owe aporomtemin.

¹⁰Emesare, asep bare, asamot owe takes bajurusum pak ajinaotem. Era bajurusum pak, owe takes baempor pak. Denom, tare jak fiak baememaar, atakam asakamtamo. Tanom era basakamtam atakam ji aeekem. Erarawa, era bajurusum bare aemamesto, denom bantem fiak tara ataiemtemin. Ere tare bajamjirisem apok.

¹¹Emesare, Dere fef ambaromemtemin. Me aemommakam pak ban fiak aesomomay. Owe takuus ajamapomtakam akot pak bataer-ombar.

¹²Dere era pota pak akumimosommas owe, Dere Allah aTame bomon ombuu wus emes ataemomtemin. Are era tame bomon emes aememaartemas. Dere deAllah juasam, era ai kota Yerusalem juasam, deai juasam, era owe damo ten, wao aeapomtemin. Emesare, era ai kota Yerusalem, era Surga oup aendaeto kota are.

¹³Me Allah Jip ara atakam Yesus basitim ajarisiapmas owe akoromum. Owe takes ara atakam jane bajitas. Era Ipit emes atakam aesimum. Emes atakam, era Filadelfia Yesus basitim ajarisiapmas owe amalaikat, ataejirimtamey.”

¹⁴“Emesare, wore ara atakamam surat aeapomey. Wanam ara surat, Laodikia Yesus basitim ajarisiapmas owe amalaikat, ataejirimtamey: Jipit taka juas “Atakamnak”. Are atemannak batam Ipit. Bonaknak ere, Allah pakiin pakiin akenemapome ere, era Ipitam era pakiin pakiin ji ajameremapome. Era Ipitam ara atakam tara akoromman:

¹⁵Dere era aemaarukum pak demsam. Tare jufunak apok. Tanom ambapnak apok. Me, tare jufunak apaye, ambapnak apaye, ere akot.

¹⁶Me, tare ambap kope. Tare ambapnak apok. Tanom jufunak apok. Erarawa Dere tare besa tamen ajiejisimtemin.

¹⁷Me tare, ‘Dare pak daytu. Danom uang daytu. Dare wan pak botaer apok.’ Emes atakam aesimemakam. Me, tare asan pota owe. Tanom ajarisapmakam. Tare pak apokam, banamek kapieam, damo basoam, aemapmakam. Tare ere, tamsam apok.

¹⁸Erarawa, Dere ataane tara aweommin: Tare era aemompey emas ajititay. Era emas, jis etejaao wan pak bokaim apok emas erare. Erarawa tare pak daytu aemomemtemakam. Tanom era aemompey fasar pakaian ajititay. Erarawa tare pakaian ajiimomemtemakam. Owe tadamo baso bapor-ombar. Tanom damke baemem-ombar. Tanom era aemompey banamek obat ajititay. Erarawa tabanamek awareaptem.

¹⁹Dere dofaimmin owe, ajatemotaeremin. Denom era owe ajurusumemin. (Ere era owe, akot pak baem, baememtam are.) Emesare, tare Dera bajamkai fiaka. Era pota pak ambakemkoromay.

²⁰Baporay! Dere jimsappu aememmin. Denom era jimsap akokomaaremin. Owe era jimsap apaimtamtanis apaye, Dere era tame ajiiaptemin. Derarawa, amos era owe takan andetemin.

²¹Dere era pota pak akumimosomtas owe, debaomep fe baemap asan Dere takan baemap, atetamtemin. Ere era pota pak akumimosomo, wanam Dere Deritipit abaomep fe baemap asan takan aemapom, tamen are.

²²“Me Allah Jip ara atakam Yesus basitim ajarisiapmas owe akoromum. Owe takes ara atakam jane bajitas.” Era Ipit emes atakam aesimum. Emes surat Laodikia Yesus basitim ajarisiapmas owe aamalaikat, ataejirimtamey.” Me Armat Ipit emes atakam akoromen.