Read Casuarina Coast Asmat BAPOROMTAM ATAKAM 5 Bible Online

BAPOROMTAM ATAKAM 5 - Casuarina Coast Asmat bible

BAPOROMTAM ATAKAM 5

¹Wanam dere owe baomep fe baemap asan aemape Ipit aporo. Denom Armat Ipit bo ban, buku atoome aporo. Era buku bajaokames surat are. Era buku, bomonam, teneam, surat wao aptam. Era bukuam, bakamimapom pak poman ban jamnuk aptam.

²Derarawa, fiaknak malaikat taka aporo. Era malaikat atakam daytinak afaketaere. “Era buku bakamimapom pak bakoromtaer awar ipit tanam? Era buku bawaram awar ipit tanam?” Emes atakam aesime.

³Me, era Surga oup oweam, era tapirmi oweam, era dambir asan oweam, era buku baemewaram asan apoknak. Are era buku bomon baemepor asan apoknak.

⁴Dere owe era buku bawaram, wanam era buku bomon bapor, emes owe apok aporo. Erarawa bate daytinak ambato.

⁵Me wan owe duturu ipit takarawa, atakam akoromen. “Bate bas! Yehuda saman Ipit taka singa tamen. Are Daut wurpis. Armat Ipit era asan pota pak takes akumimosome. Erarawa Are buku bakamimapom pak poman ban jamnuk akokoromtaatem. Ararawa, era buku awaramtem.” Emes atakam aesime.

⁶Wanam, dere domba Jii owe baomep fe baemap asan waut aememe aporo. Era jatiaptam pak eak taka apokam, era owe duturu 24am, era domba Jii afojomes. Era domba Jii, owe Are atatiies emes tamen aememe. Are kuus pae poman ban jamnuk aptam. Are banamek poman ban jamnuk aptam. Era banamek Allah Jip poman ban jamnuk tamen. Bonaknak, Allah, era Jip, tapirmi samaniin samaniin ambirimemome.

⁷Era domba Jii, owe baomep fe baemap asan aemape ipitpu ambareme. Ararawa, era ipit bo ban atoome buku ataere.

⁸Are era buku ataererawa, era jatiaptam pak eak taka apokam, era owe duturu 24am, era domba Jii bipu bi fop andaejiapes. Are taka taka gitar tamen pak atoomes. Era pak juas kecapi. Taka takaam emas mbok atoomes. Era mbok takes, pinim akot pak imtipnak. Era pak era turu owe, atakam Allah ajanimes, tamen.

⁹Era jatiaptam pak eak taka apokam, era duturu owe 24am, ai so aees: “Owe Wora atatiienis. Wonom, woesee, owe ajititem, wanam era owe Allah atetamem. Era ajititem owe, era owe samane takes wan oweam, taka taka atakam takes wan oweam, era tapirmiin tapirmiin takes wan oweam, emes owe are. Wore era owe, Allah Tame pak baem owe saman, ataemomem. Ere daAllah akarai pak bafaafetam are. Anom era tapirmi owe takes aomeptemas. Wore emes aemem. Erarawa Wore era buku batoomem, wanam era bakamimapom pak bakoromtaer, emes Ipit aememem.” Emes so aees.

¹¹Dere ere, aporo. Denom malaikat owe tananenak aatakam jane ajio. Are owe baomep fe baemap asanam, era jatiaptam pakam, era owe duturuam, afojompes.

¹²Are emes so daytu aees: “Bonaknak ere, owe domba Jii atatiies. Me, domba Jii fiaknak. Are pak daytinak aemommar. Are amsamnak. Oweam emes atakam bakoretas. Oweam Armat Ipit basitimtas. Owe ara, ‘Ju Armat Ipit,’ batemtemaartas. Are, ‘Armat Ipit akotnak,’ emes tere baeomtas. Emesare, Armat Ipit emes takes awar aememe.” Emes so aees.

¹³Dere ere, Allah Surga oup akenemapome jatiaptam pak takes era akores atakam jane ajio. Denom, Allah tapirmi akenemapome jatiaptam pak takesam, era tapirmi bomon akenemapome jatiaptam pak takesam, era bwi bomon akenemeseme jatiaptam pak takesam, era akores atakam jane ajio. Are emes so aees: “Owe, tare owe baomep fe baemap asan ten aemapmar Ipit anama domba Jii baeomaartas. Anom Ara basitimaartas. Owe Ara, ‘Ju Armat Allah,’ batemtemaartas. Are pak takes baomepaartas.” Emes so aees.

¹⁴Era jatiaptam pak eak taka apok ere, “Emes atakam, atakamnak,” emes atakam aesimes. Wanam era owe duturu, bi fop andaejiapes. Anom asitimes.