Read Central Asmat MATIUS 1 Bible Online

MATIUS 1 - Central Asmat bible

MATIUS 1

¹A atakam, Yesus Kristus arafasutmar juwas bajucucumiras ara. Aramat ipic Daud urpis arawen. Daudam Abraham urpis arawen.

²Bare, Abraham atiw Ishak arawen. Ishak atiw masirin, Yakub arawen. Yakub atiperes masirin, Yehudaam, arepcewesam, arewcewesam, arawen.

³Yehuda atiperes masirin, Peresam, Seraam, arawen. E ow arosowoc masirin, Tamar arawen. E Peres atiw masirin, Hesron arawen.

⁴Hesron atiw masirin, Ram arawen. Ram atiw masirin, Aminadab arawen. Aminadab atiw masirin, Nahason arawen. Nahason atiw masirin, Salmon arawen.

⁵Salmon atiw masirin, Boas arawen. E Boas arosowocam Rahab arawen. Boas atiw masirin, Obed arawen. E Obed arosowocam Rut arawen. Obed atiw masirin, Isai arawen.

⁶Isai atiw masirin, e raja ipic juwas Daud arawen. Daud atiw masirin, Salomo arawen. Salmon arosowoc masirin, e Uria bap atewetef cowoc arawen.

⁷E Salomo atiw masirin, Rehabeam arawen. Rehabeam atiw masirin, Abia arawen. Abia atiw masirin, Asa arawen.

⁸Asa atiw masirin, Yosafat arawen. Yosafat atiw masirin, Yoram arawen. Yoram atiw masirin, Usia arawen.

⁹Usia atiw masirin, Yotam arawen. Yotam atiw masirin, Ahas arawen. Ahas atiw masirin, Hiskia arawen.

¹⁰Hiskia atiw masirin, Manasye arawen. Manasye atiw masirin, Amon arawen. Amon atiw masirin, Yosia arawen.

¹¹Yosia atiw masirin, Yekhonyaam, arewcewesam, arawen. Er, e Babel ow, e Israel ow, e Babel capinmi jiwis atuwumosomfes jofay arawen.

¹²Ar e ow jiwis atuwumosomfes masirin, Yekhonya, Sealtiel aricipic aememefen. Sealtiel atiw masirin, Serubabel arawen.

¹³Serubabel atiw masirin, Abihud arawen. Abihud atiw masirin, Elyakim arawen. Elyakim atiw masirin, Asor arawen.

¹⁴Asor atiw masirin, Sadok arawen. Sadok atiw masirin, Akhim arawen.

¹⁵Akhim atiw masirin, Eleasar arawen. Eleasar atiw masirin, Matan arawen. Matan atiw masirin, Yakub arawen.

¹⁶Yakub atiw masirin, Yusuf arawen. E Yusufam Maria armipic arawen. E Mariaam e Yesus ajispetiwefen. E Yesusam juwas Kristus arawen.

¹⁷Bare, e Abraham ajitemef, wunam e Daud ajitemef jofay ajiwar, aram owcamwey empat belas ajiwar arawen. Er masirin, e Daud ajitemef, wunam e Babel ow e Israel ow Babel capinmi jiwis atuwumosomfes jofay ajiwar, aram owcamwey empat belas ajiwar arawen. E masirin, e Babel ow, e Israel ow, Babel capinmi jiwis atuwumosomfes, wunam e Kristus ajisamesef jofay ajiwar, aram owcamwey empat belas ajiwar arawen.

¹⁸Bare, e Yesus Kristus ajisemesef atakam inim ara: Arosowoc Maria arawen. Bapnak ara, aramat cowoc jipic juwas Yusuf ower bajuwut aememefen. E nat, ar e ipic bajuwut opok ara, e Roh Kudus e Maria jak asumapomefen. Mariaam e ajak asuapef aporefen.

¹⁹E nat, e ajuwutcow ipic juwas Yusuf, jipic tarowat arawen. Ar e cowoc namke bakam pwicaken. Inimas ar e cowoc batewet opok, inim atakam curuw asakamtiwefen.

²⁰Aramat ipic inim bi binip aceceremefen. Inim bi binip aceceremef masirin, isi atamwitefen. Isi atamwitef ara, aram Tuhan amalaikat bi aporefen. E malaikatam atakam Yusuf aotawefen. “Yusuf. Or Daud urpis ara. Or e Maria batewet omar arapok. E jak asuapmaras, bare Roh Kudus aemefas ara.

²¹Aramat cowoc jipic jiwi ajispetiwcema. E jiwi, e arow, e adosa ajortewcema. Inimas or e jiwi juwas Yesus aamcemem.” E malaikat inim aeefen.

²²Ametnak ara, Tuhan, atakam e aratakam botaw ipic aotawefen. E ipic masirin, e atakam asmat ow aotawefen: “Cemen ban amsom opok cowoc jak asuapcema. Aram jipic jiwi ajispetiwcema. Ow, aramat ipic, juwas Imanuel aamcemes.” Inim aeefen. Inimas ara, ow eras takas e atakam jipu aemfesen. “Imanuel” daratakam juw buwumtew, “Allah dar akac ara.”

²⁴Barewen. E Yusuf isi ajitefen. Isi ajitef masirin, ar e Tuhan amalaikat atakam jipu aemefen. Ar e Maria atewetefen.

²⁵Aramat ipic nat, e arem, e jiwi ajispetiwef jofay ajiwar, cen ban opok cowok arawen. Bare, Yusuf e jiwi juwas Yesus aamefen.