Read Central Asmat MATIUS 10 Bible Online

MATIUS 10 - Central Asmat bible

MATIUS 10

¹Bare. Yesus e amamkawi ow dua belas ajiwar ajateef. Ar masirin, dat botewerisim fakas, e ow atetamef. Aram cīncīn damasam, cīncīn dam kumitasam, inim dam baworomtaw fakas, e ow atatamef.

²Bare, e atakam botaw batewosom ow dua belas ajiwar ara: Simonam, arewec Andreasam, ara. (E Simon awun juwas ara masirin, Petrus.) Yakobusam, arewec Yohanesam, ara. (Ar Sebedeus atiperes ara.)

³Filipusam, Bartolomeusam, ara. Tomasam, Matiusam, ara. (E Matius e pemerintah uang batewanimtam kerja ipic ara.) E Alfeus itiw juwas Yakobusam, Tadeusam, ara.

⁴E Selot ipic juwas Simonam, Yudas Iskariotam, ara. (E Yudas e Yesus e jokmen ow botasimemtam ipic ara.) Bare, inim ow ara.

⁵Bare, Yesus e ow dua belas ajiwar atewosomef. Aram jirmec ajirimef. “Car e Yahudi opok ow acapinmi baysos arapok. Caram e Samaria ow akota bafiw arapok.

⁶Ca nat, e Israel owpu mamjisosey. Ar ajajemfes domba inim cimin ara.

⁷Ajisoscokom, inim atakam mamcacapiomey. ‘E Onam Op Pemerintah aenawcow jofay, bare sotopnakap asisienawma.’ Inim mameey.

⁸Caram e dam ow mamjaworomtawey. E damir owam mamjaworomsumutumey. Dam akat e penyakit kusta owam mamtetamey. E ow jak aman datam mamotewerisimey. Dor eras bwem fakas car mami atatamamin. Inimas car asan akat e ow mami mamomey.

⁹Caram ese uang epcom batowomos arapok.

¹⁰Ajisoscokom ara, pok ese batowomos arapok. Baju jamnukam, sandalam, onok pokam, batowomos arapok. Bare, ow e kerja a bwemtam ow amos batetamces.

¹¹Car kawey kota afiwcokomnew, kawey samat cemsan afiwcokomnew, erasan car e acem batowomiwji ow epen, jonow mamtowporey. Car masirin, e cem inim mamemapey— e capinmi bakan ajisoscokom jofay ajiwara.

¹²Car cem afiwcokom, ‘Allah asan akat car batetamcan,’ inim mameey.

¹³E cem ow, asan akat car atowomiwcannew, Allah, asan akat e ow baamcow— e janim aanimcokomas jipua. E nat, e ow ca batowomiw opok aemcannew, caram, ‘Allah asan akat car botetam arapok,’ inim mameey.

¹⁴Ow e acemnew e akotanew car batowomiw opok aporcokomnew, ar caratakam ji bwe opok aporcokomnew, caram e ow bakan mamjiosey, wunam atakam e ow mamotawey. ‘Car daratakam ji bwe opok aemamokom. Inimas dosa aemamokom,’ Inim mameey.

¹⁵Atakamnak ara, e Allah, ow siksa bwem jofay aenawcow, ar e Sodomin Gomora capinmi ow siksa kanim inim aemcema. Ar nat, e car batowomiw opok kota ow siksa awutut aemcema.”

¹⁶“Jakaperey. Car domba inim cimin ara. Dor ara wasan juwur asanpu inim cimin atewosomamin. Inimas car amer cimin pires mamemey. Caram pari cimin binaw mamemey.

¹⁷Ca nat, ow pimicima. Ar car e salah atakam mamsakam ow aotasimemtamceman. Aram e asembahyang cem aman omop car aafceman.

¹⁸Ar car do mamkawi ow aporceman. Inimas ar car gubernur ow bipuam raja ow bipuam, ajijimtawceman. Ca nat, car e Atakam Akat e owam, e ajowowam, aotawcomokom.

¹⁹Ar car e ow aotasimemtamcan, car e atakam aotawcokomas, bi binip jirow arapok. E jofay ara, Allah, e atakam bi binip car atetamceman.

²⁰E atakam aotawcokomas, bare carma opok. E caricipic aRoh, e atakam, car atetamceman.

²¹Wun owam, arepcewesnew, arewcewesnew, kawey ow aotasimemtamcemes. E kawey ow masirin, e ow acatiwcemes. Wun ducur owam e ajiwi kawey ow aotasimemtamcemes. E kawey ow masirin, e jiwiam acatiwcemes. E wun atiperesam, e arisepes afakaysomitcemes, wunam acatiwcemes.

²²Ow car do mamkawi aporcan, ar takas bifan car afayomceman. E nat, ow e asepnak jofay ajiwar do mamkawi bakorompim opok aemces, aram ajoremcemes.

²³Ow, kota cowok car ajurusumcannew, bare wun kota omar mamjisosey. Atakamnak ara, car e Israel kota takas bajaremkurum opok aemcomokom. E Asmat Anakat Ajaworemef Ipic bap aenawcema.

²⁴Mamemem ipic, awut ara, wunam e amamememtam ipic, kanim ara, bare inimas opok. E kerja bwemtam ipic, ow awut ara, wunam kerja aramat ipic, ow kanim ara, bare, inimasam opok.

²⁵E mamemem ipic e amamememtam ipic awcawor aememcow, bare er ajiwar baememerec. Wunam kerja bwemtam ipic, e akerja aramat ipic awcawor aememcow, er ajiwar baememerec. Ow atakam e cem aramat ipic aotawces, ‘Or Beelsebul ara,’ inim aeces, bare ar cemew kanim inim aatcemes. E nat, e ow, e cem ow, cemew awutut aatcemes.”

²⁶“Inimas ara, car ow omar arapok. Ow e bapwirimtiwas takas, umuton aoporcemes. Owam e curuw atakam takas, jen ajikurumcemes.

²⁷E jiwic aman atakam car aotawminas, jokam atakam mamotawey. E curuw atakam jen ajimokomas, e ajarewsiapmes ow bipu, atakam mamfakaytawey.

²⁸Asmat ow, ow acatiwcemes. E nat, ar e anakat bwemcatiw asan opok. Bare, car asmat ow omar arapok. Allah nat, ow e adamam, e aranakatam, neraka aman daniwis bwemtiw fakas emcom. Bare, car Allah omar mameey.

²⁹Ow, sok kanim jamnuk, uang sen cowoknakap ajititcemes. E nat, e sok cowoknakapam cenes bwemjuney asan opok— e caricipic inimas pwicak aporcor ara.

³⁰Caram ara. Allah e cakus fin aporsipor amsom.

³¹Inimas omar arapok. Car penting ara. E sok arke nat, penting opok.”

³²“Ow e wun ow bipu atakam atawcesnew, ‘Dor Yesus mamkawi,’ inim aecesnew, doram e onam op doricipic bipu, ‘A ow doras ara,’ inim aecimin.

³³Ow nat, e wun ow bipu atakam aotawcesnew, ‘E Yesus nomsom opok,’ inim aecesnew, doram e onam op doricipic bipu, ‘A ow doras opok,’ inim aecimin.”

³⁴“Ca nat, ‘E Yesus a capinmi, ow damos mamjiom capinmi bemapom aneyef,’ inim bi binip bacecerem arapok. Dor a capinmi, damos mamjiom capinmi bemapom baney opok. Dor a capinmi owec capinmi bemapom aenawof.

³⁵Dor, atiw atakamin aricipic bom aneyof. Dor, apores atakamin arosowoc bomam, anin atakamin asok bomam, inimas aneyof.

³⁶Ow acem ow, bare ajewew ow aememcemes.

³⁷Ow damos e arisepes awut inim ajiomces, wunam damos dor kanim inim ajiomcenes, bare ar dorow memem awcawor opok ara. Ow damos e atiperes awut inim ajiomces, wunam damos dor kanim inim ajiomcenes, aram dorow memem awcawor opok ara.

³⁸Ow arop salib batawtotor opok aemcesam, dor mamkawi opok aemcesam, bare ar dorow memem awcawor opok ara.

³⁹Ow, bajorem jec awut awuces, aram bajorem opok aemcemes. Wun ow nat, kerja dor aemtamcemenes. E ow inim tugas aman damir aafces, aram ajoremcemes.”

⁴⁰“E ca atowomiwcan ow, aram dor e cem atowomiwcemenes. E cem atowomiwcenes ow, e atewenamfan ipicam cem atowomiwcemes.

⁴¹Ow, Allah atakam botaw ipic aporces, wunam ar e ipic e acem atowomiwces, bare, Allah, asan akat e owam atetamcema. Ar asan akat e aratakam botaw ipic inim atetamcowas, e owam atetamcema. Wunam, ow, jipic tarowat aporces, wunam ar e ipic e acem atowomiwces, bare, Allah asan akat e ow atetamcema. Ar asan akat e jipic tarowat inim atetamcowas, e owam atetamcema.

⁴²Atakamnak ara, ow awapes mami ow domamkawi ow aporces, wunam e ow jufu bwinakas atetamces, bare Allah e ow asan akat atetamcema araman.” Yesus inim aeef.