Read Central Asmat MATIUS 11 Bible Online

MATIUS 11 - Central Asmat bible

MATIUS 11

¹Bare. Yesus jirmec e amamkawi ow dua belas ajiwar ajirimkurumef ara, aramat ipic atakam mamememtamam, bacacapiomam, e sotop kotain kotain ajisosef.

²Yohanesam penjara cem aman cowocemapmepaw, aram e Kristus aemefas atakam jen ajief. E Yohanes masirin, e amamkawi ow, aramat ipicpu atewosomef.

³E owam jonow aramat ipic atowfes. “Or e Allah atewenamcow ipic aranew? Dar wun ipic bwenaw manmok bofe aranew?” Inim aefes.

⁴Yesus masirin, “Caram baysosey. Wunam e jen ajimokomasam, e apormokomasam, atakam Yohanes mamotawey.

⁵‘Manmok kapi ow, manmok atereymes. Bwey jini ow ajarmes. Penyakit kusta ow, dam orom aememames. Jen biri ow, jen ajimes. Damir ow ajaworsitmes. Ow e Atakam Akat e pok opok ow acacapiomames.

⁶E Yesus mamkawi bakorompim opok ow, asan akat aemapmes.’ Inim mameey.” Yesus inim aeef.

⁷E Yohanes mamkawi ow ajisosfes ara, Yesus e Yohanes atakam e ow arke aotawef. “Car e cem opok asan, ucim pok manmok batiw ajisosfokom? Car, fo, firko bawawarim manmok batiw ajisosfokomnew?

⁸Car ucim pok bapor ajisosfokom? Pakaian akat ajimomef ipic bapor ajisosfokomnew? Jakaperey. E pakaian akat ajimomames ow, raja cem aman aemapmes.

⁹Car ucim pok bapor ajisosfokom? Allah atakam botaw ipic bapor ajisosfokomnew? Owoman. Ca nat, jakaperey. Allah atakam botaw ow, kanim ara. E Yohanes nat, awut ara.

¹⁰E Alkitab e aramat ipic inim atakam atawmar ara: ‘Jakaperey. Dor e doratemen batam ipic bap atewosomcimin. Or masirin asep ara. Aramat ipic e ajarcem bwey asan akenemtiwcema.’ E Alkitab inim aema.

¹¹Atakamnak ara, e Yohanes Bwi Babwim Ipic, bare awut ara. E wun cepes ajispetiwfes ow, kanim ara. E nat, e Onam Op Pemerintah Asan aemapmes kanimnakap ow, bare awut ara. E Yohanes masirin, kanim ara.

¹²E Yohanes acacapiomef jofayam, wow ajiwaram, jokmen ow e Onam Op Pemerintah ajamkawimes ow ajurusumawiris. E jokmen ow, e Onam Op Pemerintah ajumnemporawiris.

¹³E Allah atakam botaw ow aeapomfes surat takasam, e Musa tulis aeapomef Jirmecam, e aenawcesas atakam ara. E surat takas, e Yohanes acacapiomef jofay ajiwaras ara.

¹⁴E suratam e Elia bwenaw, atakam atawfes. Bare, Yohanes e Elia araman. Car e atawfes atakam asicimamokomnew?

¹⁵Jen fo ow a atakam jen bajices.

¹⁶Awaniemames ow ucimas awcaworaram? Dor eras ucim atakam atawcey? Bare, awapes ow, pasar asan bemap jiwi awcawor ara. E jiwi, e atow akac bwe jiwi, atakam awut aamtawcemes.

¹⁷‘Dar em car emekurumtamfenom. Ca nat, di badi opokut. Daram awan bwec abwecfenom. Ca nat, bwec opokut.’ E jiwi inim aecemes.

¹⁸E Yohanes aenawef ara, ar amosam, anggur bwiam, ban opok. Ow nat, ‘E ipic jak aman, bare dat ara.’ Inim aemes.

¹⁹E Asmat Anakat Ajaworemef Ipic aenawef nat, ar amosam, bwiam, anawiri. Ow nat, ‘Jakaperey. E ipic amos paknam ipic ara. Aram jokmen bwi jayic ipic ara. Ar pemerintah uang batawanimtam kerja owam, dosa owam, ajowow ipic ara.’ Inim aemes. Allah bi binip nat, umuton cowok ara. Ow e Allah aemamaras apormesnew, ar a atakam, atakamnak apormes.” Yesus inim aeef.

²⁰Bap ara, Yesus e wun kota arke, junum bweas awut arke aemef. Asep ara masirin, ar e kota ow e adosa bak bapayem opok aporef, ar jiman e ow aafef.

²¹“E ca kota Korasim ow ajurusapcomokom. E ca kota Betsaida owam ajurusapcomokom. Dor junum bweas awutut carasan aemof. E nat, ow inim junum bweas awutut, e kota Tirusam, e kota Sidonam, aemfes ayaw, bare e ow tareynakut, dosa bak emcapayemfes. Aram kus junuk emcaakfes. Aram se emcafifes.

²²Ca nat, jakaperey. E Allah, ow siksa bwem jofay aenawcow, ar e Tirus owam, e Sidon owam, siksa kanim inim aemcema. Ar nat, siksa awutut car aemceman.

²³Ca Kapernaum owa. Allah car asicimcemannew? Opokut. Ar car daniwis aamceman. Dor junum bweas awutut carasan aemof. E nat, ow inim junum bweas awutut kota Sodom aemfes ayaw, e kota, wow ajiwaram awames.

²⁴Ca nat, jakaperey. E Allah, ow siksa bwem jofay aenawcow, ar e Sodom capinmi ow siksa kanim inim aemcema. E nat, ar siksa awutut car aemceman.” Yesus inim aeef.

²⁵E jofayam ara, Yesus atakam atawef. “Diwi. Or e onam opam, e capinmiam, aomomamem. O nat, eras e bi binip umuton owam, e amsom owam, acukumomfem, wunam eras jiwi kanim aporomtamfem. Oram inimas bwem akat aemfem. Bare, doram terima kasih atakam or aotawmin.” Inim aeef.

²⁷Yesus masirin, Allah atiw amsom ow, bare opok ara. Aricipic cowok, e atiw amsom ara. Aricipic amsom owam, bare opok ara. Atiw cowok, e aricipic amsom ara. E atiw e aricipic wun ow baporomtam, akat aema. E owam aricipic amsom ara.

²⁸“Ca wun ow, bare juturas atawmokom. Inimas car dam jipi aemamokom. Caram do enawcan. Doram ses ban car atetamcimin.

²⁹E doratakam ji eey. Do mamkawi mamememey. Inimas car ses aancomokom. Bare, do jak jirow ipic ara. Doram dorma batawsicim opok ipic ara.

³⁰E jirmec ajirimaminasam, bare dasas ara.” Yesus inim aeef.