Read Central Asmat MATIUS 12 Bible Online

MATIUS 12 - Central Asmat bible

MATIUS 12

¹Bare. E jofayam ara, Yesus gandum kebun ajaref. E Ses Ban Jo ara. E amamkawi owam amosto aememfes. Ar masirin, gandum eke akokomtanfes.

²E Parisi owam inimas aporfes. Ar masirin, “Jakaperey. A omamkawi ow, a Ses Ban Jo aemamesas, bare Allah Jirmec opowmes.” Inim aefes.

³E Yesus nat, “Car e Daud aemefas, baca bwem opoknew? Aram e akac aemfes owam, amosto aememfesen.

⁴Aramat ipic e Allah cem afiwemefen. Afiwemef masirin, ar e Allah bipu atatitamfes amos, atewenefen. E nat, aramat ipicam, e akac aemfes owam, e amos aemenfes, karowas aemfes. E amos e Allah atakam mamtaw tugas ow cowok amemenas arawen. E Jirmec inim atakam ara.

⁵E Allah atakam mamtaw tugas owam, e Allah cem aman, e Ses Ban Jo jirmec aopowmes. E nat, Allah, ‘Eras dosa ara,’ inim atakam opok. Car eras e Musa tulis aeapomef Jirmec aman, baca bwem opoknew?

⁶Ca nat, jakaperey. Arasan penting awut ipic cowok awamec. E Allah cem nat, penting kanim inim.

⁷E Alkitab atakam, ‘Dor, ow, kawey ow serow bajiom, jak aseremomamin. Do nat, ow pok dor bacatitam, jak baseremom opok.’ Ca nat, inim atakam camsomnak opok. Inimas car atakam e ow tarowat aotawfokom. “Car ow fasi ara.” Inim aefokom.

⁸Bare, e Asmat Anakat Ajaworemef Ipic, e Ses Ban Jo aramat ipic aememama” Yesus inim aeef.

⁹Bare. Yesus erasan aewjisosef. Ar masirin, e ow asembahyang cempu ajisosef.

¹⁰Erasan ara, ban sipi ipic aemapef. E erasan owam, “Yesus pwicakas aemama,” inim atakam botaw jak aserememfes. Inimas ar jonow Yesus atowfes. “Ow, dam pwicak ow, Ses Ban Jo dam ajaworomtawces, ar Allah Jirmec aopowcemesnew?” Inim aefes.

¹¹E Yesus masirin, “Ca wun ipic cowok, domba cowok omomcokomnew, wunam e domba, Ses Ban Jo, capinmi jof aman aneyfifiacownew, bare car e domba, ban aosomopcomokom, wunam e domba ajimtewcomokom.

¹²Asmat ow, bare penting awut ara. Domba penting kanim inim ara. Inimas, ow Ses Ban Jo, atakas aemces, ar Allah Jirmec bopow opok aemcemes.” Inim aeef.

¹³Aramat ipic masirin, atakam e ban sipi ipic aotawef. “E ban bajoromey.” Inim aeef. E ipicam e aban ajoromef. E ban masirin, e poman ban awcawor akatipic aememef.

¹⁴Bare, e Parisi ow afisfes. Aram Yesus bacatiw atakam aamsakamfes.

¹⁵Yesusam inim atakam jen ajief. Ar masirin, erasan aewjisosef. Ow arkeam aramat ipic fa asoromfes. Aramat ipicam e dam ow takas ajaworomtawef.

¹⁶Aram jirmec e ow ajirimef. “Kawey ow botaw arapok.” Inim aeef.

¹⁷Er e Allah atakam botaw ipic juwas Yesaya, e atawef atakam jipu bwemas ara. E atakam:

¹⁸“Jakaperey. Awamec ipic dokerja bwemtamipic ara. Dor aramat ipic damos ajiomamin. Dor aramat ipic akat aemin. Doram e doRoh e aramat ipic atetamcimin. Aramat ipicam atakam e capinmiin capinmiin ow, aotawcema. ‘Allah e atakam asakamtiwmaras, bare tarowat ara.’ Inim aecema.

¹⁹Aram owen atakam opok aemcema. Aram atakam bafakaytaw opok aemcema. Aram e bokotpu, atakam awut botaw opok aemcema.

²⁰Aram bancu e kumit ow aomcema. Aram jokmenas e jak pwicak ow bwem opok aomcema. Ar e fasias takas akumimosomkurumcow jofay ajiwar, eras aomcema.

²¹Ow takasam jirey aramat ipic aecemes.” Yesaya inim aeefen.

²²Bare, ow jiic cowok Yesus ameromfes. Dat e ipic jak aman aemapawiri. Inimas e ipic, manmok kapiam, okoram, aememawiri. Bare, Yesus e ipic ajaworomtewef. Inimas e ipic atakam epcom aememef. Aram manmok atereyef.

²³E ow takasam junum awut aefes. “Awamec ipic Daud urpis aranew?” Inim aefes.

²⁴E Parisi ow nat, e atakam jen ajifes. Ar masirin, “E Beelsebul, dat takas akepala ipic ara. Aram e fakas ewacam ipic atetamama. Inimas cowok, e ipic dat aotewerisimama.” Inim aefes.

²⁵Yesusam e ow bi binip amsom. Ar masirin, atakam e ow aotawef. “Samat cowok owen aramaman aamocesnew, aram aanioscemes. Kota ownew, cem ownew, owen aramaman aamocesnew, aram apacayoscemes.

²⁶Wunam, Iblis, e atiperes aotewerisimcownew, bare owen aramaman amocemes. Inimas e Iblisam, e ajowomam, apacayoscemes.

²⁷Ca nat, ‘Beelsebul e fakas ewamec ipic atetamama. Inimas e ipic dat aotewerisimama.’ Car dot inim atakam atawmokom. E nat, e camamkawi owam dat aotewerisimames. E dat botewerisim fakas e ow ca tetamama? Bare, e camamkawi ow, e atawmokom atakam, atakamnak opok aporomtamcemes.

²⁸E nat, e Allah Roh, e dat botewerisim fakas dor atetamaman. Inimas ara, e Allah Pemerintah carasan emcaenawor.

²⁹Ow, fak ipic cem bafiw, wunam e apok ces bwetew, bare inimas bwemem asan opok. Ar e fak ipic manam atakamjikapomces, ar e acem pok ces bwetew araman.

³⁰E do mamkawi opok ow, doratakam aopowmes. Ow kawey ow dor mamkawi mamememtam opok aeces, ar e kawey ow apacamosomcemes.

³¹Inimas ara, dor atakam car aotawmin. Allah, ow e adosa takasam, e cemew aatmesas takasam, akokoromosomtamcema. E nat, ow cemew e Roh Kudus aatces, Allah e dosa bakokoromosomtam opokut aemcema.

³²Ow, pwicak atakam, e Asmat Anakat Ajaworemef Ipic aotawcesnew, Allah e dosa akokoromosomtamcema. E nat, ow, Roh Kudus pwicak atakam aotawcesnew, Allah e dosa, wowam, e asep jofaynakutam, bakokoromosomtam opokut aemcema.”

³³Os akat, ekeam akat apecema. Os pwicak, ekeam pwicak apecema. Ow, e os eke aporces, ar e os, akat osnew, pwicak osnew, inimas aporcemes.

³⁴Amer jiwinakasa. Car jokmen ara. Ow e ajak amanas jipu cowok atakam atawcemes. Inimas car atakam akat bwemtaw asan opok.

³⁵Akat ow, e ajak aman, akatas aomomames. Inimas ar atakam akat atawmes. Pwicak ow, e ajak aman, pwicakas aomomames. Inimas ar atakam pwicak atawmes.

³⁶“Ca nat, jakaperey. Jofay ara, Allah, ow dosa, atakam asakamtiwcema. E jofay, ow, e pwicak atakam atawawirisas takas, atakam Allah arma aotawtotorcemes.

³⁷Allah, e atawawirukum atakam, akat aporcow, ar car ow tarowat ara, inim atakam asakamtiwcema. Aram e atawawirukum atakam, pwicak aporcow, ar car ow fasi ara, inim atakam asakamtiwcema.” Yesus inim aeef.

³⁸Bare, e wun Allah atakam mamememtam owam, Parisi owam, janim Yesus aanimfes. “Guru. Dar, or junum bweas bwem bapor.” Inim aefes.

³⁹Yesus masirin, atep e ow ajitef. “A awaniemames ow, bare fasi ow ara. Aram Allah aotpemames. Inimas ar junum bweas bapor janim aanimames. Allah nat, wun junum bweas, awapes ow baporomtam opok aemcema. Ar e Allah atakam botaw ipic juwas Yunus e aemefas inim cimin junum bweas cowok aporomtamcema.

⁴⁰E Yunus, bar mamincop e enam awut jak aman aemamesefen. Bare, e Asmat Anakat Ajaworemef Ipic bar mamincop e se aman aemamescema.

⁴¹E Niniwe owam, e Yunus e acacapiomefas jen ajifes, wunam e adosa bak apayemfesen. E Yunus bare, kanim ara. Arasan nat, awutnak ipic awamec. Inimas ara, Allah a awaniemames ow adosa atakam basakamtiw jofay aenawcow, e Niniwe owam asitcemes, wunam atakam a ow atawcemes. “Car ow fasi ara,” inim aecemes.

⁴²E selatan capinmi raja cowocam, e Solomo bi binip umuton atakam jen baji, e dawon opok capinmi ewinawefen, E Solomo, bare kanim ara. Arasan nat, awutnak ipic awamec. Inimas ara, Allah, e awaniemames ow, adosa atakam basakamtiw jofay aenawcow, e cowocam asitcema, wunam atakam a ow atawcema. “Car ow fasi ara,” inim aecema.”

⁴³“Dat, ow jak aman afiscow, e wasan acowojarcema. Ar ses ban asan apowcema. E nat, ar e ses ban asan baporomtew opok aemcema.

⁴⁴Ar masirin, ‘Dor e afisof cem aofiwapcimin.’ Inim aecema. Erasan aofasicow, ar e jak aman afisef ipic, cem awcawor aporcema. E cem, bare fi ara. Owam e cem aman awaramtiwfes. Aram e cem pok takas atawkenemapomfes.

⁴⁵E dat masirin, aojisoscema, wunam wun dat tujuh ajiwar ametotnawcema. E dat tujuh ajiwar, bare jokmen awutut ara. E bap dat, bare jokmen awut opok. Bare, e dat takas e ipic jak aman afiwcemes. Aram erasan aemapcemes. E ipic masirin, asan pwicaknakut aemapcema. Bap ara, asan pwicak kanim inim aemapawiri. A awaniemames fasi ow, inim cowok aemcemes.” Yesus inim aeef.

⁴⁶Yesus inim atakam e ow cowocemotawmepaw, arosowocam, arewcewesam, e cesen aememfes. Aram atakam aramat ipic mamtaw.

⁴⁷Jipic cowok masirin, atakam aramat ipic aotawefen. “Jakaperey. Orosowocam, orewcewesam, e cesen awamces. Ar atakam or mamtawen.” Inim aeef.

⁴⁸Yesus nat, atakam e aotawef ipic aotawef. “Dorosowoc cam? Dorewcewesam cam?” Inim aeef.

⁴⁹Aramat ipicam, e amamkawi ow ban ajoromef. “Awapes ow dorisepesam, dorewcewesam ara.

⁵⁰E onam op doricipic akat apormaras jipu bwem ow, bare dorewcewesam, dotarsepesam, dorisepesam, aememames.” Inim aeef.