Read Central Asmat MATIUS 13 Bible Online

MATIUS 13 - Central Asmat bible

MATIUS 13

¹Bare. E jofay cowokam Yesus e cem afisef. Ar masirin, e jopir aneyapef.

²Ow arkenakutam Yesuspu ajarewsiapfes. Inimas aramat ipic, ci aman aneyjuapef. E ow arke masirin, e fwikin aememfes.

³Aramat ipicam atakam jukpiri e ow amememtamef. E atakam amememtamef ara, ar baposomtew atakam aotawef. “Kebun kerja bwem ipic, eke bajijimirsam ajisefen.

⁴E eke ajimirsamef ara, wun e bwey asanpu aneyjuamestotorefen. Sok masirin, e eke anakurumfesen.

⁵Wun eke masirin, ek capinmi asanpu aneyjuamestotorefen. Erasan nat, jif awut opoken. Bare, e jif kow opoken. Inimas e eke asarimjittotorefen.

⁶E nat, e pok akan bimi awut opoken. Inimas e jo op atometapef ara, e pok akan sisne aemaptotorefen. Aram sa asaefen.

⁷Wun ekeam fa epcom akan aman aneyjuamestotorefen. E fa epcom akan nat, awut awanief, wunam e eke akan apwirimopefen. Aram e eke akan asanamimapomefen.

⁸Wun eke masirin, capinmi akat asanpu aneyjuamestotorefen. Aram ajittotorefen. E wun akan aporsipor masirin, eke seratus ajiwar apeteptotorefen. Wun akan aporsipor masirin, eke enam piluh ajiwar apeteptotorefen. Wun akan aporsipor masirin, eke tiga puluh ajiwar apeteptotorefen.

⁹Jen fo ow a atakam jen bajices.” Yesus inim aeef.

¹⁰E Yesus mamkawi ow masirin, aramat ipic aenawomfes. Aram jonow aramat ipic atowfes. “Or a ow baposomtew atakam aotawmem nat, ucimaram?” Inim aefes.

¹¹Aramat ipic masirin, “E Onam Op Pemerintah aenawcow jofay atakam, bare amannakut atakam ara. E amannakut atakam jen bajikurum, bare caras ara. E nat, er e ow aras opok.

¹²E atakam jen ajikurumces ow, wun atakamam jen aojicemes. Aram wun atakam awutut jen aojikurumcemes. E nat, e atakam jen bajikurum opok ow, e jen ajifesasam binip aanimcemes.

¹³E ow manmok atiwmes. E nat, ar bapornak opok aemames. Aram jen ajimes. E nat, ar jen bajinak opok aemames. Aram jen bajikurum opok aemes. Inimas ara, dor baposomtew atakam a ow aotawmin.

¹⁴A ow, e Yesaya atakam aotawefas jipu aemames: ‘Tuhan atakam, “Car jen ajiawarcomokom. E nat, car jen bajikurum opok aemcomokom. Caram manmok atiwawarcomokom. E nat, car baporkurum opok aemcomokom.

¹⁵Bare a ow bi binip jiwic aoemapfes. Aram jen biri aoemapfes. Aram e amanmok akapiapfes. E amanmok, anakatas baporasin. E ajenmakam, jen bajiasin. Ar bi binip umuton baceceremasin. Ar bi bin bafirimasin. Doram a bajortewasin.” Tuhan inim aema.’ E Yesaya inim aeefen.

¹⁶Ca nat, asan akat aememamokom. E camanmok, bare apormes. E cajenmakam ajimes.

¹⁷Atakamnak ara, Allah atakam botaw ow arkeam, ow tarowat arkeam, e manmok atiwmokomas manmok batiw jak aseremomfesen. Ar nat, eras manmok batiw opok arew. Aram e jen ajimokomas jen baji, jak aseremomfesen. Ar nat, eras jen baji opok arew.”

¹⁸“Inimas ara, car e eke bajijimirsam ipic baposomtew atakam, anakatas, jen pajiey.

¹⁹Ow, e Allah Pemerintah atakam jen ajices, e nat, jen bajikurum opok aeces, e Jokmen Ipic aenawcema. Ar e ow e jen ajices atakam bi binip atewcema. Er e eke e bwey asan aneyjuamestotoref eke inim awcawor ara.

²⁰E ek capinmi aneyjuamestotoref eke masirin, e atakam jen ajices wun ow inim awcawor ara. Ar e atakam jen ajices, jak akat aemcemes. Aram e atakam ji asarimecemes.

²¹E ow nat, e atakam mamkawi fak opok aemcemes. Inimas ar barnakap ajamkawicemes. Ow e ow e atakam mamkawi aporces, wunam ar e ow ajurusumcesnew, aemsokomcesnew, bare e ow Allah mamkawi asarimkorompimcemes.

²²E fa epcom akan aman aneyjuamestotoref eke masirin, e atakam jen ajices wun ow inim awcawor ara. E ow awames capinmias fa jakay aemcemes. Aram pok arke batat jak aseremomcemes. Inimas ar e Allah atakam bi binip acawucemes. Aram Allah kerja bwemtamnak opok aemcemes.

²³E capinmi akat aneyjuamestotoref eke masirin, e atakam jen ajices wun ow inim awcawor ara. Ar e atakam jen ajikurumcemes. Ar Tuan kerja akat aemtamcemes. Wun ow, ow seratus ajiwar, Tuhan mamkawi amememapomcemes. Wun masirin, ow enam puluh ajiwar, Tuhan mamkawi amememapomcemes. Wun masirin, ow tiga puluh ajiwar, Tuhan mamkawi amememapomcemes.” Yesus inim aeef.

²⁴Bare. Aramat ipic, wun baposomtew atakam e ow aotawef. “E Onam Op Pemerintah, bare jipic cowok, eke akat, e akebun asan atawapomef jofay awcawor ara.

²⁵E nat, ow isi apowesmepes, ajawew ipic aenawesmepen. Ar fumin eke, e gandum aman atawapomefen. Ar masirin, aojisosefen.

²⁶Bare, e gandum akan ajittotorefen. Ar masirin, anakat apetotorefen. E fumin akanam ajittotorefen.

²⁷E kerja bwemtam ow masirin, e cem aramat ipicpu ajisosfesen. ‘Tuan. Or eke akat e okebun atawapomfemnew? E fumin akan nat, ocenak asan ewenawef?’ Inim aefesen.

²⁸Aramat ipic masirin, Jewew ipic eras aemef.’ Inim aeefen. E kerja bwemtam owam, ‘Or, dar e fumin basusumtaw akat open?’ Inim aefesen.

²⁹E aramat ipic masirin, Basusumtaw arapok. E fumin asusumtawcokom, car e gandum akanam akac asusumtawcomokom openow.

³⁰E gandumam, e fuminam, e gandum eke akokomtawcan jofay ajiwar, akac inim baapjitces. E jofay masirin, dor jirmec e eke bakokomtaw ow ajirimcimin. ‘Car e fumin mamtakamtawanimapomey. Wunam biram mamjiktotorey. E fumin takas biram ajiktotorcokom, sos mamurumtiwey. E gandum masirin, asep mamtawanimapomey. E eke e dogudang aman mamtawapomey.’ Inim aecimin.” Yesus inim aeef.

³¹“Aramat ipic wun baposomtew atakamam e ow aotawef. E Onam Op Pemerintah, sesawi eke inim awcawor ara. Ow e eke e akebun asan atewapomcemes.

³²E eke bare kanimnakap ara. Wun eke takas bare awut ara. E nat, e eke ajitcow, ar akan awutut aapjitcema. E wun cesapok akan takas, bare kanim inim ara. E eke kanim akan, bare os kari inim aememcema. Sokam co e pam aecemes.” Yesus inim aeef.

³³Aramat ipicam wun baposomtew atakam e ow aotawef. “E Onam Op Pemerintah, bare bibit roti awcawor ara. Cowoc cowok e bibit roti atewefen. Aram tepung awut atewefen. Ar masirin, e bibit rotiam e tepungam aartamtiwefen. Inimas e tepung takas apepeefen.” Inim aeef.

³⁴Bare, Yesus eras takas baposomtew atakam e ow arke aotawef. E atakamin atakamin aotawef ara, ar baposomtew atakam aotawef.

³⁵Er a Allah atakam botaw ipic e atawef atakam jipu ara. E atakam: “Dor atakam e ow aotawcey, dor baposomtew atakam aotawcimin. Allah a capinmi akenemapomef jofayam, wow ajiwaram, aramat ipic e atakam acukumtkiwef. Do nat, e atakam e ow aotawcimin.” Inim aeefen.

³⁶Bare. Yesus e ow arke bakan ajiemef. Ar cem afiwef. E amamkawi owam aramat ipic aenawomfes. “E kebun asan fumin baposomtew atakam, botawtamcarowey.” Inim aefes.

³⁷Aramat ipic masirin, “E eke akat batawapom ipic, bare e Asmat Anakat Ajaworemef Ipic inim awcawor ara.

³⁸E kebun asan masirin, awames capinmi inim awcawor ara. E eke akat, e Allah Pemerintah Asan afiwces ow inim awcawor ara. E fumin masirin, e Jokmen Ipic ajamkawimes ow inim awcawor ara.

³⁹E fumin eke atawapomef jewew ipic, bare Iblis inim awcawor ara. E eke bakokomtaw jofay, bare e esepnak jofay inim awcawor ara. E eke bakokomtaw ow masirin, malaikat inim awcawor ara.

⁴⁰Ow e fumin atawanimapomfes, wunam sos aurumtiwfes, bare e asepnak jofayas inim awcawor ara.

⁴¹E Asmat Anakat Ajaworemef Ipic aPemerintah ajamkawimes wun ow, bare kawey ow dosa bwem bajijimtaw ow ara. Wun masirin, e ipic aratakam bopow ow ara. E aramat ipic nat, e amalaikat jirmec ajirimcema. E malaikat masirin, inim ow takas aarewfamapomcemes.

⁴²Ar masirin, e ow, e jismak asan aman ajiwtawapomcema. Erasan ara, ow bwec abweccemes. Aram dam jen ajicemes.

⁴³E ow tarowat masirin, e aricipic Pemerintah Asan, e jopok inim aterememcemes. Bare, jen fo ow a atakam jen bajices.”

⁴⁴“E Onam Op Pemerintah, bare ow pok akatnakut kebun asan acukumapomfes inim awcawor ara. Kawey ipic cowok masirin, e pok aporefen. Ar masirin, e pok aopwipwirimtiwefen. Aram jak akatnakut aememefen. Inimas ar e apok takas uang ajitamerkurumef, wunam e kebun capinmi ajititefen.”

⁴⁵“Wunam, e Onam Op Pemerintah, bare ek bipiw juwas mutiara bapowpor pedagang ipic inim awcawor ara.

⁴⁶Ar mutiara ek cowoknakap den akatipic aporefen. Ar masirin, e apok takas uang ajitamerkurumef, wunam e mutiara ek ajititefen.”

⁴⁷“Wunam, e Onam Op Pemerintah, bare jim inim awcawor ara. Ow e jim apicemes. Aram cīncīn enam apitewcemes.

⁴⁸Ar e jim enam arke aporces, e jim awacimcemes. E enam aoworomcemes. E akat enam, ese atewapomcemes. E pwicak enam masirin, ajiwosomcemes.

⁴⁹Bare, e asepnak jofayasam inim cimin ara. Malaikatam aenawcemes. Ar e jursumec owam, e tarowat owam, aporsipor asan ajiemcemes.

⁵⁰Ar e jursumec ow e jismak asan ajiwimcemes. Erasan ara, ow bwec awutut abweccemes. Aram dam jen ajicemes.”

⁵¹“Car a atakam takas jen ajimokomnew?” Yesus inim aeefen. E ow masirin, “Owokow.” Inim aefes.

⁵²Aramat ipic masirin, “Inimas ara, e Allah Jirmec mamememtam ow, e Onam Op Pemerintah atakam ji aeces, ar cem aramat ipic inim awcawor ara. Ar tarey pokam, ay pokam, e apok cem afimisimcemes.” Yesus inim aeefen.

⁵³Bare. Yesus e baposomtew atakam atawkurumef. Atakam atawkurumef masirin, ajisosef.

⁵⁴Aram e arop kota ajisosef. Erasan ara, ar sembahyang cem aman, atakam amememtamef. Inimas e ow junum awut aefes. Aram atakam atawfes. “E abi binip umutonnakut, aramat ipic ca tetamef? A junum bweas bwem fakas ca tetamef?

⁵⁵Awap ipic, e os tukang ipic atiw araman. Arosowocam Maria araman. Arewcewes masirin, Yakobusam, Yusufam, Simonam, Yudasam, araman.

⁵⁶E atarsepesam takas dar akac aemapmom araman. Inimas ara, a takas, a aramat ipic ca tetamef?” Inim aefes.

⁵⁷Bare, aram bifan e Yesus afayomfesen. E Yesus masirin, “Kawey ow, Allah atakam botaw ipic asicimcemes. E nat, asamat owam, acem owam, Allah atakam botaw ipic basicim opok aemcemes.” Inim aeef.

⁵⁸Bare, aramat ipic e ow a basicim opok aporef. Inimas ar erasan junum bweas arke opoknakap aemef.