Read Central Asmat MATIUS 14 Bible Online

MATIUS 14 - Central Asmat bible

MATIUS 14

¹Bare. E jofay ara, Herodes e Yesus atakam jen ajiefen. E Herodes e Galilea capinmi raja ipic kanim arawen.

²Aramat ipic atakam e akerja bwemtam ow aotawefen. “E Yesus, bare Yohanes Bwi Babwim Ipic ara. E Yohanes emeojaworsitef. Inimas ar e junum bweas awut aemama.” Inim aeefen.

³Ametnak ara, Herodes, e arewec juwas Filipus arem aotewetefen. E arem juwas Herodias arawen. Yohanesam atakam e Herodes aotawa aeefen. “Or e cowoc aotewetmem, bare Allah Jirmec aopowmem.” Inim aea aeefen. Herodesam, inimas aporef ara, ar ow e Yohanes ban bakimomam, ban manam bajikapomam, penjara cem aman bajiwtewapomam, inim jirmec ajirimefen.

⁵E Herodes, e Yohanes bacatiw, akat aemefen. E nat, ar e ow arke omar aeefen. E ow arke abi binip ara. “E Yohanes, Allah atakam botaw ipicut araman.” Inim bi binip aceceremfesen.

⁶E Herodes ajispetiwef hari ulang tahun, ow pokbwi aanfesen. E Herodias aporesam e pokbwi jaki ow bipu di adiefen. Herodes masirin, eras akat cowok aporefen.

⁷Aram e cowoc atayi aeefen. “Pok janim animcan. Dor e pok o batetam.” Inim aeefen.

⁸Arosowoc masirin, atakam e apores aotawefen. E apores masirin, e arosowoc atakam jipu, e Herodes aotawefen. “E Yohanes Bwi Babwim Ipic akus, piring aman arasan tetamcan.” Inim aeefen.

⁹Bare, e raja e cowoc janim aanimefas jen ajiefen. Ar masirin, jak pwicak awut aemapefen. E nat, ar e atayi aeefas aporefen. Aram e pokbwi jaki ow aporefen. Inimas ar ow eras e cowoc batetam jirmec ajirimefen.

¹⁰Aram ow Yohanes kus e penjara cem aman basakamtew jirmec ajirimefen.

¹¹Ow masirin, e kus piring aman e pokbwi cem atowomiwfesen. Atowomiwfes masirin, e cowoc atetamfesen. E cowocam e kus e arosowoc aotetamefen.

¹²E Yohanes ajamkawifes ow masirin, e bini amertewfesen. Aram e bini awerem aman ajiwtatiwfesen. Ar masirin, Yesus ameromfes, wunam eras atakam aotawtamfes.

¹³Yesus inim atakam jen ajief, ar erasan aewjisosef. Ar ci anajuwef, wunam cem opok asan arop ajisosef. E ow arkeam inimas atakam jen ajifes. Aram e akota aporsipor aewjisosa aefes. Aram camow e Yesus fa asep asoromfes.

¹⁴Bare, Yesus asowkuef. Asowkuef masirin, ar e ow arkenakut aporef. Aram e ow sawes akat aoworporef. Wunam, ar e ow aman, dam ow ajaworomtawef.

¹⁵Bare, jo atief. Jo atief masirin, Yesus mamkawi ow aramat ipic aenawomfes. “Arasan cem opok asan ara. Joam emcatior. A ow arke baysos jirmec bajirimey. Ar a samatin samatin, amos pok bajittameran bajisosces.” Inim aefes.

¹⁶Yesus masirin, “A ow baysos arapok. Car amos pok a ow carma tatamey.” Inim aeef.

¹⁷E ow masirin, “Da nat, arasan amos bokor lima ajiwarnakapam, enam jamnuknakapam, awomcom ara.” Inim aefes.

¹⁸Aramat ipic masirin, “Bare a pok do towotnawtamcan.” Inim aeef.

¹⁹Aramat ipic masirin, e ow e fumin ton baneypwikaptotor jirmec ajirimef. Aram e amos bokor lima ajiwaram, e enam jamnukam, atewef. Aram manmok onam op apemtometemef. Aram terima kasih atakam Allah aotawef. Wunam, e amos akokomef. Amos akokomef masirin, ar e amos e amamkawi ow atatamef. E mamkawi ow masirin, e amos, e ow arke aseyetamfes.

²⁰Bare, e ow takas e pok aanfes. Aram jak anapitaptotorfes. Owam e daeremtiwfes pok, ese dua belas ajiwar aowapomfes.

²¹E amos aanfes ower ow, bare lima ribu ajiwarnew ara. Ar e cepesam, jiwiam, bajicucumir opok.

²²Inimas aemfes masirin, Yesus jirmec e amamkawi ow, asarimjirimefen. Caram poman bap ca takam jirtayey. Dor asep bajinaw. Inim aeefen. Aramat ipic masirin, e ow arke aporsipor cem baysos jirmec ajirimef.

²³Ar e ow arke cem baysos jirmec ajirimef masirin, janim Allah arop manim, sikon op aaptometef. E jo asapimnemef ara, aramat ipic arop aemapefen.

²⁴E mamkawi ow nat, e jicupum aemsefes. Foam e ci cimen aotpemef. Inimas waam e ci ajawumef.

²⁵Iram fak masirin, Yesus e owpu ajinawomseef. Ar e bwi ton ajaref.

²⁶E amamkawi ow, aramat ipic bwi ton bajar aporfes. Ar masirin, omar aefes. “Ja dat ara!” Inim aefes.

²⁷Yesusam atakam e ow asarimotawef. “Jak faka! Do Yesus ara. Omar arapok.” Inim aeef.

²⁸Petrus masirin, “Tuhan. Or aranew, bare, dor e bwi ton orpu bajar, jirmec bajirimcan.” Inim aeef.

²⁹Yesus masirin, “Dey!” Inim aeef. Bare. Petrus e ci aewsowneyef. Ar masirin, Yesuspu e bwi ton ajaref.

³⁰E nat, ar e fo awut aporef ara, omar aeef. Aram bwi cowocjupumepaw, wunam atakam awut afakaytawef. “Tuhan. Do bajortewcan.” Inim aeef.

³¹Yesus masirin, e ban asarimjoromwenemef. Aram aramat ipic ban ajimopef. “Or dor basicim kanimnakap aemem. Or ucim oram emem?” Inim aeef.

³²E ipic jamnuk masirin, ci asawufes. Ci asawufes masirin, e fo atayuef.

³³E ci aman aemsefes owam e Yesus asicimfes. “Or Allah atiw araman.” Inim aefes.

³⁴Bare, aram poman aapirfesen. Poman aapirfes masirin, Genesaret capinmi ajirtayfes.

³⁵E erasan ower ow, Yesus amsom ara. E owam, e capinmi takas dam ow bayte, jirmec ajirimfes. Ow masirin, e dam ow takas Yesuspu atowocenfes.

³⁶Aram e dam ow e Yesus baju bip ban bakurum cowok, janim aramat ipic aanimfes. Bare, e baju bip ban akurumfes ow takasam, ajaworsita aefes.