Read Central Asmat MATIUS 15 Bible Online

MATIUS 15 - Central Asmat bible

MATIUS 15

¹Bare. E Parisi owam, e Allah Jirmec mamememtam owam, Yerusalem aewjisosfes, wunam Yesus aenawomfes.

²Aram atakam aramat ipic aotawfes. “E omamkawi ow, e darafas ow e tayimirtitamforowas, jipu bwem opok. Amos pok aanmes, ar ban bwi batakamcicikem opok aemames. Ar ucim inimaram?” Inim aefes.

³Yesus masirin, “Car e carafas ow e tayimirtitamfanas jipu aemokom, wunam Allah Jirmec aopowmokom. E ucim inimaram?

⁴E Allah jirmec ajirimef. ‘Oricipicam, orosowocam, mamsicimawarey.’ Wunam, ‘Ow, cemew atakam, e aricipicnew, e arosowocnew, aotawces, e cemew atakam ow bacatiwey.’ Allah inim aeefen.

⁵E atakam amememtamamokomas nat, ‘Ow, atakam e aricipicnew, arosowocnew, aotawcow, Dor or atetamcimin uang, bare Allah emcatetamof,’ inim aecow,

⁶e ipic, pok e arownucur ow batetam opok baemcow. Inim aemokom. Inimas car e carafas ow e tayimirtitamfanas jipu aemokom, wunam Allah atakam ajiwosomamokom.

⁷Car pir bwe ow ara! Ametnak ara, Yesaya e aemcokomas atakamnak aotawef:

⁸‘Allah atakam ara: A ow ewen picin cowok dor asicimamenes. E nat, e ajak aman ar dor mamkawi opokut.

⁹Aram desen asicimamenes. E atakam amememtamamesas, bare asmat jirmec cowok ara. Er dojirmec opok. Allah inim aema.’ Yesaya ini aeef.” E Yesus inim aeef.

¹⁰Bare. Yesus e ow arke ajateef. Wunam atakam e ow aotawef: “A atawmin jen foa. Bare, a atakam jen bajikurumey.

¹¹Memem pok, ow bweyof afiwcow, e pok e ow dosa bwemas opok. E nat, e bweyof afiscowas, e ow dosa bwemas ara.” Inim aeef.

¹²E mamkawi ow masirin, e aramat ipic aenawomfes. “E Parisi ow, e atawerem atakam jen ajieres ara, ar jak amop apwimaperes.” Inim aefes.

¹³Yesus masirin, “E onam op doricipic, e ar batewapom opok pok akan takas, bimi emcom asusumtawcema.

¹⁴Bare, e ow inim baemapces. Ar manmok kapi ow inim cimin ara. Ar wun manmok kapi ow banfe ajimomatmes inim cimin ara. Bare, manmok kapi icip, wun manmok kapi ipic banfe ajimomatcow, e ipic jamnuk takas, jof akac aneyfifiapcemes araman.” Inim aeef.

¹⁵E Petrus masirin, “E baposomtew atakam aotawmem, ucim inimaram? Atakam otawcarowey.” Inim aeef.

¹⁶Yesusam, “Wow ajiwar, caram e atakam jen bajikurum opoknew?

¹⁷Bare, memen pok bweyof afiwcow, jak com aman afiwcema, wunam aofiscema. Caram inimas camsom opoknew?

¹⁸E nat, e bweyof afiscowas, e ow abi binip jipuas ara. Eras e ow dosa bwemas ara.

¹⁹Ow abi binip jipuas nat, pwicakas ara. Inimas e ow, wun ow acatiwcemes. Aram cen cemen osom aemcemes. Wun jursumecasam aemcemes. Aram pok osom aecemes. Suw atakamam atawcemes. Cemew atakamam atawcemes.

²⁰Eras, ow dosa bwemas ara. E nat, ow ban bwi batakamcicikim opok aemces, wunam pok aances, bare eras e ow dosa bwemas opok.” Yesus inim aeef.

²¹Bare. Yesus erasan aewjisosef. Wunam ar e kota Tirusam, e kota Sidonam, e ajawosmar capinmi ajisosef.

²²Kanaan capinmi cowocam, erasan aememef. Aram Yesus aenawomef. Wunam, “Tuan! Daud urpisa! Saw akat oworporcan. Dat e dopores e jak aman aemapma. Inimas dopores asan pwicak aemapma.” Inim aeef.

²³Aramat ipic nat, atep bajit opok. E amamkawi ow masirin, aramat ipicpu aenawomfes. “E cowoc baysos, jirmec bajirimey. Ar da soromamarow, wunam atakam afafakaymar ara.” Inim aefes.

²⁴E Yesus masirin, “Allah dor e Israel owpu cowok atewosomfan. E ow, apakapiosmes domba inim cimin ara.” Inim aeef.

²⁵Bare, e cowoc aenawef. Wunam ar e aramat ipic bipu bi fop aneyjiapef. “Tuan! Asan akat dor omcan!” Inim aeef.

²⁶Yesus masirin, “Do tiperes amos, juwur bajiwitam, bare pwicak ara.” Inim aeef.

²⁷E cowoc nat “Tuan. E atawmem atakam, bare atakamnak ara. E nat, juwur aramat ow aramos e cenes juneycow, e juwuram e amos bimis aancemes.” Inim aeef.

²⁸Yesusam atakam e cowoc aotawef. “Or do basicimnak aemamenem! Bare dor e jak aserememamemas jipu aemamin.” Inim aeef. Aramat ipic masirin, e cowoc apores asarimjaworomtewef.

²⁹Bare. Yesus erasan aewjisosef. Ar masirin, e Galilea jopir ajaref. Aram sikon op aaptometef, wunam apwikapef.

³⁰Ow arkenakutam aramat ipicpu aenawomfes. Ar japow owam, kamtar sipi owam, manmok kapi owam, okor owam, wun ow arkeam, Yesus bipu atawapomfes. Aramat ipic masirin, e ow ajaworomtawef.

³¹Bare, e okor ow atakam atawa aefes. E kamtar sipi owam kamtar akat aemema aefes. E japow owam bwey ajara aefes. E manmok kapi owam manmok atiwa aefes. Erasan aememfes ow arkeam inimas aporfes. Ar masirin, Allah asicimfes. Bare, Allah e Israel ow arAllah ara.

³²Wunam, Yesus e amamkawi ow ajateef. “Dor awapes ow arke sawes akat aoworpormin. Aram bar mamincop dar akac aemapmom. Aram amos opok aemapmes. E wun ow damasan opok aenawfes. Inimas dor e ow amos memen opok baysomosom pwicak ara. Ar bowsec mankes bweamesasin.” Inim aeef.

³³E mamkawi ow masirin, atakam aramat ipic aotawfes. “Dar cem opok asan aememamom. Dar a ow arke jak bapitap amos, ocenak asan atawcom?” Inim aefes.

³⁴E Yesus masirin, “E awomcokom amos bokor ucim ajiwararam?” Inim aeef. E ow masirin, “Dar amos bokor tujuh ajiwaram, enam kanim mamincopam, awomcom ara.” Inim aefes.

³⁵Bare, aramat ipic e ow arke cenes baneypwikap jirmec ajirimef.

³⁶Aramat ipic masirin, e amos bokor tujuh ajiwaram, e enamam, atewef. Wunam, ar terima kasih atakam Allah aotawef. Ar masirin, e pok akokomef. Akokomef masirin, ar e pok amamkawi ow atetamef. E amamkawi ow masirin, e pok, e ow arke aseyetamfes.

³⁷E owam e pok aanfes. Aram jak anapitaptotorfes. E Yesus mamkawi ow masirin, e datiwfes amos pok, ese tujuh ajiwar asimapomfes.

³⁸E pok aanfes ower ow, empat ribu ajiwar ara. Wunam cepesam, jiwiam, ara.

³⁹Bare, Yesus e ow baysos, jirmec ajirimef. Ar masirin, ci anajuwef, wunam Magadan capinmi ajiref.