Read Central Asmat MATIUS 16 Bible Online

MATIUS 16 - Central Asmat bible

MATIUS 16

¹Bare. E Parisi owam, e Saduki owam, Yesuspu aenawomfes. Ar aramat ipic bwemporen. Inimas ar Yesus onam op junum bweas ar baporomtam janim aanimfes.

²Yesus nat, [“Jo asapineycow, car atakam aotawcomokom, ‘E joas esakam ducur ara. Inimas to jo akat aemapcomom.’ Inim aecomokom.

³Wunam tamnakap ara, caram, ‘E joas esakam ducur ara. Inimas wow jo pwicak aemapcomom.’ Inim aecomokom. Bare, car e onam opas camsom ara. Ca nat, e Allah a wow jofay aporomtamamaras camsom opok.]

⁴A awaniemames ow, bare fasi ow ara. Aram Allah aotpemames. Inimas ar junum bweas bapor janim aanimames. Allah nat, wun junum bweas, awapes ow baporomtam opok aemcema. Ar e Yunus e aemefas inim cimin junum bweas cowok aporomtamcema.” Yesus inim aeef. Bare, aramat ipic e ow bakan ajiosef. Ar masirin, e wun asan aojisosef.

⁵Bare, e Yesus mamkawi ow poman ajirfes. E nat, ar amos pok batowomuw binip aanimfes.

⁶Yesusam atakam e ow aotawef. “Caram manmok faka. Car e Parisi owam e Saduki owam, e abibit roti pimicima.” Inim aeef.

⁷E amamkawi ow masirin, atakam aamtawfes. “Aramat ipic dar amos pok batowomuw opok apormar ara openow.” Inim aefes.

⁸Yesusam e ow aratakam aporef. “Car do basicim kanimnakap aemamenokom. E car amos pok opok atakam aamtawmokom, ucimaram?

⁹Car wow ajiwar camsom opoknew? Caram binip emeanimfokomnew? Car e amos bokor ban cowok takas, e ow lima ribu ajiwar sey aseyetamfokom, e amos aotawanimfokom, ese ucim ajiwararam?

¹⁰Wunam, car e amos bokor tujuh ajiwar, e ow empat ribu ajiwar sey aseyetamfokom, e amos aotawfokom, ese ucim ajiwararam?

¹¹E atawmin atakam, amos poknak atakam opok. Ca nat, inimas bapor opok ucimaram? Bare, car e Parisi owam, e Saduki owam, abibit roti pimicima.” Inim aeef

¹²E ow masirin, Yesus bibit rotinak atakam opok aporfes. Yesus nat, e Parisi owam, e Saduki owam, e atakam amememtamfesas, atakam atawef. E ow masirin, inimas aporfes.

¹³Bare. Yesus e Kaisarea Filipi capinmi ajarapef. Ajarapef masirin, jonow e mamkawi ow atowporef. “A Asmat Anakat Ajaworemef Ipic ca ipicam? Ow ucim atakam atawmes?” Inim aeef.

¹⁴E ow masirin, “Wun ow atakam, Ar Yohanes Bwi Babwim Ipic ara. Wun masirin, ‘Ar Elia.’ Wun masirin, ‘Ar Yeremia aranew, wun Allah atakam botaw ipic aranew.’ Inim aemes.” E ow inim aefes.

¹⁵E Yesus masirin, “Ca nat, ucim bi binipam? Do ca ipicam?” Inim aeef.

¹⁶Simon Petrus araw, “Or e Allah Aeremtewef Ipic ara. Or e jiwne Allah atiw ara.” Inim aeef.

¹⁷E Yesus masirin, “Simon. Or Yunus atiw ara. Asmat ow e atawmem atakam or batetam opok. E onam op doricipic e bi binip or atetamfan. Inimas or asan akat aemapmem ara.

¹⁸Doram atakam or aotawmin. Or Petrus ara. E do basicim barewsi ow, cem cimin ara. Doram e cem a ek ducur ton aeapomtamcimin. E damir ow asan fak dat takas, e ow bwemkumimosom asan opok.

¹⁹Dor e Onam Op Pemerintah Asan kunci or atetamcimin. Or awames capinmi acuw aatcemas, bare Allaham eras e onam op acuw aatcema. Or awames capinmi e akat aporcemas, bare, Allaham eras e onam op akat aporcema.” Yesus inim aeef.

²⁰Aramat ipic masirin, jirmec fak e amamkawi ow ajirimef. “Dor e Allah Aeremtewef Ipic ara. Ca nat, inim atakam kawey ow botaw arapok.” Inim aeef.

²¹Bare. E jofay ajiwar, Yesus e aemcowas, atakam umuton cowok e amamkawi ow aotawa aeef. “Dor Yerusalem ajisoscimin. E ownucur owam, e Allah atakam mamtaw tugas ow awutam, e Allah Jirmec mamememtam owam, dor bajurusum awutnakut aemcemenes. Ar dor acatiwcemenes. Bar mamincop masirin, Allah dor aojaworomsumutumceman.” Inim aea aeef.

²²Bare, Petrus, Yesus, e adam sotoppu, ban acajimtewef. Aram Yesus jiman aafef. “Tuhan. Allah or inimas bwem batetam opok!” Inim aeef.

²³Yesus masirin, asamanam ajiomef. Asamanam ajiomef masirin, atakam Petrus aotawef. “Iblis. Oram cey! E dobipu memem arapok. Or dor akekemamenem. E bi binip aceceremamemas, bare asmat desen bi binipas ara. Er Allah bi binip aceceremamaras jipu opok.” Inim aeef.

²⁴Wunam, Yesus atakam e amamkawi ow aotawef. “Ow dor mamkawi akat aemcenes, ar aropas bi binip bacecerem arapok. Aram arop salib batawtotorces, wunam bajamkawicenes.

²⁵Ow, bajorem jak aserememces, aram bajorem opokut aemcemes. Wun ow nat, kerja dor aemtamcemenes. E ow inim tugas aman damir aafces, aram ajoremcemes.

²⁶Ow awames capinmi pok takas atatkurumcesnew, e nat, aram bajorem opok aemcesnew, bare ar asan akat bwememap asan opok. Ow, e ajiwne batamemawaras, pok bwemjitit asan opok.

²⁷Bare, e Asmat Anakat Ajaworemef Ipic, e aricipic arakatnakutas epcom aneycema. E amalaikatam akac aneycemes. Aramat ipic masirin, e owin owin e aemawirisas jipu, amatam ajicema.

²⁸Atakamnak ara, asep jofay, e Asmat Anakat Ajaworemef Ipic, jirmec, ow takas ajirimkurumcema. Bare, wun awamces ow, e jofay ajiwar, damir baf opok aemcemes.” Yesus inim aeef.