Read Central Asmat MATIUS 17 Bible Online

MATIUS 17 - Central Asmat bible

MATIUS 17

¹Bare. Bar enam ajiwar aemapfes. Bar enam ajiwar aemapfes masirin, Yesus, e Petrusam, e Yakobusam, e Yakobus arewec Yohanesam, opnakut sikon arop atowotometef.

²Ar e ow bipu, wun bi ajaworemefen. E abi, jopok inim aserememefen. E apakaianam den fwesaknakut ajaworemefen.

³Bare, Musaam, Eliaam, onam op ewneyfes, wunam e ow bipu ajisomfesen. Ar atakam e Yesus aamtawfesen.

⁴Petrus masirin, atakam Yesus aotawefen. “Tuhan. Dar arasan aememamamom, bare akat cowok ara. Or akat aporcem, dor puk cem mamincop arasan car bweapomtam. Wun cowok or. Wun cowok Musa. Wun cowok masirin, Elia.” Inim aeefen.

⁵Aramat ipic atakam cowoctawmepaw, jak fwesaknakut e ow asarimpwirimomefen. Atakamam e fwesaknakut jak aman akoreyisimefen. “Awamec ipic dotiw ara. Dor aramat ipic damos ajiomamin. Dor aramat ipic akat ara. Caram aratakam jen pajiey.” Inim atakam jen ajifesen.

⁶E mamkawi ow inim atakam jen ajifes ara, ar cenes aneyjuamestotorfesen. Aram omar awutnakut arawen.

⁷Yesus masirin, e ow ameromefen. Aram e ow ban akurumefen. “Omar arapok.” Inim aeefen.

⁸E mamkawi ow masirin, Yesus manmok apematamfesen. Aram Yesus arop aporfesen.

⁹Wunam, sikon ewneyfes ara, Yesus jirmec e ow ajirimefen. “E apororokomas, atakam kawey ow botaw arapok— e Asmat Anakat Ajaworemef Ipic aojaworsitcow jofay ajiwara.” Inim aeefen.

¹⁰E mamkawi owam jonow aramat ipic atowporfesen. “E Allah Jirmec mamememtam ow atakam, ‘E Elia bap a takam aenawcema.’ Inim aemes. E nat, e ow inim atakam, ucim inimaram?” Inim aefesen.

¹¹Aramat ipic masirin, “E Elia bwenaw, wunam e atakam takas bafafaytiw araman.

¹²Ca nat, jakaperey. E Elia, bare emcaenawef. E ow nat, aramat ipic amsom opok. Aram e aramat ipic ajurusumfes. Aram e ajak asinomfesas jipu e aramat ipic aomfes. Aram inimas cowok e Asmat Anakat Ajaworemef Ipic ajurusumcemes.” Inim aeefen.

¹³Yesus inim atakam aotawef masirin, e mamkawi ow, ar Yohanes Bwi Babwim Ipic atakam atawef aporfesen.

¹⁴Bare. Ar e ow arkepu aofasifes. Jipic cowok masirin, Yesuspu aenawomef. Aram aramat ipic bipu jine onok aneyotapef.

¹⁵Ar masirin, “Tuhan. E dotiw saw akat oworportamcan. Ar jis apicema. Aram ajurusemcema. Aram jīsām sapiapa, bwiam pipua, inim aecema.

¹⁶Dor e jiwi e omamkawi owpu atowoceney. E ow nat, e jiwi bwemjaworomtew asan opok.” Inim aeef.

¹⁷Yesus masirin, atakam e mamkawi ow aotawef. “Car do basicim opok awaniemamokom ow ara. Caram fasi ow ara. Dor car akac ucim jofay ajiwar aoememcey? Dor jak jirow ca bom, ucim jofay ajiwararam? Bare, e jiwi arasan towotnawey.” Inim aeef.

¹⁸Yesus, e jiwi e jak aman dat, jirmec fak ajirimef. E dat masirin, e jiwi jak aman aewfisef. E jiwiam, asan akat asarimememef.

¹⁹Wunam, e mamkawi ow arop, Yesuspu aenawomfes. “Dar e dat botewerisim empororom opok, ucim inimaram?” Inim aefes.

²⁰Yesus masirin, “Car dor basicim kanimnakap aemamokom. Inimas car eras bwemem asan opok. Atakamnak ara, sesawi eke, bare kanimnakap ara. E nat, car e dofakas inim kanimnakap asicimcokomnew, caram e sikon atakam botaw ara, ‘Erasan jisosey.’ Inim atakam e sikon aotawcokom, ar erasan ajisoscema. E ca bwemem asan opokas, bare opok cowok aemcema. [

²¹E nat, ow amos pok bamase opok aemces, wunam janim Allah manim opok aemces, ar inim dat bwemotewerisim asan opok.]” Yesus inim aeef.

²²Bare. Yesusam, e mamkawi owam, e Galilea capinmi cowkon aemapfes. Aramat ipic masirin, “Jipic cowok e Asmat Anakat Ajaworemef Ipic, e jokmen ow aotasimemtamcema.

²³E owam, aramat ipic acatiwcemes. Bar mamincop masirin, Allah, aramat ipic aojaworomsumutumcema.” Inim aeef. Bare, e ow jak pwicak aemapfes.

²⁴Bare. Ar Kapernaum ajaremfes. Kapernaum ajaremfes masirin, e Allah cem uang batawanim ow, Petrus aenawomfes. “E caguru, e Allah jirmec ajirimef Allah cem uang, atetamcema openow.” Inim aefes.

²⁵Petrus masirin, ‘Atetamcema.’ Inim aeef. Bare, Petrus cem afiwef. Yesusam atakam bap a takam aotawef. “Simon. Awames capinmi raja ow, ow, uang ar batetam jirmec ajirimcemes. Uang e raja ow atatamcemes ow nat, ucim owaram? Arop samat aranew? Kawey samat aranew? Or ucim bi binip aceceremamem?” Inim aeef.

²⁶Petrus masirin, “Kawey samat, uang, e raja ow atetamcemes.” Inim aeef. Yesus masirin, “Inimas ara, e raja ow asamat, uang, e raja ow batetamji opok aemcemes.

²⁷E nat, dar e Allah cem uang batawanim ow, jak pwicak bemapom arapok. Inimas or e jopir aapneyey. Oram bakik mamtamopey. E bap ajimtewcem enam mamateway. E enam abweyof aman, uang logam cowok aporcemem. E uangam mamatewey. E ow tetamey. E uang, doram, oram, e Allah jirmec ajirimef Allah cem uang atetamcomomas ara.” Yesus inim aeef.