Read Central Asmat MATIUS 18 Bible Online

MATIUS 18 - Central Asmat bible

MATIUS 18

¹Bare. E jofayam ara, e mamkawi ow Yesus aenawomfes. “E Onam Op Ipic Pemerintah Asan, ow awutnak ca owaram?” Inim aefes.

²Aramat ipic masirin, jiwi cowok ajateef. Aram e jiwi e ow wasec atewemef.

³Yesus masirin, “Atakamnak ara, car pwicakas bak bapayem opok aemcokom, wunam jiwi inim cimin memem opok aemcokom, car e Onam Op Pemerintah Asan bwemfiw asan opok.

⁴Inimas ara, a jiwi inim cimin arma batawsicim opok ow, e Onam Op Pemerintah Asan, ow awutnak aememcemes.

⁵Ow damos dor ajiomcenes, wunam inim jiwi cowok dor atowomiwtamcenes, bare e owam dor atowomiwcemenes.”

⁶“Wun jiwi kanim dor asicimamenes. Ow inim jiwi cowoknakap dosa bwem ajijimtawces, e ow asan pwicaknakut aemapcemes. Wun ow, ek awut e ow afomak bap takam bajikapom, wunam e ow e jicupum bwi bajupum, bare akat ara.

⁷Awames capinmi, ow dosa bwem bajijimtawas awapes. Inimas e ow asan pwicak ara. E dosa bwemas aenawcemes araman. E nat, ow wun ow dosa bwem ajijimtawces, bare asan pwicak aemapcemes.

⁸E cabannew, e cabweynew, car dosa bwem aomcan, bare eras mamsakamosomey. Car ban patar emcomnew, bwey patar emcomnew, wunam e jiwnenak aatamemawarcokom, bare, car asan akat ara. E nat, Allah, car ban jamnuk emcomam, bwey jamnuk emcomam, e basapi opokut jismak aman ajiwimcan, bare car asan pwicak ara.

⁹Wunam, e camanmok, dosa bwem aomcan, e manmok mamweremtewey. Car manmok patar e jiwnenak aatamemawarcokom, bare car asan akat ara. E nat, Allah, car manmok jamnuk takas emcom, e neraka jismak aman ajiwimcan, bare car asan pwicak ara.”

¹⁰“Caram a jiwi kanim cowoknakapam bifan arapok. Jakaperey. E jiwi amalaikat aporsipor, onam op awapes. E malaikat e onam op doricipic bipu aememawarmes. [

¹¹Bare, e Asmat Anakat Ajaworemef Ipic, a apakapiapmes ow, bapowtewam, bajortewam, aenawef.]

¹²Jipic cowok, domba seratus ajiwar aomomcow, wunam e domba cowoknakap apakapioscow, e ipic e domba sembilan puluh sembilan ajiwar, e sikon op bakan ajioscema, wunam e apakapioscow domba apowcema, inim aranew? Car ucim bi binip aceceremamokom?

¹³Atakamnak ara, ar e domba cowok apowtewcow, jak akatnakut aememcema. Ar e bapakapios opok domba, sembilan puluh sembilan ajiwar aporcow, jak akat kanim inim aememcema.

¹⁴Inimasam ara, Allah, a jiwi kanim cowoknakapam bapakapios pwicaken.”

¹⁵“E ojowow ipic dosa or aomcannew, or e ipic mamapeney. Wunam e ipic jiman orop mamafey. Ar e oratakam jen ajicannew, bare or e ojowow ipiccin damos aamjiomcomokom.

¹⁶Ar oratakam aopowcannew, or wun ow cowoknew, jamnuknew, e ipicpu or akac mamtowoceney. Inimas atemen bwe ow jamnuknew, mamincopnew, e atakam aamtawcokomas jen ajicemes.

¹⁷E ipic, e ow atakamam aopowcownew, atakam e do basicim ajarewsimes ow mamotawey. E ipic e owam atakam aopowcownew, or e ipic Allah amsom opok ipic inim cimin mamomey. Oram, e ipic, pemerintah uang batawanimtam kerja ipic, inim cimin mamomey.”

¹⁸“Atakamnak ara, awames capinmi acuw aatcokomas, bare Allaham eras e onam op acuw aatcema. Awames capinmi akat aporcokomas, bare, Allaham eras e onam op akat aporcema.

¹⁹Atakamnak ara, ow jamnuknew, mamincopnew, dojirmec jipu ajarewsiapces, dor e ow wasec aememcimin. Bare, awames capinmi ara, car ow jamnuk, e janim Allah aanimcokomas atakam aamsakamcokom, e onam op doricipic, eras car aemtamceman.” Yesus inim aeef.

²¹Petrusam Yesuspu aenawomef. “Tuhan. E dojowow ipic dosa arke dor aomcannew, dor e ipic aomcanas, bi binip biwosomtam bar ucim inim ajiwaram? Dor, e aomcanas, bi binip biwosomtam bar mamincop ajiwar open?” Inim aeef.

²²Yesus masirin, “Dor, mamincopnakas atakam opok. E ipic or dosa arke aomcannew, e aomcanas, bi binip biwosomtamam arkea.” Inim aeef.

²³E Onam Op Pemerintah, bare awames baposomtew atakam inim cimin ara: Bare raja ipic cowok aememefen. E raja, e akerja bwemtam ow e pok tewetfes, bon tutup bwem atakam atawefen.

²⁴Ar e bon tutup bwem aemef ara, ow, jipic cowok, e aramat ipic bipu atowocenfesen. E ipic bon, bare rupiah juta arkenakut arawen.

²⁵E ipic nat, e bon tutup bwem, uang arke opoken. E raja ipic masirin, jirmec e wun kerja bwemtam ow ajirimefen. ‘Car e ipicam, e aremam, e atiperesam, e apok takasam, kawey ow tetamey, wunam uang buwumtewey. Bare, e uang, e bon tutup bwemas ara.’ Inim aeefen.

²⁶Bare, e kerja bwemtam ipic, e raja ipic bipu bi fop aneyjiapefen. ‘Ema. Dor e bon uang takas or aotetamcimin.’ Inim aeefen.

²⁷E raja ipic masirin, e ipic saw akat aoworporefen. Ar e ipic asurumefen. Wunam ar e abon akokoromosomtamefen.

²⁸“Bare, e kerja bwemtam ipic ajisefen. Aram wun arakac kerja bwemtam ipic apowtewefen. Bap ara, ar e ipic rupiah ribu arke opoknakap bon atetamefen. Bare, ar e ipic ban akimopefen. Wunam e afomak ajeremopefen. ‘E bon uang tetamcan.’ Inim aeefen.

²⁹E arakac kerja bwemtam ipic, e ipic bipu bi fop aneyjiapefen. Aram janim fak aanimefen. ‘Ema. Dor e uang or aotetamcimin.’ Inim aeefen.

³⁰E ipic nat, jen opok aememefen. Ar e arakac kerja bwemtam ipic, penjara cem aman afimimefen— e uang aotetamcow jofay ajiwara.

³¹E wun arakac kerja bwemtam owam inimas aporfesen. Ar masirin, jak pwicak aememfesen. Aram e raja ipic aapenfesen. Wunam eras takas atakam e aramat ipic aotawfesen.

³²E raja ipic masirin, e ipic ajateefen. ‘Or kerja bwemtam ipic fasi awamcem ara. Or janim dor aaniman. Dor masirin, e obon takas emekokoromosomtamey.

³³Dor serow or ajiomey. Oram inim serow e orakac kerja bwemtam ipic bojiomcerey.’ Inim aeefen.

³⁴E raja ipicam jak amop aememefen. Ar e ipic e bwemsokom ow aotasimemtamef— e ipic e bon uang takas aotetamcow jofay ajiwar arawen.

³⁵Bare, e onam op doricipic, inimas cowok car aemceman— car e cajowow e pwicakas car aomfanas, bi binip biwosomtamnak opok aemcokom ara.” Yesus inim aeef.