Read Central Asmat MATIUS 19 Bible Online

MATIUS 19 - Central Asmat bible

MATIUS 19

¹Yesus inim atakam atawkurumef, ar e Galilea capinmi aewjisosef. Ar e Yordan jo ajiref, wunam e Yudea capinmi ajaremef.

²Ow arkenakutam aramat ipic fa asoromfes. Aramat ipicam erasan e dam ow ajaworomtawef.

³Parisi ow masirin, aramat ipic aenawomfes. Ar e aramat ipic salah atakam botaw epen bwemporen. “Jipic e arem mami ajiwapomcow, ar pwicakas bwem open? E Allah Jirmec inimas acuw bat open?” Inim aefes.

⁴Aramat ipic masirin, “Ametnak ara, e Ji Bweremapom Ipic, ow jipicam cowocam akenemapomef. Car inimas baca opoknew?

⁵E Ji Bweremapom Ipicam atakam, ‘Inimas ara, jipic e aricipicam arosowocam bakan ajioscema, wunam aremcin akac aemapcemes. Bare, armipicam aremam, dam cowkon aemapcemes.’ Inim aeef.

⁶Inimas ara, ar ow jamnuk boemap opok aemcemes. Ar ow cowok inim cimin aemapcemes. Bare, Allah e ow cowkon akajimapomcema. Inimas asmat ow, e ow mampakapimapom arapok.” Yesus inim aeef.

⁷E ow masirin, “Musa, jipic, bajiwapom surat e arem batetam, wunam e cowoc bajiwapom, inim jirmec ajirimef nat, ucimaram?” Inim aefes.

⁸E Yesusam, “Musa car jen fak ow aporefen. Inimas ar car e cacepes bajiwapom atetamefen. Ametnak ara nat, inimas opok.

⁹Ca nat, jakaperey. Jipic arem, kawey cemen ban opok aemcow, e nat, armipic e arem ajiwapomcow, wunam wun cowoc aotewetcow, bare e ipic jursumec ipic aememcema.” Inim aeef.

¹⁰E Yesus mamkawi ow masirin, atakam aramat ipic aotawfes. “Armipicam aremam inimas aranew, bare ow petew bajiw opok aemces, asan akat aememcemes.” Inim aefes.

¹¹Aramat ipic masirin, “Wun ow e atawmokom atakam ji bweme asan opok. E Allah e atakam ji bwe jak atetamamar ow, eras aemames.

¹²Bare, wun ow cepes bwemtewet asan opok. E wun ow, jak aman aewomisfes, ar inim cowok ara. Ow masirin, e wun ow, jiwi bwemfimat asan opokas aemapomfes. Wun ow masirin, e Onam Op Pemerintah kerja bwem akat apormes. Inimas ar cepes batewet opok, atakam arma asakamtiwfes. Bare, a atakam ji bwe akat ow, a atakam ji baeces.” Inim aeef.

¹³Bare. Ow, jiwi aramat ipicpu atowocenfes. Ar aramat ipic, ban, e jiwi dam ton batatiwam, janim Allah a manimtamam, akat aemfes. E Yesus mamkawi ow nat inimas acuw aatfes.

¹⁴E yesus nat, “A jiwi a dodampu inim baenawces. Acuw bat arapok. A jiwi inim awcawor ow e Onam Op Pemerintah Asan aemapcemes.” Inim aeef.

¹⁵Bare, aramat ipic ban e jiwi dam ton atatiwef. Ar masirin, erasan aewjisosef.

¹⁶Bare. Jipic cowok aramat ipicpu aenawomef. E ipic masirin, “Guru. Dor jiwnenak batamemawar akat ara. Dor inimas ucim akat pok emcey?” Inim aeef.

¹⁷E Yesus, “Or akatas bwem jonow atowpormenem nat, ucimaram? Ow cowokut akat ara. Or jiwnenak batamemawar akat aporcem, e Allah Jirmec takas ji mameey.” Inim aeef.

¹⁸E ipic masirin, “E ucim jirmecam?” Inim aeef. Yesus masirin, “Daw catiwcem. Cen osom ecem. Osom ecem. Suw atakam atawcem.

¹⁹E oricipicam orosowocam mamsicimawarey. Wunam, damos e ojowow mamjiomey— or damos orma ajiomamem awcawora.” Inim aeef.

²⁰E ay ipic masirin, “Dor eras takas ji aeawiru. Dor masirin, e wunas ucimas emcey?”

²¹E Yesus masirin, “Or ow tarowatnak memem akat aporcem, oram baysosey. E opok takas uang mamuwumtatey. E uang masirin, e pok opok ow sey mamseyamtamey. Or masirin, e onam op capinmi pok anakatnak atowomatcemem. Eras aemcem, mamofasienawey. Wunam mamkawiawarcan.” Inim aeef.

²²E ay ipic nat, pok awutut aomomef. Inimas ar inim atakam jen ajief, ar jak pwicak aememef, wunam ajisosef. Ar pok awutut aomomef aporef ara.

²³Yesusam atakam e amamkawi ow aotawef. “Atakamnak ara, pok awut epcom ow, e Onam Op Pemerintah Asan bafiw, bare susah awutnakut ara.

²⁴Dor wun atakamam car aotawmin. Unta, jarum jof bafiw, bare susah kanim pwiciri ara. Pok awut epcom ow nat, e Allah Pemerintah Asan bafiw, bare susah awutnakut ara.” Inim aeef.

²⁵E mamkawi ow inim atakam jen ajifes, aram junum awutnakut aefes. E ow masirin, “Ucim inimaram? E ajoremces ow, ucim owaram?” Inim aefes.

²⁶Yesusam e ow manmok atiwef. “Asmat ow inimas bwemem asan opok. Allah nat, eras takas bwem, aras araman.” Inim aeef.

²⁷E Petrus masirin, atakam e aramat ipic aotawef. “Daram e daras takas bakan ajifom, wunam or ajamkawifenom. Inimas dar ucimas towopcom?” Inim aeef.

²⁸E Yesusam atep ajitef. Atakamnak ara, Allah ay capinmi akenemapomcow, e Asmat Anakat Ajaworemef Ipic e raja kursi akatnakut ton apwikapcema. E dor ajamkawimenokom owam, raja kursi dua belas ajiwar ton apwikapcomokom. Caram e Israel samat dua belas ajiwar jirmec ajirimcomokom.

²⁹Wun ow, e acemnew, e arewcewesnew, e atarsepesnew, e arisorownew, e atiperesnew, e akebunnew, bakan ajifes. Ar eras takas kerja do bwemtam bakan ajifes. E ow nat, eras awutnakut aotowopcemes. Aram jiwnenak aatamemawarcemes.

³⁰Bare, awut ow arke, kanim ow aoememcemes. Kanim ow arkeam, awut ow aoememcemes.