Read Central Asmat MATIUS 2 Bible Online

MATIUS 2 - Central Asmat bible

MATIUS 2

¹Barewen. Yesus Yudea capinmi kota juwas Betlehem ajisamesefen. E jofayam raja ipic juwas Herodes e capinmi ajitemefen. Bayar cescuw owam, e jopok amotomwisimcemar asanpu capinmi ewinawfesen. Aram e kota Yerusalem ajaremfesen.

²Aram atakam atawfesen. “E jepen ajisamesef Yahudi ow araja ipic onakaram? E abayar op aaptometef ara, daram manmok atiwfom. Dar masirin, aramat ipic basicim ajinawfom.” Inim aefesen.

³E raja Herodes inim atakam jen ajief ara, omar aeefen. E Yerusalem owam takas omar aefesen.

⁴Bare, e Herodes, e Allah atakam mamtaw tugas ow awutam, e Allah Jirmec mamememtam owam, aaramsimefen. Aram jonow atowefen.

⁵E ow mairin, atep ajitfesen. “Ar e Yudea capinmi kota juwas Betlehem ajisamescema. Bare, e Allah atakam botaw ipic, inim atakam, surat aeapomefen:

⁶‘Kota Betlehem. Or Yudea samat capinmi kota ara. E Yudea capinmi kotain kotain aman, or penting opok opok. Or penting awutut ara. E orow aman, kepala ipic cowok ajitemcema. Aramat ipic, e dorow Israel, jirmec ajirimcema.’ Inim atakam surat aeapomefen.” E ow inim aefesen.

⁷E ow inimas aefes masirin, Herodes e bayar cescuw ow curuw ajateefen. Aram jonow e ow atowefen. E ow masirin, e bayar ajisef jofay, atakam umuton e Herodes aotawkurumfesen.

⁸E Herodes masirin, jirmec e ow ajirimefen: “Betlehem mamjisosey. Caram manmok faka. E jiwi asan mampowtewey. E jiwi apowtewcokom, atakam mamotawtamcan. Dor e jiwi basicim, erasan baysos akat aemamin.” Inim aeefen.

⁹E ow e raja atakam jen ajifesen. Jen ajifes masirin, ajisosfesen. E bap aaptometef aporfes bayaram, e ow abinpu ajarefut arawen. E bayar ajaref masirin, e jiwi aemamesef asan e op atukapefen.

¹⁰E ow e bayar aporfes, ar jak akatnakut aememfesen.

¹¹E owam e cem afiwemfesen. Ar e jiwiam, e arosowoc Mariaam, aporfesen. Ar jine onok aneyotapfesen. Bare, ar e jiwi asicimfesen. Aram e apok ese amumfesen. Amumfes masirin, ar emas pokam, pinim akat os capi pok juwas kemenyanam, wun os capi pok juwas muram, e jiwi atetamfesen.

¹²Bare, e bayar cescuw ow isi atamwitfesen. E isi atamwitfes ara, Allah, e ow, e Herodespu bofasi arapok, inim atakam aotawefen. E ow masirin, wun bokotpu arop capinmi aojisosfesen.

¹³Ajisosfes masirin, Yusuf isi atamwitefen. Isi atamwitef ara, aram Tuhan amalaikat bi aporefen. E malaikatam atakam aramat ipic aotawefen. “Basitey. E jiwiam, e arosowocam, Mesir capinmi omar batuwomosey. E atakam or aotawcey jofay ajiwar, erasan inim mamemapey. E Herodes e jiwi bacatiw apowporcema.” Inim aeefen.

¹⁴Yusuf masirin, ajitefen. Ajitef ara, ar e jiwiam, arosowocam, atewefen. Ar Mesir capinmi iram ajisosesmepesen.

¹⁵Ar e Herodes damir aafef jofay ajiwar erasan aemapfesen. Bap ara, Tuhan, atakam e aratakam botaw ipic aotawefen. “Dor e dotiw e Mesir capinmi bakan bajios ajateof.” Inim aeefen Inimas e ow eras aemfesen. Er e atakam jipuas arawen.

¹⁶Barewen. E Herodes, e bayar cescuw ow, tot aramat ipic aotfes aporefen. Ar masirin, jak amop awutnakut aemapefen. Ar ow e Betlehem ower jiwi kanimam, e jawosmar capinmi ower jiwi kanimam, bacajimirkurum, jirmec ajirimefen. Er e umur tahun jamnuk ajiwar jiwiam, e umur tahun jamnuk ajiwar opok jiwiam, arawen. E umur, e bayar cescuw ow atakam aotawfesas jipu arawen.

¹⁷Ow e jiwi acatiwfes ara, er e Allah atakam botaw ipic juwas Yeremia e aotawef atakam jipu ara:

¹⁸“Ow, kota Rama ow jisuwan jen ajifes. Er e ow bwec awutnakutas ara. Rahel e ajiwi bwec abwecef. E ajiwi, bare damir takas aaffes. Inimas aramat cowoc, ow, e ajak, akat bemapom pwicaken.” Inim aeefen.

¹⁹Barewen. E Herodes damir aafefen. Damir aafef masirin, Yusuf e Mesir capinmi isi atamwitefen. E isi atamwitef ara, aram Tuhan amalaikat bi aporefen.

²⁰E malaikatam atakam aramat ipic aotawefen. “Basitey. E jiwiam, arosowocam, batewey. E jiwi bacatiw aememfes ow, bare damir emeaffes. Inimas car e Israel capinmi bofasiosey.” E malaikat inim aeefen.

²¹E Yusufam asitefen. Ar e jiwiam, arosowocam, atewefen. Aram e Israel capinmi ajisosfesen.

²²E nat, Arkelaus, e aricipic Herodes, Yudea capinmi raja ipic, juw auwuemefen. Yusufam inim atakam jen ajiefen. Ar masirin, erasan baysos omar aeefen. Aram isi atamwitefen. E isi atamwitef ara, Allah, Yusuf erasan baysos arapok, atakam aotawefen. E Yusuf masirin, Galilea capinmi ajisosefen.

²³Bap ara, e Allah atakam botaw ow, atakam aotawfesen: “Ow, ‘E aramat ipic, Nasaret ipic ara,’ inim atakam aotawcemes.” Inim aefesen. Inimas Yusuf kota juwas Nasaret aemapefen. Er e atakam jipuas arawen.