Read Central Asmat MATIUS 20 Bible Online

MATIUS 20 - Central Asmat bible

MATIUS 20

¹“E Onam Op Pemerintah, bare cem aramat ipic cowok awcawor ara. Aramat ipic, tamnakap, e aranggur kebun kerja bwemtam ow janim manim ajisefen.

²Aram, e kerja bwemtam owam, gaji atakam aamsakamfesen. E gaji ara, kerja bar cowok, ajipica ajipica, uang dinar cowok batetam arawen. Aramat ipic masirin, e ow, e aranggur kebun atewosomefen.

³Bare, tam ara, jam sembilan ajiwar aranew, aramat ipic aojisefen. Ar wun ow, e pasar asan desen memem aporefen.

⁴‘Caram e anggur kebun jisosey. Dor masirin, gaji akat car atetamcimin.’ Inim aeefen.

⁵Bare, e ow e kebun ajisosfesen. E aramat ipic masirin, jam dua belas ajiwar aranew, aojisefen. Aram inimas cowok aoemefen. Wunam jam tiga ajiwar aranew, inimas cowok aoemefen.

⁶Aram jam lima ajiwar aranew, aojisefen. Ar wun ow desen memem aporefen. ‘Car a jo jirow, arasan ucimas desen akajiremamokom?’ Inim aeefen.

⁷E ow masirin, ‘Ow kerja a bwemtam, janim da manim opokut.’ Inim aefesen. Aramat ipic araw, ‘Bare, caram e anggur kebuna.’ Inim aeefen.

⁸Barewen. Porow ara, e anggur kebun aramat ipic, atakam, e amandor ipic aotawefen. ‘E kerja ow bayteey. E agaji baseyetamtotor. E asep afiweres ow, e agaji bap batakamtetam. Wunam e bap afiweres ow, e agaji asep batetam.’ Inim aeefen.

⁹Bare, aramat ipic, uang dinar cowok, e jam lima ajiwar aranew afiwfes ow atetamtotorefen.

¹⁰E bap afiwfes ow aenawfes ara, aram bi binip aceceremfesen. ‘Aramat ipic, uang, dar aokajimtamcemarow openow.’ Inim bi binip aceceremfesen. E nat, aramat ipic, e owam, uang dinar cowoknakap atetamtotorefen.

¹¹E kerja ow e uang atewetfes, ar icim e cem aramat ipic afesfesen.

¹²‘E asep afiweres ow, kerja jam cowoknakap aemeres. Dar masirin, kerja tam ewememamom, porow joti omomosmom. Jo pokam jis inim aemsamamarow. O nat, e owam, daram, gaji awcawor atatamamarowem.’ Inim aefes.

¹³Aramat ipic masirin, atep e wun ipic cowok ajitefen. ‘Dor fasias or bwem opok. Bare, orcin, e ogaji uang dinar cowok, atakam aamsakamorom araman.

¹⁴E oras batewey. Wunam baysosey. Dor a asep afiwor ipicam, oram, gaji awcawor batetam akat aemamin.

¹⁵Dor e dopok, e akat aporminas jipu bwem, karow open? Or, dok pok sey ban kumit ipic apormenem, inimas icim afesmem aranew?’ Inim aeefen.

¹⁶Inimas ara, e ow kanim aememames ow, ow awut aememcemes. E ow awut aememames owam, ow kanim aememcemes.” Yesus inim aeef.

¹⁷Bare. Yesus Yerusalem bin ajiemef. E bowsec ara, ar e amamkawi ow dua belas ajiwar, arop atakam aotawef.

¹⁸“Jakaperey. Dar Yerusalem ajisosmom. Erasan ara, jipic cowok e Asmat Anakat Ajaworemef Ipic, e Allah atakam mamtaw tugas ow awut aotasimemtamcema. Aram aramat ipic e Allah Jirmec mamememtam ow aotasimemtamcema. E ow masirin, aramat ipic bacatiw atakam aamsakamcemes.

¹⁹Aram aramat ipic e Yahudi opok samat ow aotasimemtamcemes. Ar, e ow, aramat ipic uc bamocam, omop bafam, salib op bacatopomam, inim aotasimemtamcemes. Bar mamincop ara masirin, Allah e aramat ipic aojaworomsumutumcema.” Inim aeef.

²⁰Bare. Sebedeus aremam, atiperesam, Yesus aenawomfes. Aramat cowoc e Yesus bipu jine onok aneyotapef, wunam janim aramat ipic aanimef.

²¹Yesus masirin, jonow e cowok atowef. “Or ucimasam?” Inim aeef. Aramat cowoc masirin, “Or e ow takas jirmec ajirimkurumcem jofay, e dotiw jamnuk, wun e oban bo jamam bemapam, wun e otamo jamam bemapam, inim baemaptotorces.” Inim aeef.

²²Yesus masirin, “E janim aanimamokomas camsom opok. Bare, asep jofay dor ajurusemcimin. Caram e ajurusemceyas inim cimin mamjurusem akat open?” Inim aeef. “Bare, akat.” Inim aefes.

²³Aramat ipic araw, “Car e ajurusemceyas inim cimin ajurusemcomokom araman. E nat, dor e doban bo jamam bemap owam, e dotamo jamam bemap owam, inim bweremtew, bare doras opok. E doricipic e asan akenemapomef. Aram e asan aemapces ow aereremtawef.” Inim aeef.

²⁴E wun mamkawi ow sepuluh ajiwar, e ipic jamnuk janim aanimfesas, atakam jen ajifes. Aram jak amop aememfes, wunam takam e ipic jamnuk aotawfes.

²⁵Yesus nat, e ow ajateef, wunam atakam aotawef. “E Allah mamkawi amsom opok samatin samatin kepala ow, jirmec awutut e mami ow ajirimcemes. E ow awutam atakam faknakut e mami ow aotawcemes. Car inimas camsom ara.

²⁶E caramaman nat, inimas opok. E caramaman wun ow, awut ow memem akat aporces, ar e cakerja bwemtam ow baememces.

²⁷Wunam, e caramaman wun ow, bap ow memem akat aporces, ar mami kerja car baemtamcan.

²⁸Inimasam ara, e Asmat Anakat Ajaworemef Ipic, ow kerja a bwemtam bwenaw opok. E nat, ar kerja kawey ow bwemtam aenawef. Aram ow bajortew damir baftam aenawef.” Inim aeef.

²⁹Bare, Yesus Yeriko aewjisosef ara, ow arke e afa asoromfes.

³⁰Manmok kapi ipic jamnukam e bokotpuak aemapfes. Aram Yesus erasan bokorfe, atakam jen ajifes. E atakam jen ajifes masirin, atakam afakaytawfes. “Tuhan! Daud urpis! Saw akat oworporcarowey!” Inim aefes.

³¹E ow ow arke masirin, jiman e ipic jamnuk aaffes. “Caram jokona.” Inim aefes. E ipic jamnuk nat, atakam awutut aofakaytawfes. “Tuhan! Daud urpis! Saw akat oworporcarowey!” Inim aoefes.

³²Yesus masirin, atukemef. Aram e ipic jamnuk ajateef. Wunam, “Dor car ucim pok emtamcen?” Inim aeef.

³³E ipic jamnuk masirin, “Tuhan. A damanmok bateremtamcarowey.” Inim aefes.

³⁴Bare, Yesus e ipic jamnuk saw akat aoworporef. Aram ban e amanmok atewapomef. E ipic jamnuk masirin, e manmok asarimtereyef. Aram aramat ipic ajamkawifes.