Read Central Asmat MATIUS 21 Bible Online

MATIUS 21 - Central Asmat bible

MATIUS 21

¹Bare. Aramat ow Yerusalem sotop amersisiemfes ara, aram kota Betfage ajaremfes. E kota e sikon asan juwas Saitun aemamesef. Yesusam jirmec e amamkawi ipic jamnuk ajirimef.

²“Car e bap ewames cemsanpu mamjarey. E cemsan afiwemcokom cowok, car keledai cum pok epcomam, keledai jiwiam, cowkon, manmok apematamcomokom. Bare, e keledai jamnuk e cum pok mamsurumey, wunam mamtowotnawtamcan.

³Ow atakam car aotawcannew, car masirin, ‘Tuhan e keledai bak ton bajaren. Aramat ipicam e keledai asarimtetamceman.’ Inim mameey.” Yesus inim aeef.

⁴Bare, eras aemfes ara, er e Allah atakam botaw ipic e atawef atakam jipu bwemas ara:

⁵“E kota Sion ow inim atakam mamotawey: ‘Jakaperey. E caraja ipic arma batawsicim opok ipic ara. Aram car aenawomaman. Aramat ipic keledai bak ton acowojarma. E keledai, bare ay keledai ara. Ar pok jec bomat keledai ajiwi ara.’ Inim mameey.” E Allah atakam botaw ipic inim aeefen.

⁶Bare, e Yesus mamkawi ipic jamnuk ajisosfes. Ar e aramat ipic jirmec ajirimefas ji aefes.

⁷Ar e keledaiam, e ay keledaiam, atowocenfes. Aram e abaju mamincop e keledai jamnuk bak ton atometmuwtiwfes. Yesus masirin, e keledai bak ton atometapef.

⁸Ow arkenakutam e abaju e bokotpu amuwtiwa aefes. Wun owam os o e epcom asesakamnemtotorfes, wunam e os o e epcom e bokotpu amuwtiwa aefes.

⁹E aramat ipic e bap ajarfes ow arkeam, e fa asoromfes ow arkeam, si asifes. “Daud urpis, dormomo! Tuhan, asan akat, e atewenamamar ipic baomcow! Allah, dormomo!” Inim aefes.

¹⁰Bare, aramat ipic Yerusalem ajaremef. Yerusalem ajaremef masirin, e kota ow takas jisuwan ajifes. “A aramat ipic cam?” Inim aefes.

¹¹E ow arke masirin, “Aramat ipic e Allah atakam botaw ipic juwas Yesus ara. Ar e Galilea capinmi kota juwas Nasaret ipic ara.” Inim aefes.

¹²Bare, Yesus, Allah cem afiwemef. Ar pok juw bumamtaw ow takas aotewerisimkurumef. Aram e uang juw buwumcicirimtaw ow ameja bipar ajimirsasamef. Aram pari juw bumamtaw ow akursiam bipar ajimirsasamef.

¹³Aram atakam e ow aotawef. “E Alkitab atakam ara, ‘E docem, janim do manim cem aemamescema.’ Inim aema. Ca nat, a cem, osom ow barewsiap asan, aemapomfokom.” Yesus inim aeef.

¹⁴E Allah cem aman, manmok kapi owam, afafasijarfes owam, Yesus aenawomfes. Aramat ipicam e ow dam ajaworomtawef.

¹⁵E Allah atakam mamtaw tugas ow awutam, e Allah Jirmec mamememtam owam, e Yesus akatnakut aemefas aporfes. Wunam, jiwi e Allah cem aman si asifes. “Daud urpis, dormomo!” Inim aefes. E ow inimasam aporfes. Ar masirin, jak amop apwimapfes.

¹⁶E ow masirin, atakam aramat ipic aotawfes. “Ow e jiwi e atakam atawmesas jen ajimemnew?” Inim aefes. Yesus masirin, “Jen ajimin. Bare, e Alkitab atakam, ‘Or jiwi kanimam, aw aanmes jiwiam, or basicimnak amememtamfem.’ Inim aema. Ca nat, e atakam baca bwem opoknew?” Inim aeef.

¹⁷Bare, aramat ipic e ow bakan ajief. Aram e kota bakan ajief. Ar masirin, kota Betania ajisosef. Erasanam isi aamsesmep.

¹⁸Ajofay tamnakap ara, aramat ipic e kota Yerusalem bofasi ajaref. Aram amosto aememef.

¹⁹Ar masirin, os juwas “arā” e bokotpu pim aporef. Aram e arā ospu aapenef. E arā ospu aapenef masirin, eke opok cowok aporef. Os e cowokin aporef. Aramat ipic masirin, atakam e arā os aotawef. “Or eke bope opok cowoka.” Inim aeef. Bare, e arā os sa asarimsaemef.

²⁰E mamkawi ow inimas aporfes ar junum aefes. “A arā os sa asarimsaemama ucimasaram?” Inim aefes.

²¹Yesus masirin, “Atakamnak ara, car Allah basicimnak aemcokom, wunam bi binip arke opok aemcokom, caram e arā os aemaminas aemcomokom. E nat, e cowok opok. Caram atakam a sikon aotawcokom, ‘Baysosey. E jicupum bwi orma jupuey,’ inim aecokom, bare e sikon inimas cowok aemcema.

²²Car janim Allah aanimcokom, caram, ‘Allah e janim aanimcomas aemtamcemarow,’ inim atakam basicimkurumey. Aramat ipic masirin, e janim aanimcokomas takas atatamceman.” Inim aeef.

²³Bare. Aramat ipic e Allah cem afiwef. Aram atakam amememtamef. E atakam mamememtam aman, e Allah atakam mamtaw tugas ow awutam, e Yahudi ownucur owam, aramat ipic aenawomfes. “E aemamemas nat, jirmec ca jirimimfan?” Inim aefes.

²⁴Yesus masirin, atakam e ow aotawef. “Doram jonow ca botowpormin. Car atep ajitcan, doram e aemaminas jirmec ajirimfan ipic, atakam car aotawcimin.

²⁵E Yohanes bwi abwimefas, jirmec ca jirimef? Allah aranew? Asmat ow aranew?” Inim aeef. E ow masirin, eras aramaman atakam aamtawfes. “Dar atakam atawcom, ‘Allah, e Yohanes jirmec ajirimef,’ inim aecom, aramat ipic masirin, ‘Car e ipic basicim opok nat, ucimaram?’ inim aecemarow.

²⁶Da nat, ‘Asmat ow e Yohanes jirmec ajirimef,’ inim aecom, dar e ow arke omar aecomom. E ow arke abi binip ara. ‘E Yohanes, Allah atakam botaw ipic ara,’ inim bi binip aceceremames.” Inim aefes.

²⁷Bare, e ow atep e Yesus ajitfes. “E Yohanes e bwi abwimefas, jirmec ajirimef ipic camnew? Daram namsom opok.” Inim aefes. Aramat ipic masirin, “Bare, doram e aemaminas jirmec ajirimfan ipic, atakam ca botaw opok.”

²⁸“Car ucim bi binip aceceremamokom? Bare, jipic cowok ower jiwi jamnuk arawen. Aramat ipic, e betiw ipic aapenefen. ‘Ata. Or wow e anggur kebun kerja emey.’ Inim aeefen.

²⁹E betiw ipic nat, ‘Do pwicako.’ Inim aeefen. Asep ara masirin, ay binip aceceremefen. Wunam e kebun kerja ajisosefen.

³⁰E aricipic masirin, e aykun ipicam aapenefen. Ar e kebun kerja bwemtam, atakam cowok e aykun ipicam aotawefen. E aykun ipic masirin, ‘Diwi. Bare, akat.’ Inim aeefen. E nat, ar e kebun kerja baysos opokuten.

³¹E jiwi jamnuk aman, e aricipic atakam ji aeef ipic cam?” Yesus inim aeef. E ow masirin, “E betiw ipic ara.” Inim aefes. Yesus masirin, “Atakamnak ara, e pemerintah uang batawanimtam kerja owam, e werey cepesam, e Allah Pemerintah Asan bap afiwapcemes. Car masirin asep ara.

³²Bare, Yohanes car aenawomfan. Ar e bokot anakat car aporomtamfan. Ca nat, e aramat ipic atakam basicim opokut. E nat, e pemerintah uang batawanimtam kerja owam, e werey cepesam, e Yohanes atakam asicimfes. Caram inimas aporfokom. E nat, asep jofayam, car dosa bak bapayem opok aemfokom. Caram aramat ipic atakam basicim opok aemfokom.”

³³“Caram wun baposomtew atakam jen pajiey. Jipic cowok, capinmi aomomefen. Aram anggur kebun atawapomefen. Aram pagar e kebun fumi abwicirimapomefen. Aram anggur bwi burumwisim asan e kebun akenemefen. Cemam opnakut aeapomefen. Aram e kebun, kebun kerja bwemtam ow aotasimtitamefen. ‘Car e dor anggur kebun kerja aemtamcenokom, dor e wun anggur eke car atatamcimin. E wun masirin, doras ara.’ Inim atayi aeefen. Ar masirin, wun jo capinmi ajisosefen.

³⁴E kebun aramat ipic, e anggur eke bakokomtaw bwi sotop aporef, ar wun kerja bwemtam ow, e kebun kerja bwemtam owpu, atewosomefen. Ar e ow e anggur eke bamertaw atewosomefen.

³⁵E kebun kerja bwemtam ow masirin, e wun kerja bwemtam ow, ban akimomfesen. Ar wun ipic cowok omop aaffesen. Aram wun ipic cowok acatiwfesen. Aram ek, wun ipic cowok, ajimirsasamfesen.

³⁶E kebun aramat ipic masirin, wun kerja bwemtam ow atewosomefen. E bap atewosomef ow, arke opok arawen. E asep atewosomef ow nat, arke inim arawen. E nat, e kebun kerja bwemtam ow, e bap aemfesas cowok, aoemfesen.

³⁷Asep ara masirin, e kebun aramat ipic, e atiw e owpu atewosomefen. ‘E ow, e dotiw, bwemumiris asan opok.’ Inim aeefen.

³⁸E kebun kerja bwemtam ow nat, e atiw aporfesen. Ar masirin, aramaman atakam aamtawfesen. ‘Ewamec ipic, e aricipic pok takas atowomatcow ipic ara. Dey. E ipic bacatiwmoc. E apok takas darma boportowom.’ Inim aefesen.

³⁹Bare, ar e ipic ban akimomfesen. Aram e ipic e kebun aotpepemisimfes, wunam acatiwfesen.

⁴⁰Inimas ara, e kebun aramat ipic aenawcow, ar e kebun kerja bwemtam ow ucimas emcow?” Yesus inim aeef.

⁴¹E ow masirin, “Aramat ipic, e jokmen ow, asan pwicak acajimirtiwcema. Aram e anggur kebun, wun kerja bwemtam ow aootasimtitamcema. Bare e wun kerja bwemtam ow e anggur eke e kebun aramat ipic atatamcemes.” Inim aefes.

⁴²Yesus masirin, “Car e Alkitab atakam baca emcaemfokom openow: ‘E cem bweapom ow, ek cowok pwicak aporfes, wunam e ek aeremtiwfes. E ek nat, cem ek penting awutnakut aemamesef. Bare, Tuhan eras aemef. Daram e aemefas akat cowok apormom ara.’ E Alkitab inim aema.

⁴³Inimas ara, caram jakaperey. Allah car e aPemerintah Asan bafiw, acuw aatcema. Aramat ipic masirin, wun samat e asan atowomiwcema— e samat, e Allah Pemerintah Asan, kerja bwemtamnak samat ara. [

⁴⁴E ek ton aneyjuamesces ow, ananasiamescemes. Wunam e ek, ow aneykamimopcow, ar e ow apetamtiwcema.]” Yesus inim aeef.

⁴⁵E Allah atakam mamtaw tugas ow awutam, e Parisi owam, e Yesus e baposomtew atakam atawefas, jen ajifes. Jen ajifes masirin, ar aramat ipic aratakam atawef aporfes.

⁴⁶Aram aramat ipic ban bakimom aemporfes. E nat, ar e ow arke omar aefes. E ow arke abi binip ara, “Aramat ipic, Allah atakam botaw ipic ara,” inim bi binip aceceremfes. E ban bakimompor owam, e ow abi binip aporfes.