Read Central Asmat MATIUS 22 Bible Online

MATIUS 22 - Central Asmat bible

MATIUS 22

¹Bare. Yesus baposomtew atakam e ow aootawef.

²“E Onam Op Pemerintah, bare raja ipic, owersey pokbwi, e atiw aemtamef inim cimin ara.

³Aramat ipic, jirmec e akerja bwemtam ow ajirimefen. ‘Car, e pokbwi akac memen ajateof ow, aynam bwenaw, atakam mamotawey.’ Inim aeefen. E ajateef ow nat, bwenaw pwicaken.

⁴Aramat ipic masirin, jirmec, wun kerja bwemtam ow aojirimefen. Car inim atakam e ajateof ow mamotawey. Jakaperey. Aramat ipic atakam, ‘E dopokbwi pok emcafafaykurumapomorom. E dosapiam, e wun ajumawiru binatangam, emcaciorom. E pok takas awap. Caram a pokbwi asan aynam enawey.’ Inim eey. Aramat ipic inim aeefen.

⁵E ajateef ow nat, e atakam jen baji opok cimin aememfesen. Wun ipic e akebun asan ajisosefen. Wun ipic masirin, e apok juw buwumamtat asan ajisosefen.

⁶E wun ow takas masirin, e aramat ipic kerja bwemtam ow, ban akimomfesen. Ar cemew e ow aatfesen. Wunam acatiwfesen.

⁷Bare, e raja ipic jak amop apwimapefen. Ar e atentara ow atewosomefen. E tentara ow masirin, e raja ajowow acatiwfes ow, acatiwfesen. Ar e ow akota cem takasam, sos aurumkurumfesen.

⁸E raja ipic masirin, atakam e akerja ow aotawefen. A pokbwi pok emcafafaykurumapomorom. E nat, e ajateof ow, bare ow pwicak ara. Ar a pokbwi memen, bare awcawor opok ara.

⁹Inimas car a kota fumi ciram jimasappu mamapeney. E aporcokom ow takas, a pokbwi akac memen mamjateey. Inim aeefen.

¹⁰E kerja bwemtam owam e bokot jof takaspu ajisosfesen. Ar e aporfes ow takas atawanimfesen. Ar e ow tarowatam, fasiam, takas atawanimfesen. Bare, e owersey pokbwi cem, jaki ow imwinakap apitapefen.

¹¹E raja ipicam, e jaki ow bi bapor ajisefen. Aram erasan jipic cowok owersey pokbwi pakaian opok aporefen.

¹²Aramat ipic masirin, ‘Or owersey pokbwi pakaian opok, a cem afiwaperem ucimaram?’ Inim aeefen. E ipic nat, jokon ajiapefen.

¹³E raja ipic masirin, atakam e akerja bwemtam ow aotawefen. ‘Awap ipic e abanam, e abweyam, manam bajikapomey. Wunam e ipic e jiwicnakut asan iwimey.’ Inim aeefen. Erasan, ow bwec abweccemes. Aram dam jen ajicemes.

¹⁴Allah, ow arke ajatema. Aramat ipic nat, ow arke opok aereremtawma.” Yesus inim aeef.

¹⁵Bare, e Parisi ow ajisosfes. Aram aramat ipic, salah atakam epen bwempor, atakam aamtawfes.

¹⁶E Parisi ow, e amamkawi owam, e Herodes atakam mamkawi owam, e Yesuspu atewosomfes. E ow masirin, “Guru. Or jipic tarowat apormom ara. Onam Allah bokotpu atakam atakamnak amememtamcemem. Oram ow e atakam atawmesas omar opok. Oram, ‘Wun ow awut. Wun ow awut opok,’ baji opok ara.

¹⁷Onam atakam atawcarowey. E Kaisar, uang a batetam jirmec ajirimforow. Dar a uang a batetam akat open? Eras bwem, e Allah Jirmec bopow open? Or ucim bi binipam?” Inim aefes.

¹⁸Yesus nat, e ow e fasias aporef. Ar masirin, “Car pir bwe ow ara. Car aempormenokom ucimaram.

¹⁹E Kaisar batetamas uang cowoknakap do poromcan.” Inim aeef. E ow masirin, uang dinar cowok aramat ipic atowocenfes.

²⁰Aramat ipic masirin, “Awap gambar ca biam? Awap asuk wow ca juwasam?” Inim aeef.

²¹“A Kaisar bi ara. Aram Kaisar juwas ara.” Inim aefes. Yesus masirin, “Bare, car Kaisar pok, Kaisar mamtetamey. Caram, Allah pok, Allah mamtetamey.” Inim aeef.

²²Bare, e ow inim atakam jen ajifes, junum aefes. Aram aramat ipic bakan ajifes. Aram ajisosfes.

²³Bare. E jofayam Saduki ow, aramat ipic ameromfes. E Saduki ow abi binip ara, “Damir aaffes ow bojaworsit opok ara.” Inim bi binip aceceremcemes. Bare, e ow jonow aramat ipic atowporfes.

²⁴“Guru. Musa atakam atawef, ‘Jipic, jiwi bafimat opok damir aafcownew, e arewec, e damir ipic arem baotewetcow. Aram jiwi e arepwec bafimtamcow.’ Inim aeefen.

²⁵Bare, dajowow ipic ower jiwi tujuh ajiwar ara. E betiw ipic cepes atewetef. E nat, aramat ipic jiwi bafimat opok damir aafef. Inimas ar, e arem e abak ipic botewet, bakan ajiamesef.

²⁶E aykun ipicam inim cowok aemef. E wun aykun ipicam inimas cowok aoemef. Bare, e ow tujuh ajiwar takas inimas aemtotorfes.

²⁷Asep ara masirin, e cowocam damir aafef.

²⁸Bare, e ow takas e cowoc ateweta aefes. Inimas ara, e damir aaffes ow aojaworsitces jofay, e ow tujuh ajiwar aman, e cowoc ca ipic arem aememcow? Inim aefes.”

²⁹Yesus masirin, “Car e Alkitab atakam camsom opok. Caram Allah afakas camsom opok. Inimas car bi binip jiwic awamcokom.

³⁰Bare, e damir aaffes ow aojaworsitces jofay, ower ow, cepes botewet opok aemcemes. Cepesam ower bojuwut opok aemcemes. E nat, ar e onam op malaikat inim awcawor aememcemes.

³¹Allah, damir ow aojaworsitcesas, atakam car aotawfan. Caram e atakam baca emcaemfokom openow.

³²Aratakam, ‘Dor Abraham arAllah ara. Doram Ishak arAllah ara. Doram Yakub arAllah ara.’ Inim aefan. Bare, aramat ipic damir ow arAllah opok. Ar tetakay ow arAllah ara. (Inimas e damir aaffes ow aojaworsitcemes apormom ara.)” Yesus inim aeef.

³³E ow arke, e aramat ipic atakam atawefas jen ajifes, ar junum aefes.

³⁴Bare. Yesus e Saduki ow jokon kami desen emapomef. E Parisi ow inim atakam jen ajifes ara, aram ajarewsiemfes.

³⁵E wun ajarewsiemef Parisi ipic, Allah Jirmec mamememtam ipic ara. Aramat ipic, Yesus bwempor ememef. Inimas ar jonow Yesus atowporef.

³⁶“Guru. E Musa tulis aeapomef Jirmec aman, e awutnak jirmec ucim jirmecaram?” Inim aeef.

³⁷Yesus masirin, “E awutnak jirmec inim ara: ‘Damos awutnakut e oTuhan Allah mamjiomkurumey. Or e ojak epcomam, e obi binip epcomam, damos e aramat ipic mamjiomkurumey.’

³⁸Bare, e jirmec e awutnak jirmec ara. Aram e pentingnak jirmec ara.

³⁹E wun awut jirmec, a jirmec awcawor ara. E jirmec, ‘Damos e ojowow mamjiomey— or damos orma ajiomamem inim awcawora.’ E wun awut jirmec inim ara.

⁴⁰E Musa surat aeapomef takasam, e Allah atakam mamtaw ow aeapomfes surat takasam, a jirmec jamnuk jipu ara.” Yesus inim aeef.

⁴¹E Parisi ow ajarewsiemfes ara, Yesus jonow e ow atowporef.

⁴²“Car, e Allah Aeremtewef Ipic, ucim bi binip aceceremamokom? E aramat ipic ca urpisaram?” Inim aeef. E Parisi ow masirin, “Ar Daud urpis ipic ara.” Inim aefes.

⁴³E Yesus masirin, “Roh Kudus nat, atakam bi binip Daud atetamef. Daud masirin, ‘E Allah Aeremtewef Ipic, Tuhan ara.’ Inim aeef. E Daudam,

⁴⁴Tuhan, atakam, e doTuhan aotawef: Or a doban bo jamam emapey— dor e ojewew ow akumimosomkurumcey jofay ajiwara. Inim aeef. Aramat ipic inim atakam atawef nat, ucim aram?

⁴⁵Bare, Daud e Allah Aeremtewef Ipic, atakam atawef, ‘Ar doTuhan ara.’ Inim aeef. Inimas ara, e Allah Aeremtewef Ipic, Daud urpis ipic aememef nat, ucimaram?” Yesus inim aeef.

⁴⁶Bare, e ow Yesus atep bwemjit asan opok cowok. E jofay ajiwar, ow jonom aramat ipic bwemotowpor asan opok cowok. Ar omar aefes.