Read Central Asmat MATIUS 23 Bible Online

MATIUS 23 - Central Asmat bible

MATIUS 23

¹Bare. Yesus atakam e ow arkeam, e amamkawi owam, aotawef.

²“E Allah Jirmec mamememtam owam, e Parisi owam, e Musa Jirmec surat atakam bajomtam ow ara.

³Inimas car e atakam atawmesas takas ji mameey. E atakam jipu mamekurumey. E nat, car e ow aemamesas jipu bwem arapok. E ow ewen picin cowok atakam atawmes. E nat, ar e atakam atawmesas jipu bwem opok.

⁴Ar juturnakut pok manam ajikapomames. Wunam e pok kawey ow sop atatiwmes. E nat, ar e pok akac bataw, bare opok cowok aemames.

⁵Aram ow manmok a basirim jak aserememames. E aemamesas takas eras jipu aemames. Inimas ar Alkitab ayat epcom ese awut, e abipis atewtopomtotorcemes. Aram wun inim ese e asop ajimtopomtotorcemes. Aram e abaju jirow e bip comkan inim ciminas atewtopomtotorcemes.

⁶E pokbwi cem amanam, e sembahyang cem amanam, ar e bap ow asan bemap jak aserememames.

⁷E pasar asan ara, aram ow, ‘Selamato’ a baji jak aserememames. Aram ow, ‘Guru’ a baji jak aserememames.

⁸E nat, caGuru, bare cowokut ara. Caricipicam cowok ara. Inimas, ow, ‘Guru’ ca baji arapok.

⁹Caram awames capinmi ow, ‘Doricipic’ baji arapok. E caricipic, bare cowokut ara. Aramat ipic onam op awap.

¹⁰Owam, ‘Kepala’ ca baji arapok. E cakepala ipic cowokut ara. Er e Allah Aeremtewef Ipic ara.

¹¹E caramaman awut ow, e cakerja bwemtam ow baememces.

¹²Allah, e arma batawsicim ow takas namke akamemcema. E nat, ar e arma batawsicim opok ow asicimcema.”

¹³“Awapokom Allah Jirmec mamememtam owam, awapokom Parisi owam, car pir bwe ow ara. Car ajurusemcomokom. Car e Onam Op Pemerintah Asan jimasap, e jimasap ememames ow bipu akapimapomamokom inim cimin ara. Car e asan bafiw opok. Wunam car e asan afiwpormes ow, aotpemamokom inim cimin ara.” [

¹⁴Awapokom Allah Jirmec mamememtam owam, awapokom Parisi owam, car pir bwe ow ara. Car ajurusemcomokom. Car fwisma cepes cem osom atewetmokom. Wunam car janim Allah jirownakut aanimamokom. E nat, ar ow manmok ca batiwas cowok ara. Inimas ara, Allah siksa awutut car aomceman.]

¹⁵“Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car jipic cowoknakapam e caragama bafiw bacajijimtaw, e capinmi arke ajirtaya aemokom. Caram eras bwem, asan arke ajarmokom. Wunam e ipic e caragama afiwcow, car ar jokmen memem amememtamamokom. Bare, car jokmen kanim inim. E ipic nat, jokmen awutut ara. Bare, caram, aram, neraka akac afiwcomokom ow araman.

¹⁶Bare. Car ajurusemcomokom. Car bap awamcokom ow ara. E nat, car manmok kapi! Caram atakam, ‘Ow atayi faknakut aeces, wunam, Dor e atayi aeminas jipu aemcimin. Pate opok cowok. Allah cem awames,’ inim aeces, e ow e atayi biwosom, bare pwicak opok. E nat, ow atayi faknakut aeces, wunam, Dor e atayi aeminas jipu aemcimin. Pate opok cowok. Allah cem emas pok awames,” inim aeces, bare e ow e atayi bwemjiwosom asan opok. Inim aemokom.

¹⁷“Ca jen ow ara! Caram manmok kapi! E pentingnak pok, ucimasam? E Allah cem emas poknew? E Allah cem anakatnew? Bare, e Allah cem, e emas pok, akat emas pok aemapomama.

¹⁸Caram atakam, ‘Ow atayi faknakut aeces, wunam, Dor e atayi aeminas jipu aemcimin. Pate opok cowok. Allah cem pok jis bafamtam jowse awames,’ ” inim aeces, e ow e atayi biwosom, bare pwicak opok. E nat, ow atayi faknakut aeces, wunam, “Dor e atayi aeminas jipu aemcimin. Pate opok cowok. Allah bacatitam pok e Allah cem pok jis bafamtam jowse awap, inim aeces, bare e ow e atayi bwemjiwosom asan opok.’ Inim aemokom.

¹⁹Ca manmok kapi ow ara! E pentingnak pok ucimasam? E Allah bacatitam poknew? E Allah cem pok jis bafamtam jowsenew? Bare e pok jis bafamtam jowse e Allah bacatitam pok, akat pok aemapomama.

²⁰Ow atayi faknakut aeces, wunam, ‘Dor e atayi aeminas jipu aemcimin. Pate opok cowok. E Allah cem pok jis bafamtam jowse awames,’ inim aeces, ar e jowse cowok atakam opok. Ar e jowse ewapes pok takasam atakam atawcemes.

²¹Ow atayi faknakut aeces, wunam, ‘Dor e atayi aeminas jipu aemcimin. Pate opok cowok. E Allah cem awames,’ inim aeces, ar e cem cowok atakam opok. Ar e cem aman aemapmar ipicam atakam atawcemes. (E ipic, bare Allah ara.)

²²Ow atayi faknakut aeces, wunam, ‘Dor e atayi aeminas jipu aemcimin. Pate opok cowok. E onam op capinmi awames,’ inim aeces, ar e onam op capinmi cowok atakam opok. Ar e Allah fa bemap asanam e fa bemap asan aemapmar ipicam, atakam atawcemes.”

²³“Bare. Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car sērēām, iricam, wun inim pokam, persepuluhan Allah atatamamokom. E nat, car e Allah Jirmec penting awutas bwem opok. E penting awutas, bare ow tarowat memem ara. Kawey ow serow bajiom ara. Allah basicim ara. Er penting awutas ara. Bare, car eras bi binip aceceremcerey. E wunasam binip manimem arapok.

²⁴Ca manmok kapi bap ow ara. Isi mimin, e aancokom bwi aneysecow, car e isi mimin, finim aneyatamtewcomokom. E nat, car e aancokom bwi aman unta, desen atawnemcomokom.”

²⁵“Bare. Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car e mok cesenasam, e piring cesenasam, bwi acicikimamokom. E co pok aman nat, e ces aefokomasam, e paknam atewfokomasam, bare imwinakap ara.

²⁶Awapokom Parisi ow, manmok kapi ara. E mok aman batakamcicikimey. Inimas e cesenam, bare orom ara.”

²⁷“Bare. Awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Ow, bi awerem cem aaramcemes. Bare, car e awerem cem inim cimin ara. E cem cesenas bare akatipic ara. E cem aman nat, damir ow emake arkenakutam, ponowas jukpiri awutnakutam, awamses.

²⁸Caram inim ara. Kawey ow, car ow tarowat ara, inim bi binip aceceremames. E nat, e cajak aman, car pir bwe owam, Allah atakam bopow owam, awapokom ara.”

²⁹“Bare, ca awapokom Allah Jirmec mamememtam owam, Parisi owam, car pir bwe ow ara. Car ajurusemcomokom. Car e Allah atakam botaw damir ow awerem cem aeapomamokom. Caram, e ow tarowat e awerem, cosow asowapomamokom.

³⁰Caram, ‘Dar e darafasutmar jofay aemapfom ayaw, dar e darafasutmar e Allah atakam botaw ow akac bacatiw opok aemfom.’ Inim aemokom.

³¹Inimas aemokom ara, car, ‘Dar e Allah atakam botaw acatiwfes ow arurpis awamcom ara,’ inim atakam umuton atawmokom.

³²Bare, e carafasutmar aemawirisas emkurumey.

³³Amera! Amer jiwinakasa! Car e neraka aman siksaas, omar bwemjisos asan opok.

³⁴Inimas ara, dor Allah atakam botaw owam, bi binip umuton owam, Allah Jirmec mamememtam owam, capu atewenama aecimin. Caram e wun ow acatiwcomokom. Caram e wun ow salib os op acamtopomtotorcomokom. Caram e wun ow e casembahyang cem aman omop aafcomokom. Caram e ow e wun samatin samatin cemsanpu amimirimomatawarmokom.

³⁵Inimas ara, Allah e jokmen aemfokomas jipu siksa car aomceman. Kawey owam, ow tarowat acatiwfes. Allah, e kawey ow, e ow acatiwfesas takas, siksa car aomceman. Bap ara, e ow, e jipic tarowat juwas Habel acatiwfes. Asep ara masirin, car e Berekya atiw juwas Sakaria acatiwfokom. Car aramat ipic e Allah cemam, e Allah pok jis bafamtam jowseam, e wasec acatiwfokom ara. Bare, Allah, inim bacatiwas ajiwar, siksa car aomceman.

³⁶Atakamnak ara, Allah inim jokmenas takas jipu, siksa a awaniemames ow aomcema.”

³⁷“Yerusalem owa. Allah, e aratakam botaw ow, car atawenama aema. Ca nat, e ow acatiwa aemokom. Caram ek e ow dampu ajimira aemokom. Ayam arwas, e ajiwi, e kep atawanimapomcema. Doram bar arke, e catiperes, inim cimin batawanimapom jak aseremema aeof. Car ara masirin, inimas pwicak aemfokom.

³⁸Jakaperey. Allah e carasan bakan ajicema.

³⁹Asep jofay car atakam aotawcomokom, ‘Tuhan, asan akat, e atewenamamar ipic baomcow!’ Inim aecomokom. Ca nat, e jofay ajiwar, e dobi bopor opok aemcomokom.” Yesus inim aeef.