Read Central Asmat MATIUS 24 Bible Online

MATIUS 24 - Central Asmat bible

MATIUS 24

¹Bare. Yesus e Allah cem awut afisef. Aramat ipic cowocemsowmepaw, e amamkawi ow, aenawomfes. Ar e Allah cem takas, e Yesus aporomtamfes.

²Aramat ipic masirin, atakam e ow aotawef. “Car aras takas apormokomnew? Atakamnak ara, asep jofay a cem ek amanapor tonapor memames opok cowok aemcemes. Jewew ow nat, e ek takas ajumnemkurumcemes.” Inim aeef.

³Bare. Aramat ipic e sikon juwas Saitun op cowocemapmepaw, e amamkawi ow arop, aramat ipic aenawomfes. “Atakam otawcarowey. E atakam ataweremas ucim jofay emcow? E aofasicem jofayam, e asepnak jofayam, sotop enawcow, Allah ucim junum bweas aporomtamcow?” Inim aefes.

⁴Yesus masirin, atakam e ow aotawef. “Caram pimicima. Ow tot ca botasin.

⁵Ow arke aenawcemes, wunam, ‘E Allah Aeremtewef Ipic, bare dor ara,’ inim aetotorcemes. Aram tot ow arke aotcemes.

⁶Caram jewew bamo aporcomokom. Jewew bamo atakamam jen ajicomokom. Ca nat, omar arapok. Bare, ow jewew aamocemes araman. E nat, e asepnak jofay sotopnak opok aemamescema.

⁷Wun samat arke jewew e wun samat arke aamoa aecemes. Wun pemerintah arke jewew e wun pemerintah arke aamoa aecemes. Asan arkeam, ow amosto damir aafa aecemes. Asan arkeam ayow asisimtawa aecema.

⁸Eras takas nat, e bap bajurusemas ara. Wun bajurusemas masirin, asep ara.”

⁹“Er masirin, ow ban car akimomceman. Aram kawey ow, car bajurusum aotasimemtamceman. Aram car acajimirceman. E samatin takas, car do mamkawi ow aporceman. Ar masirin, bifan car afayomceman.

¹⁰Ow arkeam do mamkawi akorompimcemes. E ow arkeam aramaman aamotasimemtamcemes. Aram bifan aramaman aamfayomcemes.

¹¹Allah atakam botaw suw ow arkeam asitcemes. Ar ow arke tot aotcemes.

¹²Ow e Allah atakam bopow kayimin aameskakayiawarcemes. Inimas ow, damos kawey ow bajiom, akorompimcemes.

¹³E nat, ow e asepnak jofay ajiwar do mamkawi bakorompim opok aeces, aram ajoremcemes.

¹⁴Ow, a Allah Pemerintah Atakam Akat e capinmiin capinmiin takas acacapiomcemes. E atemen atakam e samatin samatin takas jen bajias ara. Er masirin, e asepnak jofay aenawcema.” Yesus inim aeef.

¹⁵“E Allah atakam botaw ipic juwas Daniel, ‘Pwicak Awutnakutas’ bwenaw, atakam atawefen. Caram e Pwicak Awutnakutas e karow asan memem aporcokom, bare e Yudea capinmi aememames ow, e sikon asanpu omar bajisosces. (Bare, a atakam baca bwem ow, a atakam jen bajikurumces.)

¹⁶

¹⁷E aporsipor cemko aemapces ow, e apok e acem batakamjiwtew arapok.

¹⁸E kebun kerja aemces owam, e abaju bofasitew arapok.

¹⁹Bare e jofay e jak epcom cepesam, e jiwi aw anamces cepesam, asan pwicaknakut aememcemes.

²⁰Caram janim Allah mamanimey. E omar jisoscokom jofay, e jufu bwi enemtepcow jofay arapok. Eram Ses Ban Jo arapok. Inim janim mamanimey.

²¹Bare, e jofay, ow bajurusem awutnakut aemcemes. Allah a capinmi akenemtiwef jofayam, wow ajiwaram, inim awutnakut bojurusem opok aemcemes. Eram boenaw opok cowok aemcema.

²²Allah nat, atakam asakamtiwef. ‘E ow ajurusemcesas, jirow arapok.’ Inim aeef. Ar inim atakam basakamtiw opok ayaw, ow takas damir aafcemes. E nat, Allah e ar aereremtawef ow sawes akat aoworporef. Inimas ar e ow ajurusemcesas, jirow arapok, inim atakam asakamtiwef.”

²³“Ow atakam car aotawcan, ‘Jakaperey. E Allah Aeremtewef Ipic arasan ara,’ wunam, ‘E Allah Aeremtewef Ipic erasan ara,’ inim aecannew, car e atakam jen baji arapok.

²⁴Bare, wun ow, ‘Dor e Allah Aeremtewef Ipic awamcey ara,’ inim suw atakam atawtotorcemes. Suw Allah atakam botaw owam aememcemes. E ow tot e Allah aereremtawef owam aotporcemes. Inimas ar junum bweas aemcemes.

²⁵Jakaperey. Dor a atakam bap car aotawfin.”

²⁶“Inimas ara, ow atakam car aotawcan, ‘Jakaperey. Aramat ipic e cem opok asan awamec,’ inim aecan, car erasan baysos arapok. Wunam, ‘Aramat ipic e cem aman awap,’ inim aecan, car e atakam jen baji arapok.

²⁷Bwer aran ewparaycema, wunam piri aneyparaytepcema. Bare, e Asamat Anakat Ajaworemef Ipic inim umuton aenawcema.

²⁸E sok cīncin, e damir pok asan aakopsiawarma.”

²⁹“E jofay ara, ow ajurusemcemes. Ajurusemces masirin, e jopok jiwic asarimcamtiwcema. E piram baneyseremtiw opok aemcema. E bayitam, bayaram, akokoysayneycema. Allaham e onam op sereas akokoromcema.

³⁰Er masirin, ow e Asmat Anakat Ajaworemef Ipic bwenaw baporomas, e onam op aporcemes. Awames capinmi samatin samatin masirin, bwec awutnakut abweccemes. E Asmat Anakat Ajaworemef Ipic, e onam op jak ton memem aneycema. Aramat ipic, fakas epcomam, akatnakutas epcomam, aneycema. E samatin samatin inimas aporcemes.

³¹E aramat ipicam fwi awutut aamcema. Er e amalaikat batawosomas ara. E malaikat masirin, e Allah e asanin asanin aereremtawef ow, aaramsimapomcemes.”

³²“E os juwas ‘arā’ aemamaras, bi binip mamceceremey. E os e jinfas acokoemcow aporcokom, ‘E jusuw bwi sotop ara,’ inim aecomokom.

³³Caram ara. Car e atakam atawminas takas aporcokom, car e Asmat Anakat Ajaworemef Ipic aenawcow jofay sotopnakap aporcomokom. Aramat ipic sarim inim bwenaw aporcomokom.

³⁴Atakamnak ara, a capinmi awamces ow damir baf opok ara, e atakam atawminas takas bap a takam aemkurumcema.

³⁵E onam opam, a capinmiam, aanioscema. Doratakam nat, inim aatamemamesawarcema.”

³⁶“Asmat ow nat, e aramat ipic aoenawcow jofayam, jamam, amsom opok. E onam op malaikatam amsom opok. E Allah atiwam amsom opok. E aricipic cowok amsom ara.

³⁷E Asmat Anakat Ajaworemef Ipic aenawcowas, e Nuh e ametnak aemawiri jofayas awcawor aemcema.

³⁸E jofay, e bwi awut bwenaw opok ara, ow amosam, bwiam, anawiris. Owerowam cepes atatawiris. Cepesam ower ajuwutawiris. Ar e Nuh e ci awut cem emcom afiwef jofay ajiwar, inimas aemawiris.

³⁹E ow e aenawcowas amsom opok— e bwi awut aenawef jofay ajiwar ara. E bwi je awut nat, e ow takas asoromomosef. Bare, e Asmat Anakat Ajaworemef Ipic aenawcowasam, inim cimin aemcema.

⁴⁰E jofay, ow jamnuk kebun asan aememcemes. Malaikat masirin, ow cowok atewcemes. E wun cowok masirin, bakan ajiemcemes.

⁴¹Cepes jamnukam, wasan, amos akac ajowcemes. Malaikat masirin, cowok atewcemes. E wun cowok masirin, bakan ajiemcemes.

⁴²Inimas ara, manmok mamtiwawarey. Car e caTuhan aenawcow jofay camsom opok.

⁴³Jakaperey. Cem aramat ipic e osom ipic aenawef jam amsom ayaw, aram manmok atiwapef. E osom ipic e cem jiwi bajumtiwasin.

⁴⁴Inimas ara, caram manmok inim sirimapey. Car, ‘E Asmat Anakat Ajaworemef Ipic wow bwenaw opok,’ inim bi binip aceceremcokom jofay, bare e jofay aramat ipic aenawcema.”

⁴⁵“E anakat kerja bwemtam ipicam, e bi binip epcom kerja bwemtam ipicam, ucim ipicam? E akerja aramat ipic, e ipic, e acem mandor ipic atewemcema. E wun kerja bwemtam ow, amos memen aemapa aeces, e ipicam, amos pok, e ow sey aseyetama aecema.

⁴⁶E kerja aramat ipic aenawcow, wunam ar e akerja bwemtam ipic inimas bwem aporcow, bare e kerja bwemtam ipic asan akat aemapcema.

⁴⁷Atakamnak ara, e kerja aramat ipic, e ipic, e apok takas, manmok batiw atewemcema.

⁴⁸E nat, e ipic, kerja bwemtam ipic pwicak aememcow, wunam, ‘E dokerja aramat ipic bofasienaw sarim opok aemcema,’ inim bi binip aceceremcow,

⁴⁹wunam ar e ar akac kerja bwemtam ow omop aafcow, wunam ar e jokmen bwi jayic ow amosam, bwiam, akac aancow,

⁵⁰bare, e jofay e kerja aramat ipic aofasicema. E kerja bwemtam ipicam, ‘E kerja aramat ipic, wow bofasi opok openow.’ Inim aecema. E nat, e jofay cowok e kerja aramat ipic aofasicema.

⁵¹Aram e kerja bwemtam ipic acatiwcema. Aram e ipic e pir bwe ow asan atewapomcema. Erasan w bwec abweccemes. Aram dam jen ajicemes.”