Read Central Asmat MATIUS 25 Bible Online

MATIUS 25 - Central Asmat bible

MATIUS 25

¹“E jofay ara, e Onam Op Pemerintah, tawowos cepes sepuluh ajiwar aemfesas inim cimin aemamescema. E cepes e apelita atowomtotorfesen. Ar masirin, e ajowow cowoc jepen ajuwutor ipic biamnuk bwemamtew ajisfesen.

²E wun tawowos cepes lima ajiwar bi binip opok aememfesen. E wun tawowos cepes lima ajiwar masirin, bi binip epcom aememfesen.

³E bi binip cepes, e apelita atowomtotorfesen. E nat, ar wun minyak batowom opok aemfesen.

⁴E bi binip epcom cepes nat, co pok minyak epcomam, pelitaam, atowomtotorfesen.

⁵E ay petew ipic nat, kamornakap aenawefen. Inimas e cepes takas isi manmok aemapfesen. Wunam isi apwitamesfesen.”

⁶“Iramnak ara masirin, ow atakam afakaytawfesen. ‘Jakaperey. Aramat ipic aenawmar ara. Car e aramat ipic biamnuk bwemamtew bajiwey.’ Inim aefesen.

⁷E tawowos cepes takas masirin, ajitfes. Aram e apelita akenemapomkurumfesen.

⁸E bi binip opok cepesam, atakam e bi binip epcom cepes aotawfesen. ‘E wun minyak da tetamcarowey. E dapelita asasapimes.’ Inim aefesen.

⁹E bi binip epcom cepes nat, ‘Da minyak awut opoknakap. Inimas dar minyak car bwemtetam asan opok. Ca nat, e toko jisosey. Carop minyak patakamjitittotorey.’ Inim aefesen.

¹⁰Bare, e bi binip opok cepes minyak baytit ajisfesen. E bowsec ajarfes ara, e ay petew ipic aenawefen. E pelita emcakenemapomkurumfes cepes masirin, e aramat ipic, e pokbwi cem akac afiwfesen. Ow masirin, e cem jimasap akapimapomfesen.”

¹¹“Asep ara masirin, e wun tawowos cepes aofasifesen. ‘Diwi. E jimasap bapayimtewcarowey.’ Inim aefesen.

¹²Aramat ipic nat, ‘Atakamnak ara, car nomsom opok.’ Inim aeefen.

¹³Bare, caram ara. Manmok mamtiwawarey. Car e caTuhan aenawcow jofayam, jamam, camsom opok.”

¹⁴“Wunam e Onam Op Pemerintah, bare wun capinmi ajisosef ipic aemefas inim cimin ara. Aramat ipic e akerja bwemtam ow ajateefen. Ar masirin, e apok, e ow manmok batiwtam, atetamefen.

¹⁵Aramat ipic, uang juwas talenta lima ajiwar, e wun kerja bwemtam ipic atetamefen. Aram uang talenta jamnuk e wun ipic atetamefen. Ar masirin, talenta cowok wun ipic atetamefen. E atetamefas, e kerja bwemtam ow cescuwas jipu atatamtotorefen. Aramat ipic masirin, jewey capinmi ajisosefen.

¹⁶E uang talenta lima ajiwar atewef ipic, e uang, pok auwumamtawa aeefen. Inimas ar uang talenta lima ajiwar akakayima aeefen.

¹⁷E uang talenta jamnuk atewef ipic inim inim aemefen. Ar masirin, wun uang talenta jamnuk akakayima aeefen.

¹⁸E uang talenta cowok atewef ipic nat, se jof asesewefen. Ar masirin, e akerja aramat ipic uang acukumtiwefen.”

¹⁹“Bare, tarey bwiut ara, e kerja aramat ipic aofasienawefen. Ar masirin, e atetamef uang atakam atawefen.

²⁰E uang talenta lima ajiwar atewef ipic e cem afiwefen. Ar e uang talenta sepuluh ajiwar takas atowomiwefen. ‘Diwi. Or e oruang talenta lima ajiwar atetamfenem. Jakaperey. Dor wun uang talenta lima ajiwar aokayimof.’ Inim aeefen.

²¹E akerja aramat ipic masirin, atakam e ipic aotawefen. ‘E aemfemas, bare akat ara. Or akat kerja bwemtam ipicam, kerja bwemtam ipic anakatam, awamcem ara. Or e pok kanim aomomfem ara, or ow anakat aememfem. Inimas ara, dor, pok awut manmok batiwtam, or atewemcimin. Oram dey. Dar jak akat akac ememamoc.’ Inim aeefen.

²²E uang talenta jamnuk atewef ipicam e cem afiwefen. ‘Diwi. Or e oruang talenta jamnuk atetamfenem. Jakaperey. Dor wun uang talenta jamnuk aokayimof.’ Inim aeefen.

²³E akerja aramat ipic masirin, atakam e ipic aotawefen. ‘E aemfemas, bare akat ara. Or akat kerja bwemtam ipicam, kerja bwemtam ipic anakatam, awamcem ara. Or pok kanim aomomfem ara, or ow anakat aememfem. Inimas ara, dor pok awut manmok batiwtam, or tewemcimin. Oram dey. Dar jak akat akac ememamoc.’ Inim aeefen.”

²⁴“Barewen. E uang talenta cowok atewef ipicam, e cem afiwefen. ‘Diwi. Or jokmen ipic aporof ara. Or e or batewapom opok pok akan anakatas atewencemem. Oram e or bajow opok amos atewencemem.

²⁵Dor inimas aporof, wunam omar aeof. Dor e oruang talenta cowok se aman acukumtiwof. Jakaperey. Oras awames ara.’ Inim aeefen.

²⁶E akerja aramat ipic masirin, atakam e ipic aotawefen. ‘Or kerja bwemtam ipic fasi awamcem ara. Oram besem ipic awamcem ara. Dor e dor batewapom opok pok akan anakatas atewencimin. Doram e dor bajow opok amos atewencimin. Or inimas aporfemnew?

²⁷E uang manmok batiw ow, kawey ow uang ateweta aecemes. Asep ara, masirin, ar inim uangam, bokayim uangam, e ow aofasimtama aecemes. Or e doruang inim ow atetamceremaw. Or inimas em ayaw, aofasienawof ara, dor e tetamfin uangam, e boyakim uangam, aotewof.’ Inim aeefen.

²⁸E kerja aramat ipic masirin, atakam e awun kerja bwemtam ow aotawefen. ‘Bare, e aomomamar uang talenta cowok botewey, wunam e uang e uang talenta sepuluh ajiwar aomomamar ipic tetamey.

²⁹Pok epcom ow, wun pok aotewetcemes. Ar masirin, pok awut aomomcemes. E nat, ow, e pok opok ow e apoknakas aotewcemes.

³⁰Car e pwicak kerja bwemtam ipic e jiwicnakut asan mamjiwisimey. Erasan ara, ow bwec abweccemes. Aram dam jen ajicemes.’ E kerja aramat ipic inim aeefen.”

³¹“E Asmat Anakat Ajaworemef Ipic e arakatnakutas epcom aenawcow, e malaikat takasam akac aenawcemes. Aramat ipic masirin, e araja fa memap asan akatnakut aneypwikapcema.

³²E samatin samatin ow takas, e aramat ipic bipu ajarewsiemcemes. Aramat ipic masirin, e ow, aporsipor asan ajiemcema. Er domba manmok batiw ipic e dombaam, e kambingam, aporsipor asan ajiemcema inim cimin ara.

³³Aramat ipic e domba e bo banpu atewemcema. Ar masirin, e kambing e tamo banpu atewemcema.

³⁴E Raja masirin, atakam e bo banpu memem ow aotawcema. ‘Doricipic, asan akat car aomaman. Aramat ipic a capinmi akenemapomef jofay ar aPemerintah Asan akenemapomef. Caram dey. E asan bafiwapey.

³⁵Bare, dor amosto aememof. Car masirin, amos atetamfenokom. Doram bwito aememof. Car masirin, bwi atetamfenokom. Doram jewey samat ipic aememof. Car masirin, cem atowomiwfenokom.

³⁶Doram dam fi aememof. Car masirin, pakaian atetamfenokom. Doram dam ajowof. Car masirin, asan akat aemfenokom. Doram penjara cem aman aemapof. Car masirin, aenawpora inim aefenokom. Inimas car e asan bafiwapey.’ E Raja inim aecema.

³⁷E ow tarowat masirin, jonow e aramat ipic atowcemes. ‘Tuhan. Dar or amosto aporfenom, wunam amos or atetamfenom, ucim jofay aemfenom? Daram or bwito aporfenom, wunam bwi or atetamfenom, ucim jofay aemfenom?

³⁸Daram or jewey samat ipic aporfenom, wunam cem atowomiwfenom, ucim jofay aemfenom? Dar or dam fi aporfenom, wunam pakaian or atetamfenom, ucim jofay aemfenom?

³⁹Or dam ajowfemam, penjara cem aman aemapfemam, wunam aenawpora inim aefenom, ucim jofay aemfenom?’ Inim aecemes.

⁴⁰E Raja ipic masirin, atep ajitcema. ‘Atakamnak ara. Awamces dojowow, bare ow kanim ara. E nat, car eras dojowow ipic cowoknakap aemfokomnew, caram eras dor aemfenokom araman.’ Inim aecema.”

⁴¹“Aramat ipic masirin, atakam e tamo ban memem ow aotawcema. ‘Cey. Car a dobipu boemem arapok. Allah car ajurusumcema. Aramat ipic, e basapi opok cowok jismak asan, akenemapomef. Er e Iblisam, e Iblis malaikatam, bajurusum asan ara. Caram e jismak asan bafiwapey.

⁴²Dor amosto aememof. Ca nat, amos do batetam opokut aemfenokom. Doram bwito aememof. Ca nat, bwi do batetam opokut aemfenokom.

⁴³Doram jewey ipic aememof. Ca nat, do batowomiw opokut aemfenokom. Doram dam ajowof. Doram penjara cem aman aemapof. Ca nat, do bwenawpor opokut aemfenokom.’ Inim aecema.

⁴⁴E ow masirin, jonow atowcemes. ‘Tuhan. Or amosto aememfemnew, bwito aememfemnew, jewey ipic aememfemnew, dam ajowfemnew, penjara cem aman aemapfemnew, dar masirin, inim aporfenom, wunam dar asan akat or bom opok, ucim jofay aemfenom?’ Inim aecemes.

⁴⁵Aramat ipic masirin, atep e ow ajitcema. ‘Atakamnak ara, car, awamces ow kanim, asan akat bom opok aemfokomnew, bare caram asan akat do bom opok aemfenokom.’ Inim aecema.

⁴⁶Bare, e ow, e batamjurusemawar asan ajisoscemes. E ow tarowat masirin, jiwnenak aatamemawarcemes.” Yesus inim aeef.