Read Central Asmat MATIUS 26 Bible Online

MATIUS 26 - Central Asmat bible

MATIUS 26

¹Bare, Yesus inim atakam aotawkurumef. Inim atakam aotawkurumef masirin, aram atakam e amamkawi ow aotawef.

²“E Bakamsow Pokbwi jowan aemcemes. Car inimas camsom. E jofay ara, ow, e Asmat Anakat Ajaworemef Ipic salib os op bacatopom, aotasimemtamcemes.” Inim aeef.

³Bare, e Allah atakam mamtaw tugas ow awutam, e Yahudi ownucuram, e Allah atakam mamtaw tugas ipic awut juwas Kayafas acemut ajarewsiapfes.

⁴E ow, Yesus, ban curuw bakimom, wunam bacatiw, at aetiwfes.

⁵E ow nat, “Dar eras bwem a pokbwi aman aropok. E mami ow owen da bamoasin.” Inim aefes.

⁶Bare, Yesus kota Betani aemapef ara, ar jipic juwas Simon acem ajiwapef. Bap ara, e ipic penyakit kusta ipic aemapef.

⁷Yesus e cem aman aemapef ara, cowoc cowok, ek botol, aramat ipicu atowocenef. E ek juwas “pualam” ara. Bare, e botol, minyak wangi epcom. E minyak harga awutnakut ara. Aramat ipicam amos cowocanmepaw, e cowoc, e minyak aramat ipic kus aokomnemef.

⁸E mamkawi owam inimas aporfes. “A cowoc e minyak aokomosomamar nat, ucimaram?

⁹Ar e minyak, uang auwumtewetcow, uang awutut atewetcema. E uang masirin, e pok opok ow batetam, bare akat ara.” Inim aefes.

¹⁰Yesusam inim atakam aporef. Ar masirin, “Car a cowoc ucim pok ajurusumamokom? E aemtamamanas, bare akat cowok ara.

¹¹E pok opok ow cadam sotop aatamemapawarcemes. Do nat, cadam sotop batamemapawar opok.

¹²A cowoc a minyak a dodam aokomnemama, er a dodam e awerem bajiwtatiwas ara.

¹³Atakamnak ara, ow a Atakam Akat e asanin asanin acacapiomces, ow e cowoc aemtamamanas inim atakam jen ajicemes.” Yesus inim aeef.

¹⁴Bare. E Yesus mamkawi ow dua belas ajiwar aramaman jipic cowok juwas Yudas Iskariot ara. Aramat ipic e Allah atakam mamtaw tugas ow awutpu aapenef.

¹⁵“Dor e Yesus car aotasimemtamcin, car ucim pok tetamcenokom?” Inim aeef. E ow masirin, uang perak tiga puluh ajiwar e ipic atetamfes.

¹⁶E jofay ajiwar, e Yudas, e Yesus, e ow botasimemtam asan akat, apowporef.

¹⁷Bare. E Bibit Opok Roti Pokbwi bap jofay aenawef. E Yesus mamkawi owam aramat ipic aenawomfes. Aram atakam aotawfes. “Or e Bakamsow Pokbwi ocenak asan emencem Dar e pokbwi pok bakenem.” Inim aefes.

¹⁸Aramat ipic masirin, “E kota, jipic cowok mammerporey. Atakamam e ipic mamotawey. E guru atakam, E damir aafcey jofay, bare sotopnakap ara. Doram, e domamkawi owam, e Bakamsow Pokbwi, e ocem aancomom. Inim mameey.” Yesus inim aeef.

¹⁹Bare, e mamkawi ow, e Yesus atakam ji aefes. Ar e Bakamsow Pokbwi pok akenemfes.

²⁰Iram ara masirin, aramat ipicam, e mamkawi ow dua belas ajiwaram, amos memen aneypwikapfes.

²¹Amos cowocanmepesaw, aramat ipic atakam atawef. “Atakamnak ara, e ca wun ipic cowok dor e jokmen ow aotasimemtamceman.” Inim aeef.

²²E owam jak pwicak aemaptotorfes. Ar masirin, jonow aramat ipic atowtotorfes. “Tuhan. E atakam atawmem ipic, dor opok openow?” Inim aetotorfes.

²³Aramat ipic masirin, “Amos, bwi dorcin sotanmom ipic cowok, e jokmen ow aotasimemtamceman.

²⁴E Asmat Anakat Ajaworemef Ipic damir aafcema. Er e Alkitab atakam jipu ara. E nat, e aramat ipic, e jokmen ow aotasimemtamcow ipic, asan pwicaknakut aemapcema. E ipic bajisames opok ayaw, bare ar asan akat ara.” Inim aeef.

²⁵E Yesus, e jokmen ow aotasimemtamcow ipic juwas Yudas, atakamam atawef. “Guru. Er dor aranew?” Inim aeef. Yesus masirin. “Bare, er e atawmem atakam jipu ara.” Inim aeef.

²⁶Bare, e ow amos memen aemapfes ara, Yesusam amos atewef. Aram terima kasih atakam Allah aotawef. Ar e amos akokomef, wunam e amamkawi ow sey aseyetamef. “A amos bateweney. A dodam das ara.” Inim aeef.

²⁷Aramat ipic masirin, gelas anggur bwi epcom atewef. Terima kasih atakam Allah aotawef. Wunam e gelas bwi e ow sey aseyetamef. “Car takas a bwi paney.

²⁸A bwi dores ara. Ametnak ara, Allah asmat ow bajortew atayi aeef. Dores ow arke bajortew airineycema. E dores, e Allah atayi aefas, atakamnak aporomtamcema. E dores airineycow, ar ow arke adosa bakokoromosomtamas ara.

²⁹Ca nat, jakaperey. Wow ajiwar, dor a anggur bwi boan opok— dor ay anggur bwi e doricipic aPemerintah Asan car akac aoancom jofay ajiwara.” Yesus inim aeef.

³⁰E ow masirin, Allah basicim so aefes. Allah basicim so aefes masirin, e sikon juwas Saitun aapenfes.

³¹Bare. Yesus atakam e ow aotawef. “E Alkitab atakam, ‘Dor e domba manmok batiw ipic acatiwcimin. E domba masirin, apacayoscemes.’ Inim aema. Inimas ara, wow iram car takas do mamkawi akorompimcemenokom.

³²E nat, Allah dor aojaworomsumutumcan, dor Galilea capinmi bap ajisoscimin. Car masirin, asep aapenawcomokom.” Inim aeef.

³³Petrus masirin, atakam aramat ipic aotawef. “E wun ow takas or mamkawi akorompimcenesnew, do nat, opok.” Inim aeef.

³⁴Yesus masirin, “Atakamnak ara, wow iram or atakam bar mamincop bap atawescemen, ‘Dor e Yesus nomsom opok,’ inim ajiescemem. E ayam jipic masirin, atakam asep akoreyescema.” Inim aeef.

³⁵Petrus masirin, “Ow orcin akac acatiwcemarowos openow. Do nat, ‘Dor e Yesus nomsom opok,’ inim baji opok cowok aecimin.” Inim aeef. E mamkawi ow takasam inim atakam cowok aotawfes.

³⁶Bare. Yesusam, e mamkawi owam, asan juwas Getsemanipu ajisosfes. Aramat ipic masirin, “Car arasan inim atakamemapey. Dor masirin, erasan janim Allah aanimcimin.” Inim aeef.

³⁷Aramat ipic masirin, Petrusam, Sebedeus atiperes jamnukam, atowocenef. Aram jak pwicak aememefen. Bare, ar jak opoknak cowok aememefen.

³⁸Aram atakam e ow aotawefen. “Do jak pwicaknakut aememamin— dor damir badamirafken inim awcawor ara. Ca nat, arasan inim atakamemapey. Wunam manmok dor akac tiwapey.” Inim aeefen.

³⁹Aram bap kanimnakap aapenefen. Wunam bi fop aneyjirapefen. Aram janim Allah aanimefen. “Diwi. Akat aporcem, dor bajurusem arapok. E nat, e akat aporminas jipu bwem arapok. E akat apormemas jipu cowok emey.” Inim aeefen.

⁴⁰Aramat ipic masirin, e mamkawi owpu aofasienefen. Aram e ow isi aemamesfes aporefen. “Petrus. Car jam cowoknakap manmok dor akac bwemtiwap asan opoknew?

⁴¹Caram manmok inim mamtiwapawarey. Janim Allah inim mamanimawarey. Iblis car dosa bwem bacajijimtawasin. Car Allah atakam ji bwe, jak aseremapmokom ara. E nat, ca dam kumit ara.” Inim aeefen.

⁴²Bare, aramat ipic aoapenefen. Wunam janim Allah aoanimefen. “Diwi. Or dor bajurusem akat aporcem, e orakatas jipu emey.” Inim aeefen.

⁴³Aramat ipic masirin, e owpu aofasienawefen. Ar e ow isi aoemamesfes aoporefen. E ow isi manmok awutnakut arawen.

⁴⁴Aramat ipic masirin, e ow bakan aojiosefen. Aram bar mamincop ajiwar janim Allah aoanimefen. Ar e bap janim aanimefas cowok aoanimefen.

⁴⁵Aramat ipic masirin, e mamkawi ow aofasienawefen. Aram atakam e ow aotawefen. “Car isi awamsokomnew? Car ses aanmokomnew? Do wow ara. Jipic cowok e Asmat Anakat Ajaworemef Ipic e dosa ow aotasimemtamama.

⁴⁶Caram basitey. Bajisosmoc. E dor aotasimemtamcan ipic aenawmar ara.” Inim aeefen.

⁴⁷Yesus atakam cowocemtawmepaw, Yudas akan aakenawef. Ar e Yesus mamkawi ow duabelas ajiwar wun ipic cowok ara. Ow arkenakutam ar akac aenawfes. Ar owec parangam, warim pokam, atowotnawfes. E Allah atakam mamtaw tugas ow awutam, e Yahudi ownucuram, inimas jirmec ajirimfes.

⁴⁸Bap ara, e Yesus aotasimemtamcow ipic, atakam, e ow arke, aotawef. “E ak aafopcey ipic, bare e ipic ara. Ar ban mamkimomey.” Inim aeef.

⁴⁹Bare, e Yudas, e Yesuspu akan ameromef. “Guru. Selamato.” Inim aeef. Amat ipic masirin, Yesus ak aafopef.

⁵⁰Yesus masirin, atakam aramat ipic aotawef. “Aya. Bare, e aenawmemas emey.” Inim aeef. E ow masirin, Yesus aenawomfes. Ar aramat ipic ban akimomfes. Aram aramat ipic ban faknakut aomosomfes.

⁵¹E Yesus akac aememef ipic cowok, owec parang asumtewef. Ar masirin, e Allah atakam mamtaw tugas ipic awut akerja bwemtam ipic jenmak asakamnemef.

⁵²Yesus masirin, atakam e ipic aotawef. “E owec parang e ese botewapomey. Ow owec parang atewces, aram owec parang damir aafcemes.

⁵³Dor e doricipic do bajortew janim aanimceynew, aramat ipic, malaikat arkenakut atewenamcema. Or inimas omsom opoknew?

⁵⁴E nat, a ow aemamesas, e Alkitab atakam jipu ara. Allah, malaikat atewenamcownew, awamces ow e Alkitab atakam jipuas bwemem asan opok.” Inim aeef.

⁵⁵Yesusam atakam e ow arke asarimotawef. “Car owec parangam, warim pokam, do batew, atowotnawmokom ucimaram? Ca nat, do pok ces bwetaw ipic inim aranew? Join join dor e Allah cem aman aemapa aeof, wunam atakam amememtama aeof. Ca nat, ban do bakimop opokut aema aefenokom.” Inim aeef.

⁵⁶Bare, e aemfesas takas, e Allah atakam botaw ow surat aeapomfes atakam jipu bwemas ara. Bare, e Yesus mamkawi ow takas, aramat ipic bakan ajifes. Aram omar ajisosfes.

⁵⁷Bare, e Yesus atewfes ow, aramat ipic, e Allah atakam mamtaw tugas ipic awut juwas Kayafaspu atowomosfesen. Erasan ara, e Allah atakam mamememtam owam, e ownucur owam, emcajarewsiapfesen.

⁵⁸Petrusam, e Allah atakam mamtaw tugas ipic awut acemsanpu, damasan opok Yesus fa asoromefen. Aramat ipic e cem afiwef, wunam ar e Allah cem manmok batiw ow cowkon ajamemapefen. Ar ow e Yesus aemcesas baporen.

⁵⁹E Allah atakam mamtaw tugas ow awutam, e atakam mamsakam ow awutam, Yesus bacatiw, inim atakam mamsakam akat arawen. Inimas ar suw atemen ow janim aanimfes. Ar e ow, “E Yesus inim pwicakas aeef,” bajitotor akat arawen.

⁶⁰Suw atemen bwe ow arkeam aenawa aefesen. E nat, e atemen aefesas, Yesus bacatiwas opok. Asep ara masirin, jipic jamnuk aenawfesen.

⁶¹Aram atakam atawfes. “E Yesus atakam, ‘Dor a Allah cem bajumtiwam, bar mamincop boapomam, inim fakas awomcey ara.’ Inim aeef,” E jipic jamnuk inim aefesen.

⁶²E Allah atakam mamtaw tugas ipic awut masirin, asitefen. Atakamam Yesus aotawefen. “Awamces ow, or salah atakam atawmes. O nat, e ow atep bajit opoknew?” Inim aeefen.

⁶³Yesus nat, jokon cowok ajiemefen. E Allah atakam mamtaw tugas ipic awut masirin, atakam aramat ipic aotawefen. “Dor e jiwne Allah juwas ajiemamin. Inimas dor jirmec or ajirimamin. Atakam da otawcarowey. Or e Allah Aeremtewef Ipic open? Or Allah atiw open?” Inim aeefen.

⁶⁴Yesus masirin, “Bare, dor e atawmem atakam jipu ara. Do nat, atakam car takas aotawmin. Wow jofay ajiwar, car e Asmat Anakat Ajaworemef Ipic, e faknakut Allah ban bo jamam bemap, aporcomokom. Caram aramat ipic, e onam op jak ton memem boney aporcomokom.” Inim aeefen.

⁶⁵E Allah atakam mamtaw tugas ipic awut masirin, e apakaian akamosomefen. Atakamam atawefen. “E ipic Allah awcawor arawen. Inimas ar pwicak atakam awut atawma. Dar atemen atakam jen boji arapok. Car wow e pwicak atakam atawmaras jen ajimokom.

⁶⁶Ca nat, ucim atakam asakamtiwmokom.” Inim aeefen. E ow masirin, “E ipic pwicakas aemama. Damir baafcow.” Inim aefesen.

⁶⁷Bare, e ow bese aramat ipic bi ajiokopomfesen. Aram ban fon aramat ipic aemfesen. Wun ow masirin, aramat ipic ak aempofesen.

⁶⁸“Or e Allah Aeremtewef Ipicut ara. Omop ca afan? Atakam otawcarowey.” Inim aefesen.

⁶⁹Bare, Petrus e cesen aemapefen. Kerja bwemtam cowoc masirin, aramat aenawomefen. Aram atakam aramat ipic aotawefen. “Oram e Galilea ipic juwas Yesus akac aemawirukum.” Inim aeefen.

⁷⁰E Petrus nat, e ow takas bipu apacinefen. “E atakam atawmemas nomsom opok.” Inim aeefen.

⁷¹Aramat ipic masirin, e jimasappu ajarefen. Wun kerja bwemtam cowocam aramat ipic aporefen. Aram atakam erasan aememfes ow aotawefen. “Awamec ipic e Nasaret ipic juwas Yesus akac aememawiris.” Inim aeefen.

⁷²Aramat ipic masirin, aopacinefen. “Pate opok cowok. Allah manmok tiwap. Dor e ipic nomsom opok.” Inim aeefen.

⁷³Asep ara masirin, e erasan aememfes ow, Petrus aenawomfesen. Aram atakam aramat ipic aotawfesen. “Oram e ow ajowow ipic araman. E atawmem atakam e ow atakam cawor apormom ara.” Inim aefesen.

⁷⁴Petrus masirin, “Pate opok cowok. Allah manmok tiwap. Bare, dor e Yesus nomsom opok.” Inim aeefen. Barewen. Ayam jipic asarimkoreyefen.

⁷⁵Bap ara, Yesus atakam Petrus aotawefen. “Or atakam bar mamincop bap aotawescemen, ‘Dor e Yesus nomsom opok,’ inim ajiescemem. E ayam jipic masirin, atakam asep akoreyescema.” Inim aeefen. Bare, Petrus e atakam, bi binip acomomefen. Ar masirin, cesen afisef, wunam bwec awutut abwecefen.