Read Central Asmat MATIUS 27 Bible Online

MATIUS 27 - Central Asmat bible

MATIUS 27

¹Barewen. Tamnakap ara, e Allah atakam mamtaw tugas ow awut takasam, e Yahudi ownucuram, Yesus bacatiw atakam asakamtiwfesen.

²Ar aramat ipic manam ajikapomfes, wunam atowomosfesen. Aram aramat ipic e gubernur ipic juwas Pilatus aotasimemtamfesen.

³Barewen. E ow Yesus bacatiw atakam aamsakamfesen. E Yesus, e jokmen ow aotasimemtamef ipic juwas Yudas, inimas aporefen. Aramat ipic masirin, ay bi binip aceceremefen. Ar uang perak tiga puluh ajiwar, e Allah atakam mamtaw tugas ow awutam, e ownucuram, aofasimtamefen.

⁴E Yudasam, “Dor jipic tarowat, ow a bacatiw aotasimemtamof. Inimas dosa aemof.” Inim aeefen. E ow masirin, “Er oras. Daras opok.” Inim aefesen.

⁵Bare, e aramat ipic, e uang perak, e Allah cem aman bipar ajiwtitamefen. Ar masirin, aojisosefen. Aram somen e fomak ajikapomef, wunam arma sanaw aeamesefen.

⁶E Allah atakam mamtaw tugas ow awut, e uang perak atewfesen. Aram, “E uang ow bacatiw uang ara. Inimas dar e uang e derma batewapom karow araman.” Inim aefesen.

⁷Ar masirin, atakam aamsakamfesen. Wunam ar e uang, capinmi juwas “Piring Batu Bakenem Asan” ajititfesen. Ar e capinmi jewey damir ow se bawuapom asan, akat arawen.

⁸Inimas wow jofay ajiwar, ow, e capinmi juwas “Es Capinmi” aemes.

⁹E aemfesas, e Allah atakam botaw ipic juwas Yeremia e atawef atakam jipuas ara. Bap ara, aramat ipic atakam, “E ow e uang perak tiga puluh ajiwar atewfes. E Israel ow, inim uang, e aramat ipic botasimemtam ipic batetam, atakam aamsakamfes.

¹⁰Ar masirin, e Piring Batu Bakenem Asan capinmi ajititfes. Er e Tuhan jirmec ajirimfinas jipu ara.” Inim aeefen.

¹¹Barewen. Ow, Yesus, e gubernur bipu atowocenfes. E gubernur masirin, jonow aramat ipic atowefen. “Or e Yahudi ow araja ipic aranew?” Inim aeefen. E Yesus masirin, “Bare, e atawmemas atakamnak ara.” Inim aeefen.

¹²E Allah atakam mamtaw tugas ow awutam, e ownucuram, “E Yesus salah ara,” inim aefesen. Aramat ipic nat, atep bajit opoken.

¹³E Pilatus masirin, atakam aramat ipic aotawefen. “E ow, or salah arke atakam atwmes. Or e atakam jen baji opoknew.” Inim aeefen.

¹⁴Aramat ipic nat, atep bajit opok cowok arawen. Inimas e gubernur junum awut aeefen.

¹⁵Barewen. E Bakamsow Pokbwiin Pokbwiin, e gubernur, penjara cem bemap ipic cowok afimisimtama ajimepen— er e ow arke e aeremtewa ajimpes ipic jipu arawen.

¹⁶E jifayam, ar jipic juwas Barabas penjara cem aman aomopfesen. E ipicam an afufuosefen.

¹⁷Bare, e ow arke icim afesfesen. Inimas bap ara, ar e Yesus e Pilatus aotasimemtamfesen. E Pilatusam e icim afesfesas aporefen. Inimas e ow arke ajarewsiemfes ara, aramat ipic jonow e ow atowporefen. “Dor ocenak ipic afimisimtamcey? Barabasnew? Yesusnew? Bare, wun ow, ‘E Yesus e Allah Aeremtewef Ipic ara,’ inim aemes.” E Pilatus inim aeefen.

¹⁸

¹⁹Barewen, E Pilatus, ow boworpor asan aemapefen. E arem masirin, atakam wun ipic aotawefen. “Oram Pilatus mamotawey: ‘Dor wun e ipic tarowat isi tamwitey. Dor masirin, jak pwicak awut aemapmin. Inimas or e ipic pok bwem arapok.’ Inim eey.” E Pilatus arem inim aeefen. Bare, e ipic e atakam aotawtamefen.

²⁰E nat, e Allah atakam mamtaw tugas ow awutam, e ownucuram, e ow arke acajijimtawfesen. Ar e ow, Pilatus, e Barabas bafimisimtamam, e Yesus bacatitamam, inim janim manim acajijimtawfesen.

²¹E gubernur masirin, jonow e ow atowporefen. “Awamces jipic jamnuk aman, do ca ipic fimisimtamcen?” Inim aeefen. E ow masirin, “Barabas,” inim ajisawufesen.

²²E Pilatus nat, “Wun ow, ‘E Yesus, e Allah Aeremtewef Ipic ara,’ inim aemes. Dor e ipic ucimas emcey?” Inim aeefen. E ow masirin, “E ipic salib os op bacatopomey!” Inim aefesen.

²³Pilatus masirin, “Aramat ipic nat, ucim pwicakas aemef?” Inim aeefen. E ow nat, atakam awutut afafakaytawfesen. “E ipic salib os op bacatopomey!” Inim ajisawua aefesen.

²⁴E Pilatus, atakam e ow botaw emporef opoken. E owam jisuwan kayimin kayimin akakayimfesen. Aramat ipicam inimas aporefen. Ar masirin, bwi atewefen. Aram ban bwi e ow arke bipu acicikimefen. “A ipic damir aafcow, e salah doras opok. Caram caras.” Inim aeefen.

²⁵E ow takas masirin, “Owo. E ipic damir aafcowas salah aemamomnew, bare Allah, daram, datiperesam, bajurusumcarow.” Inim aefesen.

²⁶Bare, Pilatus, e Barabas, e ow afimisimtamefen. Aram ow Yesus omop baf jirmec ajirimef, wunam aramat ipic e ow salib os op bacatopom aotasimemtamefen.

²⁷Barewen. E gubernur atentara ow, e Yesus gubernur cem aman atowomiwfesen. Ar e wun tentara ow takas, e Yesuspu bwenawom, ajatefesen.

²⁸Ar e aramat ipic pakaian afamtewfesen. Wunam ar baju jirow esakam, e aramat ipic atamwimemfesen.

²⁹Aram fa epcom sinim atewfes, wunam kus bamapom biwnam asiapomfesen. Ar masirin, e biwnam, aramat ipic kus ajimapomfesen. Aram firko e aramat ipic ban bo atowapomfesen. Ar masirin, aramat ipic bipu jine onok aneyotapfesen. Aram aramat ipic uc aomocfesen. “Yahudi ow araja ipic akatenem! Selamato!” Inim aea aefesen.

³⁰Aram bese Yesus dam ajiokopomfesen. Aram os kanim atewfes, wunam Yesus kus omop aaffesen.

³¹E owam, e aramat ipic uc aomocfesen. Uc aomocfes masirin, e baju aofortewfesen. Aram arop pakaian e Yesus otamwimemfesen. Aram aramat ipic salib os op bacatopom atowomosfesen.

³²Ajisfes ara, ar kota Kirene ipic juwas Simon aporfesen. Ar aramat ipic Yesus salib batew aneneyfesen.

³³Ar asan juwas Golgota ajaremfesen. “Golgota” daratakam juw buwumtew, “Damir Kus Asan” ara.

³⁴Bap ara, ow anggur bwiam, jiram, aartamsemfesen. Ar masirin, e bwi Yesus anamfesen. Yesus e bwi anaporef, wunam ar e bwi ban pwicak aemefen.

³⁵Ar aramat ipic salib os op atewtopomfesen. Aram ek kanim aneyjiwitiwfesen. E ek kanim e aemcesas baporomtamas ara. Inimas ar aramat ipic apakaian, e ek kanim aporomtamefas jipu, aseyamatfesen.

³⁶Aram erasan aramat ipic manmok atiwapfesen.

³⁷Ow e aramat ipic salah aeefas tulis aeapomfesen. “A ipic Yesus ara. Ar e Yahudi ow araja ipic arawen.” Inim tulis aeapomfesen. Aram, e tulis aeapomfes atakam, e Yesus kuspu atometewapomfesen.

³⁸Aram pok ces bwe ow jamnuk salib os op atewtopomfesen. Ar e wun ipic e Yesus bopim jamam arop salib os op atewtopomfesen. Aram e wun ipic e Yesus tamopim jamam salib os op atewtopomfesen.

³⁹E erasan aokorfea aefes ow, kus owkasi owkasi aea aefesen. Aram cemew atakam Yesus aotawa aefesen.

⁴⁰“Or atakam atawfem, ‘Dor e Allah cem ajumtiwcimin, wunam bar mamincop dor e cem aoeapomcimin,’ inim aefem. O nat, Allah atiw aranew, orma joremey. Or e salib os op inim korneyey.” Inim aefesen.

⁴¹E Allah atakam mamtaw tugas ow awutam, e Allah Jirmec mamememtam owam, e ownucuram, e aramat ipic inim uc aomocfesen.

⁴²“E ipic kawey ow ajortewef. E nat, ar arma bwemjorem asan opok. Ar Israel ow araja ipic aranew? Ar wow e salib os op akorneycow, dar aramat ipic asicimcomom.

⁴³Aramat ipic atakam, ‘Dor Allah atiw ara,’ inim aeef. Aram Allah jirey aema. Inimas Allah e ipic damos ajiomamarnew, ar aramat ipic bajortewcow.” Inim aefesen.

⁴⁴E Yesus salib os op akac aemtepfes pok ces bwe ipic jamnukam, aramat ipic inim inim pwicak atakam aotawfesen.

⁴⁵Bare. Jok jam dua belas aememfes ara, e capinmi takas jiwic acamtiwefen. Jam tiga masirin, sere aoseremefen.

⁴⁶Jam tiga aranew, Yesus atakam afakaytawefen. “Eli, Eli lama sabaktani?” Inim aeefen. E atakam daratakam juw buwumtew, “DorAllah. DorAllah. Or bakan ucimas ajiosmenem?” Inim aeefen.

⁴⁷E wun erasan aememfes ow, inim atakam jen ajifesen. Ar masirin, “Aramat ipic Elia ajatema,” inim aefesen.

⁴⁸E wun ipic cowok masirin, je asarimkukuosefen. Ar bwi basirijiw pok atewef, wunam e pok asesak anggur bwi asotewefen. Aram e pok, wakan bip atamsimapomefen. Ar masirin, e pok Yesus, e bwi bacocomokop e bweyofpu, ajoromtomettemtamefen.

⁴⁹E wun ow masirin, “Ema. Elia, e aramat ipic bajortew bwenaw epen batakampormoc.” Inim aefesen.

⁵⁰Bare, Yesus atakam awut aofakaytawef, wunam damir aafefen.

⁵¹Bare, e Allah cem jimasap kain op ewkayneyef, wunam e cenes ajiwar akayfisef. Ajowam asimef. Ek awut arkeam atetereyfes.

⁵²Aweremam amumufes. Damir aaffes ow tarowat arke masirin, aojaworsitfes.

⁵³Ar e awerem aewwarimwisfes. Wunam Yesus aojaworsitef ara, e ow, e Akat Kota afiwemfes. Aram ow arke bipu afomisfes.

⁵⁴Barewen. E tentara komandan ipicam, e ar akac aememfes owam, Yesus manmok atiwemfesen. Ar e ajow asimef aporfesen. Aram e wunam aporfesen. Inimas omar awutut aefesen. “Awamec ipic Allah atiwnak ara.” Inim aefesen.

⁵⁵Cepesam arke manmok batiw damasan opok inim aememfesen. Bap ara, ar Yesus, Galilea capinmi, akac aewenawfesen. Ar, pok, aramat ipic afafaytamawiris cepes arawen.

⁵⁶E aememfes cepes aman ara, bare Maria Magdalena ara. Yakobusin Yusuf arosowoc juwas Maria ara. E Sebedeus atiperes arosowoc ara. Inim cepes arawen.

⁵⁷Porow ara masirin, Arimatea capinmi ipic juwas Yusuf aenawefen. Aramat ipic pok awut aomomefen. Aram Yesus mamkawi ipic aememefen.

⁵⁸Aramat ipic Pilatus bipu ameromefen. Ar masirin, Yesus e sumu ipic batew janim Pilatus aanimefen. Pilatusam, ow e sumu ipic, aramat ipic batetam, jirmec ajirimefen.

⁵⁹Yusufam e sumu ipic atewef, wunam ay kain akat, biram ajiktiwefen.

⁶⁰Ar masirin, e sumu ipic e aray ek jip awerem ajiwtatiwefen. Bap ara, ar e sikon ek jip awerem asiefen. Bare, ar e sumu ipic e awerem ajiwtatiwef masirin, wun ek awut e awerem jip imwipu apwepweremocenef, wunam e ek jip imwi akapimapomefen.

⁶¹Maria Magdalenaam, e wun Mariaam, e awerem awumin aemapfesen.

⁶²Ajofay ara masirin, e Allah atakam mamtaw tugas ow awutam, e Parisi owam, e Pilatuspu akac aapenfesen. Er Ses Ban Jo arawen.

⁶³Aram atakam atawfesen. “Tuan. Dar binip acomomamom. E tot bot ipic tetakay aememef ara, ar atakam, ‘Dor damir aafcey ara, bar mamincop aojaworsitcimin.’ Inim aeef.

⁶⁴Inimas ara, or, ow, e awerem, bar mamincop ajiwar manmok batiwem, jirmec bajirimey. E amamkawi ow erasan bwenaw, wunam e sumu ipic osom batewasin. Aram, ‘Aramat ipic aojaworsitor,’ inim suw atakam botawasin. E amamkawi ow inimas aeces, e asep tot botas awutut aemamescema. E bap tot botasam, kanim inim aemamescema.” Inim aefesen.

⁶⁵Pilatus masirin, “Manmok batiwem ow batewey. Caram cey. E awerem jimasap fak emapomey. Caram camsom ara.” Inim aeefen.

⁶⁶Bare, e ow ajisosfesen. Aram e manmok batiw owam, pokkari, e awerem jimasap, akac aeapomfesen. E owam e awerem manmok atiwfesen.