Read Central Asmat MATIUS 3 Bible Online

MATIUS 3 - Central Asmat bible

MATIUS 3

¹Barewen. Jofay ara, Yohanes Bwi Babwim Ipic e Yudea capinmi cem opok asan ajisefen.

²Aram atakam atawefen. “E Onam Op Pemerintah aenawcow jofay, bare sotopnakap asisienawma. Inimas car e dosaas takas bak bapayemtotorey.” Inim aeefen.

³Ametnak ara, Allah atakam botaw ipic juwas Yesaya atakam aotawefen: “Jipic cowok, cem opok asan atakam afakaytawcema. ‘E Tuhan ajarcow bokotpu mamkenemtiwey. E bokotpuam tarowata.’ Inim aecema.” E Yesaya inim aeefen. E Yesaya atakam atawef ipic, bare e Yohanes arawen.

⁴Bare, e Yohanes e ajimomef pakaian, binatang juwas unta fin pakaian arawen. E ase manam pok ara, binatang picin arawen. E aramos pok, pikamam, emor bwiam, arawen.

⁵E Yerusalem owam, e Yudea capinmi ow takasam, e jo juwas Yordan ow takasam, e aramat ipicpu ajukusirienfesen.

⁶E owam e adosa afafasimtotorfesen. E Yohanesam e ow e Yordan bwi abwimefen.

⁷Aramat ipic, Parisi ow arkeam Saduki ow arkeam, ajukusirienawfes aporefen. E ow, e Yohanes, bwi a babwim ajukusirienawfesen. E Yohanes masirin, “Amer jiwinakasa, Car e Allah ajurusumcowas omar baysos atakam ca otawfan?

⁸Car e dosaas bak apayemamokomnew, bare akatas mamemey.

⁹Caram, ‘Abraham darakut araman,’ inim bi binip bacacerem arapok. Allah, awames ek, Abraham urpis baworomem, inim fakas aomomamar araman.

¹⁰Wow, seysi, os tamow sotopnakap aemapma. Jipic cowok, e akat eke bape opok os, amatiwcema. Aram e os jismak asapimapomcema.

¹¹Dor e dosa bak apayemamokom ow, bwi abwimamin. Eras car dosa bak emcapayemamokom baporomas ara. E dofa asoromcan ipic nat, ow awut ara. Do kanim ara. Inimas dor e aramat ipic sandal bwemtowocentam asan opok. Aramat ipic, Roh Kudus e cajak aman afimimtamtotorceman. Aram jismak e cajak aman pwicakas aurumtiwcema inim cimin ara.

¹²Aramat ipic e of e po aemapomama. Ar amosnakin afomnemkurumcema. Aram e amos, cem atowoneycema. E nat, ar e apem jismak afamapomcema. E jismak, bare bwemsapiames asan opok.” Yohanes inim aeefen.

¹³Barewen. Yesus Galilea capinmi bakan ajiosef, wunam Yordan jo capinmi aomeremefen. Ar Yohanes bwi a babwim akat aemefen.

¹⁴E Yohanes nat, “Dor bwi o babwim arapok. Or bwi do babwimji. O nat, ucimas do besomamenem?” jiporef opoken.

¹⁵E Yesus masirin, “Bare bwi babwimcan. Inimas aemcom, dar e Allah akat apormaras jipu aemcomom.” Inim aeefen. Bare, e Yohanesam Yesus atakam ji aeefen.

¹⁶E Yohanes masirin, bwi e Yesus abwimefen. Bwi abwimef masirin, Yesus e bwi asarimkunawemefen. E onam opam amuapefen. Yesusam Allah Roh, pari cimin aneyef aporefen. Ar e Roh e adam ton aneyapef aporefen.

¹⁷Atakamam e onam op ewneyefen. “Awamec ipic dotiw ara. Dor aramat ipic damos ajiomamin. Dor aramat ipic akat ara.” Inim aeefen.