Read Central Asmat MATIUS 4 Bible Online

MATIUS 4 - Central Asmat bible

MATIUS 4

¹E Roh masirin, e Yesus, cem opok asan ajisomosefen. Ar Iblis e aramat ipic dosa bwem bacajijimtawpor erasan ajisomosefen.

²Isi empat puluh ajiwar, e Yesus amos pok amaseemawirien. Ar masirin, amosto aememefen.

³E dosa bwem bacajijimtawpor ipicam, Yesus aenawomefen. “Or Allah atiwnew, awamses ek, amos baworom, jirmec ajirimey.” Inim aeefen.

⁴Yesus masirin, “E Alkitab atakam, ‘Asmat ow tetakay mememas, ar amos pok memen cowok arapok. Ar e Allah atakam takas ji baekurumces.’ ” Inim aeefen.

⁵E Iblis masirin, e aramat ipic, e Akat Kota ajisomosefen. Aram aramat ipic e Allah cem e opnakut onew pwinew atomettewapomefen.

⁶E Iblis masirin, “Or Allah atiwnew, or a cenes juneyey. Bare, e Alkitab atakam: ‘Allah, amalaikat, or manmok batiwem, jirmec ajirimcema. E malaikat masirin, ban or atowomcemenes. E obwey, ek bapomotasin.’ E Alkitab inim aema.” Iblis inim aeefen.

⁷Yesus masirin, “E Alkitab atakamam, ‘E Tuhan, or Allah ara. Oram aramat ipic bwempor arapok,’ inim aema.” Yesus inim aeefen.

⁸E Iblisam e aramat ipic opnakut sikon cowok atowotometefen. Ar e capinmiin capinmiin takas, e aramat ipic asarimporomtamefen. Aram e capinmi takas arakatnakutas, e aramat ipic aporomtamefen.

⁹Aram atakam Yesus aotawefen. “Or e dobipu bi fop aneyjiapcem, wunam dor asicimcenem, bare dor eras takas or atetamcimin.” Inim aeefen.

¹⁰E Yesus masirin, atakam Iblis aotawefen. “Iblis. Oram cey! E Alkitab atakam, ‘E Tuhan, or Allah ara. Oram aramat ipic mamsicimey. Ar cowok kerja mamemtamey.’ Inim aema.” Yesus inim aeefen.

¹¹Bare, e Iblis, e Yesus bakan ajiosefen. Malaikat masirin, aenawfesen. Ar pok Yesus afafaytamfesen.

¹²Barewen. Yesus, ow e Yohanes penjara cem aman ajiwtewapomfesas, atakam jen ajiefen. Ar masirin, Galilea capinmi ajisosefen.

¹³Aram kota Nasaret bemapawar opoken. E nat, ar jopir kota juwas Kapernaum aemapefen. Er e Sebulon capinmiam, e Naftali capinmiam, arawen.

¹⁴Er a Allah atakam botaw ipic juwas Yesaya e atawef atakam jipu arawen:

¹⁵“E Sebulon capinmiam, e Naftali capinmiam, e jopir sotop ara. Er e Yordan jo poman ara. Er e Galilea capinmi ara. Bare, e Galilea capinmi e Yahudi opok ow acapinmi ara.

¹⁶E jiwic aman aemapmes ow, sereas awutnakut aporcemes. E ow e damiras capinmi aemapmes. Er jiwic asan ara. E nat, e sereas e owpu asereytepcema.” Yesaya inim aeefen.

¹⁷E jofay ajiwar, Yesus atakam aotawawiri: “E Onam Op Pemerintah aenawcow jofay, bare sotopnakap asisienawma. Inimas car e dosaas takas bak bapayemtotorey.” Inim aeawiri.

¹⁸Barewen. Yesus e bwi juwas Galilea e jopir ajarefen. Aram jipic jamnuk aporefen. E arepwecin arewec arawen. E wun ipic juwas Simon arawen. (Aramat ipic wun juwas Petrus arawen.) Arewec masirin, juwas Andreas arawen. Ar jim bapi cescuw ow arawen. Inimas aram jim apifesen.

¹⁹Yesusam atakam e ow aotawefen. “Deyo. Mamkawicano. Dor, car, asmat ow, enam inim bapitaw, amememtamcimin.” Inim aeefen.

²⁰Aramat owam e ajim bakan asarimjifes cowok arawen. Aram Yesus ajamkawifesen.

²¹Yesusam aojarefen. Ar wun ipic jamnuk aoporefen. Eram arepwecin arewec arawen. Er Yakobusam, arewec Yohanesam, arawen. Er Sebedeus atiperes arawen. Aram, aricipic Sebedeusam, e ajim jof bakekem, ci aman aemapfesen. Yesusam e ipic jamnuk ajateefen.

²²E ow masirin, e aciam, e aricipicam, bakan asarimjiosfesen. Aram Yesus ajamkawifesen.

²³Barewen. Aramat ipic e Galilea capinmi asanin asanin ajitjarefen. Ar sembahyang cem arke aman, atakam amememtama aeefen. Ar, e Allah Pemerintah Atakam Akat, acacapioma aeefen. Aram ow cīncīn damasam, cīncīn dam kumitasam, ajaworomtawa aeefen.

²⁴Aramat ipic e Siria capinmi takas an afufuosefen. Owam, e asan pwicak ow takas, e aramat ipicpu atowocenfesen. Er e cīncīn damas epcom owam, e cīncīn asesakas epcom owam, e dat e ajak aman aemaptotorfes owam, e jis apia ajimpes owam, e japow owam, inim arawen. Aramat ipic masirin, e ow ajaworomtawa aeefen.

²⁵Ow arkeam e aramat ipic fa asoromfesen. Er e Galilea capinmiam, e kota Dekapolisam, e kota Yerusalemam, e Yudea capinmiam, e Yordan poman capinmiam, inim ewenawfes ow arawen.