Read Central Asmat MATIUS 5 Bible Online

MATIUS 5 - Central Asmat bible

MATIUS 5

¹Yesus e ow arke aporefen. Ar masirin, e sikon op aaptometefen. Aram aneypwikapefen. E amamkawi owam aramat ipicpu aenawomfesen.

²Aramat ipic masirin, e ow inim atakam amememtamefen:

³“E Tuhan jirey cowok aemes ow e Onam Op Pemerintah Asan afiwcemes. Inimas e ow asan akat aemapmes.

⁴Allah e jak pwicak aemapmes ow, jak akat atatamcema. Inimas e ow asan akat aemapmes.

⁵E arma batawsicim opok ow, a capinmi takas atowopcemes. Inimas e ow asan akat aemapmes.

⁶Allah, e ow tarowat memem jak aserememames ow, ow tarowat atamemcema. Inimas e ow asan akat aemapmes.

⁷Allah kawey ow serow ajiomames ow, serow ajiomcema. Inimas e ow asan akat aemapmes.

⁸E jursumec opok jak ow, Allah bi aporcemes. Inimas e ow asan akat aemapmes.

⁹Allah, ow damos boam bemapom ow, ‘E ow dotiperes ara,’ inim aecema. Inimas e ow asan akat aemapmes.

¹⁰Wun ow, ow tarowat aemapmes. Ow nat, inim ow apormesnew, wunam ar e ow ajurusumamesnew, bare, e ow tarowat, asan akat aemapmes. E Onam Op Pemerintah Asan, bare aras ara.

¹¹Ow car do mamkawi ow aporcan, wunam ar cemew car aatcannew, ar car ajurusumcannew, ar ‘Car pwicakas aemamokom,’ inim suw atakam aotawcesnew, bare asan akat aemapcomokom.

¹²E Allah onam op car atatamcanas, bare akatnakut ara. Inimas jak akatnakut emapey. Bap ara, ow e Allah atakam botaw owam ajurusumfesen. Ca nat, asep ow ara.”

¹³“Car, asmat ow agaram inim cimin ara. E nat, garam jema opok aemamescownew, ow e garam jemaas bwemokenemapom asan opok. E garam, bare pwicak ara. Ow e garam ajiwosomcemes. Aram e garam bwey aopowjarcemes.

¹⁴Caram asmat ow e asereas aememamokom. Ow, kota, sikon op aeapomces, ar e kota bwemcukumapom asan opok.

¹⁵Ow pelita ateremapomces, ar e pelita ember aman bwemkapimapom asan opok. Ar e pelita, pelita asan atewapomcemes. Erasan e pelita e cem aman ow takas sere aemtamcema.

¹⁶Inimasam ara, caram pelita cimin, ow bipu sere ememey. Ow masirin, e aemamokom akatas aporcemes. Aram, e onam op caricipic, asicimcemes.”

¹⁷“Ca nat, ‘E Yesus, e Musa tulis aeapomef Jirmecam, e Allah atakam botaw ow tulis aeapomfes atakamam, biwosom aenawef,’ inim bi binip arapok. Dor eras biwosom bwenaw opok. Do nat, e atakam jipu bwemkurum aenawof.

¹⁸Atakamnak ara, e onam opam, a capinmiam, banios opok aemames ara, ow e Jirmec atakam huruf kanimnakapnew, e Jirmec atakam titik cowoknakapnew, bwemjiwosom asan opok. Ow e atakam takas jipu bap a takam aemcemes. E onam opam, a capinmiam, asep aanioscemes.

¹⁹Inimas ara, ow e Jirmec kanimnakap aopowcesam, ar kawey ow e Jirmec kanimnakap bopow amememtamcesam, bare, ar e Onam Op Pemerintah Asan, juwas opok aememcemes. E nat, ow e Jirmec ji aecesam, ar kawey ow e Jirmec ji bwe amememtamcesam, bare, ar e Onam Op Pemerintah Asan, juwas emcomnak ow aememcemes.

²⁰E Allah Jirmec mamememtam owam, e Parisi owam, tarowat opok ara. Caram inim tarowat opok ememcokomnew, car e Onam Op Pemerintah Asan bwemfiw asan opokman.”

²¹“Ow atakam e bapnak ow aotawfes, ‘Daw catiwcokom. E daw ow, e salah atakam basakamtiw ipic bipu aememcemes.’ Inim aefesen. Caram inimas jen emcajifokom.

²²Ca nat, jakaperey. Ow bifan e ajowow afayomces, ar e salah atakam basakamtiw ipic bipu aememcemes. Ow cemew atakam e ajowow aotawces, ar e salah atakam basakamtiw ow awut bipu aememcemes. Ow atakam e ajowow aotawces, ‘Or Dat! Or o! Or pi!’ inim cemew aatces, bare ar e neraka jismak aman afiwapcemes.

²³Car pok Allah batetam aememcokom, wunam e pok jis bafamtam jowsepu ememcokom, e masirin, car, ‘Dojowow ipic jak amop dor ara,’ inim bi binip acomomcokom, car e Allah atetamcokom pok, e pok jis bafamtam jowsepu desen mamtatiwey.

²⁴Car masirin, e cojowow ipicpu mamtakamapeney. Caram e ipic damos mamtakamamjiomey. Damos atakamjiomcokom masirin, mamofasiey, wunam e pok Allah mamtetamey.”

²⁵Ow, ‘Or inim salah aemfan,’ inim aetotorcan, caram e ow damos aynam mamjiomey— car e salah atakam basakamtiw ipic asan bajarem opok ara. E ow car e salah atakam basakamtiw ipic batasimemtamasin. E ow car e salah atakam basakamtiw ipic aotasimemtamcan, e ipic car polisi aootasimemtamceman. E polisi masirin, car e penjara cem aman afimimceman.

²⁶Atakamnak ara, car e penjara cem aman aemapawarcomokom— e pok abwitamkurumcokom jofay ajiwar.

²⁷“Ow atakam aotawfes, ‘Okore emcokom,’ inim aefes. Caram inim atakam jen emcajifokom.

²⁸Ca nat, jakaperey. Jipic, cowoc manmok atiwcow, wunam ar e cowoc jursumecas bwem jak asinomcow, bare e ipic e ajak aman okore aemapma.

²⁹E cabo manmok, car dosa bwem aomcan, e manmok mamweremtewey. E camanmok daniwis aemamescow, bare car asan akat inim. E nat, Allah e cadam epcom neraka aman ajiwimcam, bare car asan pwicaknakut aemapcomokom.

³⁰Wunam, e caban bo car dosa bwem aomcan, e ban mamsakamosomey. E caban daniwis aemamescow, bare cae asan akat inim. E nat, e cadam anakat epcom e neraka afiwapcokom, bare car asan pwicaknakut aemapcomokom.”

³¹“Ow atakam aotawfes, ‘Jipic e arem ajiwapomcow, ar e cowoc bajiwapom surat batetamcow,’ inim aefesen.

³²Ca nat, jakaperey. Arem, kawey cemen ban opok emcow, e nat armipic e arem ajiwapomcow, ar e cowoc kawey cemen ban cowoc aemapomcema. Kawey ipicam e cowoc atewetcow, e ipic cen osom ipic aememcema.”

³³“Wunam, ow atakam e ametnak ow aotawfes, ‘Car atayi faknakut Tuhan aetotorcokom. “Dor e atayi aeminas jipu aemcimin. Pate opok cowok. Oram manmok tiwapem,” inim atayi aetotorcokom, bare e atayi aecokomas biwosom arapok.’ Inim aefes.

³⁴Do nat, atakam car aotawmin. Caram, ‘Dor e atayi aeminas jipu aemcimin. Pate opok cowok. Allah manmok tiwap,’ inim baji arapok. Caram, ‘Pate opok cowok. E onam op capinmi awames,’ inim baji arapok. Bare, e onam op capinmi Allah afa bemap asan inim cimin ara.

³⁵Caram, ‘Pate opok cowok. A capinmi awames,’ inim baji arapok. Bare, a capinmi, Allah abweyko inim cimin ara. Caram, ‘Pate opok cowok. E kota Yerusalem awames,’ inim baji arapok. Bare, e Yerusalem e Raja awut akota ara.

³⁶Caram, ‘Pate opok cowok. Dokus awap ara,’ inim baji arapok. Caram e cakus fin fwesak cowoknakapam, fin sosok bwemjaworom asan opok. Caram e cakus fin sosok cowoknakapam, fin fwesak bwemjaworom asan opok.

³⁷Car atayi aecokom, car, ‘Owo,’ inim cowok mamjiey. Caram, ‘Opok,’ inim cowok mamjiey. Car wun atakam aokawimcokom, er e Jursumec Ipic inim bi binip car atetamcanas ara.”

³⁸“Ow atakam aotawfes, ‘Ow, wun ow amanmok daniwis aemapomces, ow e ow amanmokam daniwis baemapomces. Ow, wun ow asis ajakamces, ow e ow asisam bajakamces.’ Inim aefes.

³⁹Ca nat, jakaperey. Ow jokmen car aomomcannew, bic baji arapok. Ow e cabo ak aempocannew, e poman akam mamofirimtamey.

⁴⁰Ow e cabaju kaus batewet aememcesnew, inimas ar car e salah basakamtiw ipic bipu atowocencannew, bare e cabaju kemejaam e ow mamtetamey.

⁴¹Ow, car e apok kilometer cowok ajiwar jec bomostam jen opok aomcannew, bare e apok kilometer jamnuk ajiwar jec mamomostamey.

⁴²Ow pok janim car aanimcannew, e pok e ow mamtetamey. Ow e capok batew aememcesnew, caram acuw arapok.”

⁴³“Ow atakam aotawfes, ‘E cajowow damos ajiomey. E cajewew owam bifan afayomey.’ Inim aefesen. Caram inim atakam jen ajifokom.

⁴⁴Ca nat, jakaperey. E cajewew ow damos ajiomey. Caram Allah, asan akat, e ca jurusumaman ow bom, janim manimtamey.

⁴⁵Inimas aecokom, car e onam op caricipic atiperes aememcomokom. Aramat ipic e ajopok, e jursumec owpuam, e tarowat owpuam, awcawor atewnemtamama. Aram e te, e tarowat owpuam, e fasi owpuam awcawor atewnemtamama.

⁴⁶Car damos e damos car ajiomaman ow cowok ajiomamokomnew, ucim asan akat emapmokomnew? E pemerintah uang batawanimapom owam inimas aemames.

⁴⁷Caram selamat atakam e cajowow cowok aotawmokomnew, ucim akatnakutas aemamokomnew? E Allah amsom opok owam inimas aemames.

⁴⁸Inimas ara, caram ow tarowat ememey— e onam op caricipic tarowat aememamar inim cimina.”