Read Central Asmat MATIUS 6 Bible Online

MATIUS 6 - Central Asmat bible

MATIUS 6

¹“Caram pimicima. Car e akat aemamokomas, kawey ow bipu bwem arapok. E ow car e akat aemamokomas bwem manmok batiwasin. Car e carakatas kawey ow bipu aemcokomnew, e onam op caricipic asan akat car momom opok aemcema.

²Car pok e pok opok ow atetamcokom, eras, ow car manmok basirim bwem arapok. E pir bwe ow, pok e pok opok ow atetamces, ar e sembahyang cem amanam, e bokotpuam, ow manmok a basirimas aemcemes. Ar ow a basicim, jak aseremomcemes. Atakamnak ara, asmat ow cowok e ow asicimcemes. Allah nat, e ow basicim opok aemcema.

³Ca nat, pok e pok opok ow atetamcokom, umuton arapok. E cajowow anakatam e aemcokomas baporasin.

⁴Inimas e atetamcokomas, bare curuwas ara. E onam op caricipic masirin, e curuw aemcokomas aporcema. Inimas ar asan akat car aomcema.”

⁵“Janim Allah aanimcokomam, e pir bwe ow inim cimin ecokom. E ow e sembahyang cem amanam, e bokotpuam, janim Allah manim, jak aserememames. Ar, ow, e aemamesas manmok batiw, jak aserememames. Atakamnak ara, asmat owin, e ow asicimcemes. Allah nat, e ow basicim opok aemcema.

⁶Ca nat, janim Allah aanimcokom, e cakamar aman mamjiwtotorey, wunam e jimasap mamkapimapomey. Car masirin, janim Allah mamanimey. Ow caricipic bi bapor opok aemames. E nat, aramat ipic, e carop aecokomas aporcema. Ar masirin, asan akat car atetamcema.

⁷Janim Allah aanimcokom, e Allah amsom opok ow inim cimin desen atakam bataw arapok. E ow abi binip ara, ‘Dar atakam arke atawcom, Allah jen ajicemarow,’ inim bi binip aceceremames.

⁸Car janim e caricipic manim opok ara, aramat ipicam e asan pwicak aemapmokomas bap aporma. Inimas car e ow inim cimin bwe arapok.

⁹Janim Allah aanimcokom, inim janim mamanimey: ‘Daricipic onam op awapem. Ow, e ojuwas akatnakut baporcenes.

¹⁰E o Pemerintah baenawcow. E onam op ow e akat apormemas jipu aemames. Awames capinmi owam e akat apormemas jipu baemces.

¹¹Wow e dajak banapitapas amos tetamcarowey.

¹²Dar ow e aomforowos pwicakas, bi binip emcajiwosomfom. Inimas ara, owam e aemorom pwicakas, bi binip biwosomey.

¹³Or Iblis dar dosa bwem bacajijimtaw batetam arapok. Oram e Jokmen Ipic da bajurusumas, ajortewcarowey.’ Inim janim Allah mamanimey.

¹⁴Car kawey ow e car aomfan pwicakas, bi binip ajiwosomcokom, e onam op caricipic e aemfokom pwicakas, bi binip ajiwosomcema.

¹⁵E nat, car kawey ow e car aomfokom pwicakas, bi binip biwosom opok aemcokom, e onam op caricipic e aemfokom pwicakas bi binip biwosom opok aemcema.”

¹⁶“Car amos pok amaseemcokom, car e pir bwe ow inim cimin bi ciri memem arapok. E ow, wun bi ajaworemcemes. Eras, ar amos pok amaseemames baporomas ara. Atakamnak ara, asmat owin, e ow asicimcemes. Allah nat, e ow basicim opok aemcema.

¹⁷Car amos pok amaseemcokom, e cakus fin mamceceremey. E cabiam bwi mamcicikimey.

¹⁸Kawey ow, car amos pok bamaseem baporasin. E caricipic nat, aporcema. Ow, aramat ipic bi bapor opok aemames. E nat, aramat ipic, e carop aemamokomas aporcema. Aram asan akat car aomceman.”

¹⁹“Caram pok awames capinmi batawanim arapok. Arasan ara, osot, pok, jof asesewma. Pokam as aapjitotorma. Osom owam e cem daniwis aamames, wunam pok osom aemes.

²⁰Ca nat, pok e onam op capinmi mamtawanimey. Erasan ara, osot pok jof basesew opok. Pokam as bapji opok. Osom owam pok osom bwe, cem daniwis bam opok.

²¹Bare, car e capok asan bemap, jak aseremapmokom.”

²²“Ow amanmok, e dam apelita inim cimin ara. E camanmok akat aranew, e cabi binipam takas umuton ara.

²³E nat, e camanmok pwicak aranew, e cabi binipam takas jiwic ara. E casereas jiwic ajaworemcownew, bare car jiwicnakut aememcomokom.”

²⁴“Kerja bwemtam ipic, kerja aramat ipic jamnuk, inim kerja bwememtam asan opok. Ar wun ipic bifan afayomcema, wunam e wun ipic damos ajiomcema. Ar e wun ipic ajamkawicema, wunam e wun ipic pwicak aporcema. Car, Allah kerja bwemtamam, awames capinmi pok batewet bi binip awut baceceremam, a jamnuk takas cowkon bwemem asan opok.

²⁵Inimas ara, caram jakaperey. E aancokom amos pok, car tetakay mememas ara. E nat, car e aancokomas, bi binip jirow arapok. Caram e cadam ajimomcokom pakaian, bi binip jirow arapok. Tetakay memem, bare penting awut ara. Amos pok nat, penting awut opok. Asmat damam penting awut ara. Pakaian nat, penting awut opok.

²⁶E op sok manmok tiwporey. Ar pok akan batewapom opok. Aram amos bajow opok. Aram pok cem aman batawanimapom opok. E nat, e onam op caricipic amos pok e sok atatamama. Bare, car penting awutut ara. E sok nat, penting awut opok.

²⁷Ow, pok bi binip jirow aceceremcesnew, aram e adamir aaffes jofay, bar cowoknakapam bwemotasimenem asan opok.

²⁸Caram e ajimomcokom pakaian, ucim bi binip jirow ceceremamokom? E tawar esakam, manmok tiwporey. Ar kerja opok. Aram pakaian bakekem opok.

²⁹Ca nat, jakaperey. Raja Salomo akatnakut aememefen. Aramat ipic nat, pakaian e tawar esakam inim akatipic, bajimom opok cowok arawen.

³⁰Bare, e wasan pok, wow awamces. Asep jofay masirin, ow e pok jis afamtiwcemes. Allah nat, e pok akatipic aemapomef. Bare, aramat ipicam pakaian car atetamceman araman— e ca basicimkurum opok owam ara.

³¹Inimas car pok bi binip jirow arapok. Caram, ‘Ucim amos pok aancom? Ucim bwi aancom? Ucim pakaian ajimomcom?’ inim atakam arapok.

³²E Allah amsom opok ow eras takas bi binip jirow aceceremcemes. E onam op caricipic, e aancokomas takasam, e ajimomcokom pakaian takasam, bare amsom ara.

³³Ca nat, e Allah Pemerintah bi binip awut batakamceceremey. Caram ow tarowat batakamememporey. Aramat ipic masirin, e wunas takas car atatamceman.

³⁴Inimas ara, e to aemcokomas, bi binip jirow arapok. Wow arop bajurusemas ara. Toam arop bajurusemas ara. Wun bajurusemas bi binip jirow arapok.”